މަންޑޭ ހުންނަނީ ސަރުކާރުގެ އިސްސަފުގައި، އެއީ ކޭ-ޕާކުގެ މައްސަލަ ނުބެލި އެއްކައިރިއަށް ޖެހޭ ސަބަބު: މެންބަރު މީކާއިލް
21 ޖުލައި 2025 | ހޯމަ 08:37ކޭ-ޕާކުން އެޕާޓްމަންޓު ގަތް އާއްމުން ތިބީ ނިކަމެތިކަމުގައި
ކޭ-ޕާކް ފްލެޓްތަކުގެ މައްސަލާގައި ދައުވާ އުފުލާފައިވާ ހަސަން މަމްދޫހުގެ އަޑު އެހުމެއް ކުރިއަށް ގެންދަނީ - ފައިލް ފޮޓޯ
ހުޅުމާލޭގައި ތަރައްގީކުރަމުން އަންނަ ކޭ-ޕާކް ފްލެޓްތަކުގެ މައްސަލާގައި ދައުވާ އުފުލާފައިވާ ހަސަން މަމްދޫހު (މަންޑޭ) ހުންނަނީ ރައީސް ޑރ.މުހައްމަދު މުއިއްޒު ސަރުކާރުގެ އިސްސަފުގައި ކަމަށާއި، އެއީ މިމައްސަލަ ނުބެލި، އެއްކައިރިއަށް ޖެހޭ ސަބަބު ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ކޭ-ޕާކް ރެސިޑެންސްގެ ނަމުގައި ހުޅުމާލޭގައި ފެށި ހައުސިންގ މަޝްރޫއުއާ ގުޅިގެން ދިމާވި މައްސަލަތައް ހައްލުނުވެ ދިގުލައިގެންދިޔުމާމެދު ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި ގަރާރަށް ބަހުސްކުރައްވަމުން މެންބަރު މީކާއިލް ވިދާޅުވީ ކޭ-ޕާކުގެ އެޕާޓްމަންޓުތައް ދޫނުކޮށް ލަސްކުރާ ސަބަބު ސާފުކުރަންޖެހޭ ކަމަށެވެ.
މެންބަރު މީކާއިލް ވިދާޅުވީ މިސަރުކާރަށް ކޭ-ޕާކު މައްސަލަ ހައްލު ކުރުމާއި، ރައްޔިތުންނާ ގުޅުންހުރި އަސާސީ ބޯހިޔާވަހިކަމުގެ އިތުރު މައްސަލަތައް ހައްލު ކުރުން މުހިންމު ނޫން ކަމަށެވެ. އަދި މި ސަރުކާރަށް މިއަދު މުހިންމު ވަނީ ދައުލަތުގެ ރިޒާވުން 600 މިލިއަނެއްހާ ރުފިޔާ ނަގައިގެން މާދުރުގައި އޮތް ފުށިދިއްގަރުފަޅެއް ހިއްކުން ކަމަށް އޭނާ ވިދާޅުވިއެވެ.
މެންބަރު މީކާއިލް ވިދާޅުވީ ކޭ-ޕާކުން އެޕާޓްމަންޓު ގަތް އާއްމުން ތިބީ ނިކަމެތިކަމުގައި ކަމަށާއި، އެމީހުން އެތަނުން އެޕާޓްމަންޓު ގަތުމަށް ނެގި ލޯނަށް މިއަދު ވެސް ފައިސާ ދައްކަމުންދާ ކަމަށެވެ. ކުއްޔަށް ދިރިއުޅެމުންދާއިރު، ކުލީގެ ފައިސާ ދެއްކުމުގެ އިތުރުން ދައުލަތަށް ވެސް ޓެކްސް ފައިދާ ދައްކާ ކަމަށެވެ. އަދި މި ސަރުކާރުން ދަނީ އެމީހުން އިތުރަށް ނިކަމެތި ކުރަމުން ކަމަށް މެންބަރު މީކާއިލް ވިދާޅުވިއެވެ.
މީގެ އިތުރުން މެންބަރު މީކާއިލް ވިދާޅުވީ މިސަރުކާރުން ކޭ-ޕާކު މައްސަލަ އެއްކައިރިކޮށްލާފައިވާ ކަމަށާއި، މިމައްސަލައިގައި ދައުވާ އުފުލާފައިވާ މަންޑޭ ފެނިގެންދަނީ ސަރުކާރުގެ އިސްސަފުން ކަމަށެވެ.
އަޅުގަނޑުމެން ކަންބޮޑުވާންޖެހޭ ކަމަކީ ކޮންމެ ރައްޔިތުންގެ މަޖިލީހުގެ އިންތިޚާބަކާ ދިމާކޮށް ކޮންމެ ރިޔާސީ އިންތިޚާބަކާ ދިމާކޮށް، މިފަދަ މައްސަލަތަކުގައި ތާށިވެފައި ތިއްބަވާ ބޭފުޅުން އެކިއެކި ސިޔާސީ ޕާޓީތަކުގެ ބޭފުޅުން އެންމެ ކުރީ ސަފުގައި އެންމެކުރީ ބަރީގައި މިބޭފުޅުންނަށް އިއްޒަތް އަރުވާ މަންޒަރު އަޅުގަނޑުމެންނަށް އެބަ ފެނޭ. ރައްޔިތުން މަޖިލީހުގެ އިންތިޚާބުގައި މިހާރު މިކޭޕާކުގެ މައްސަލާގައި ހިމެނޭ މަންޑޭ އިންޒަތްތެރި ރައީސް ޕީއެންސީގެ އެކިއެކި ރައްޔިތުން މަޖިލީހުގެ މެންބަރުން ކެންޑިޑޭޓުންގެ ސެރެމަނީތަކުގައި ރިބަން ކަނޑާ ދިނުމަށް މަންޑޭ ހުރީ އެނގޭތޯ އިއްޒަތްތެރި ރައީސް. މިކޮންފަދަ ވާހަކައެއްތޯ އަޅުގަނޑުމެން ދައްކަން މިޖެހެނީ. އަޅުގަނޑުމެންނަށް ވަރަށް ސާފު ކޭޕާކުގެ މައްސަލަ އެއްކައިރިއަށް ޖައްސާލާފައި އިއްޒަތްތެރި ރައީސް ސަރުކާރަށް ކޭޕާކު މައްސަލަ އެއްކާރިއަށް ޖައްސާލާފައި ފުށިދިއްގަރުފަޅެއް ހިއްކަން އިސްކަންދޭންޖެހޭ މައްސަލަ އަޅުގަނޑުމެންނަށް އެބަ ސާފުވޭ. އެހެންވީމަ ދައުލަތެއްގެ އިސްކަން ދޭ ތަރުތީބު އަލުން އެކުލަވާލަން މިސަރުކާރަށް އަޅުގަނޑު ގޮވާލަން.ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
ކޭ-ޕާކް ފްލެޓްތަކުގެ މައްސަލާގައި ދައުވާ އުފުލާފައިވާ މަންޑޭ ޝަރުތުތަކާއެކު ބަންދުން ދޫކޮށްލާފައިވަނީ 3 ޖުލައި 2025 ގައި ކްރިމިނަލް ކޯޓުގައި ކުރިއަށް ގެންދިޔަ އަޑު އެހުމުގައެވެ.
އޭނާ ޝަރީއަތް ނިމެންދެން ބަންދުކޮށްފައިވަނީ 23 ޖޫން 2025 ގައެވެ.
މި މައްސަލައިގައި މަންޑޭގެ މައްޗަށް 104 ދައުވާއެއް ކުރުމަށް ކޯޓަށް ހުށަހަޅާފައިވެއެވެ. އަދި ޖައިޝާން ސައީދުގެ މައްޗަށް 97 ދައުވާއެއް ކުރުމަށް ކޯޓަށް ހުށަހަޅާފައިވެއެވެ.
