އިންޑިއާގެ ބޮޑުވަޒީރު ނަރެންދްރަ މޯދީ އަށް ރަސްމީކޮށް މަރުހަބާ ދަންނަވައިފި
25 ޖުލައި 2025 | ހުކުރު 11:10މަރުހަބާ ދެންނެވުމަށް ފަހު ރައީސުލްޖުމްހޫރިއްޔާގެ އޮފީހަށް މޯދީ ވަޑައިގަންނަވާފައި ވަނީ ހަތްކޮޅުގައެވެ. އެތަނަށް ވަޑައިގެން މެހެމާނުން ސޮއިކުރައްވާ ފޮތުގައި އެ މަނިކުފާނު ވަނީ ސޮއިކުރައްވާފަ
އިންޑިއާގެ ބޮޑުވަޒީރު ނަރެންދްރަ މޯދީ އަށް ރަސްމީކޮށް މަރުޚަބާ ދެންނެވުން | ރާއްޖެއެމްވީ
އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެއަށް ކުރައްވާ ފުރަމާނަ ދަތުރުފުޅުގައި ހުކުރު ދުވަހު މެންދުރުފަހު މާލެއަށް ވަޑައިގެންނެވުމުން އެ މަނިކުފާނަށް ރަސްމީކޮށް މަރުހަބާ ދަންނަވައިފިއެވެ.
އިންޑިއާގެ ބޮޑުވަޒީރު މޯދީ މިހާރު ރާއްޖެ އަށް ކުރައްވާ ދަތުރުފުޅަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަޢުވަތަކަށް ކުރައްވަމުން ގެންދަވާ ދަތުރުފުޅެކެވެ.
އެމަނިކުފާނަށް މަރުހަބާ ދެންނެވުމުގެ ހަރަކާތްތައް ކުރިއަށް ގެންގޮސްފައި ވަނީ ޖުމްހޫރީ މައިދާނުގައެވެ. އެގޮތުން ރަސްމީ އިއްޒުއްދީން ފާލަމަށް ބޮޑު ވަޒީރު ވަޑައިގަތުމުން އެ މަނިކުފާނަށް މަރުހަބާ ދެންނެވުމުގެ ހަރަކާތްތައް ފެށުނެވެ. މޯދީގެ އަރިހުގައި ރައީސް ޑރ.މުހައްމަދު މުއިއްޒު ހުންނެވިއެވެ.
އެމަނިކުފާނަށް މަރުހަބާ ދެންނެވުމަށް އަމީނިއްޔާ ސްކޫލުގެ ދަރިވަރުން ސަޤާފީ ނެށުމަކާއެކު އެކު ޚާއްސަ އައިޓަމެއް ވަނީ ހުށަހަޅާދީފައެވެ.
އެ ހަރަކާތަށް ފަހު ރަސްމީ ކުރުނީސްކޮށް، 21 ބަޑީގެ ސަލާމެއް މޯދީގެ ޝަރަފުގައި ވަނީ އަރުވާފައެވެ. އެއަށް ފަހު ރާއްޖޭގެ ދިފާއީ ބާރުން ވަނީ އިންޑިއާގެ ޤައުމީ ސަލާމާއި ރާއްޖޭގެ ޤައުމީ ސަލާމް ކުޅެފައެވެ.
މިރަސްމިއްޔާތުގައި ބޮޑުވަޒީރު މޯދީ ވަނީ، އެމަނިކުފާނުގެ ޝަރަފުގައި އޮތް ޝަރަފްގެ ގާޑް، އިންސްޕެކްޓް ކޮށްދެއްވާފައެވެ. މި ރަސްމިއްޔާތުގައި، ބޮޑުވަޒީރު މޯދީއަށް ދިވެހި ދައުލަތުގެ އިއްޒަތްތެރީން މަރްޙަބާ ވިދާޅުވެ ތަޢާރަފުވެވަޑައިގަތުމާއި އިންޑިއާ ވަފުދުގެ ބޭފުޅުން ތަޢާރަފު ކޮށްދެއްވުން ވެސް އޮތެވެ.
އޭގެ ފަހުން ރައީސުލްޖުމްހޫރިއްޔާގެ އޮފީހަށް މޯދީ ވަޑައިގަންނަވާފައި ވަނީ ހަތްކޮޅުގައެވެ. އެތަނަށް ވަޑައިގެން މެހެމާނުން ސޮއިކުރައްވާ ފޮތުގައި އެ މަނިކުފާނު ވަނީ ސޮއިކުރައްވާފައެވެ.
ބޮޑުވަޒީރު ނަރެންދްރަ މޯދީ ރާއްޖެ ވަޑައިގެންނެވީ ހުކުރު ދުވަހު ހެނދުނެވެ.
