ސައުދީ ޕްރޯ ލީގުގެ އަލް ޤަދްސިއްޔާ އަށް ކުޅެމުން އައި ޕިއޭ އެމްރިކް އޮބާމަޔަން އެ ކުލަބުގެ އެއްބަސްވުން އުވާލައިފި އެވެ.

އުމުރުން 36 އަހަރުގެ ކުޅުންތެރިޔާ އަލް ޤަދްސިއްޔާ އަށް ބަދަލުވީ 2024 ވަނަ އަހަރު އެވެ. މާސޭ ދޫކޮށްލުމަށް ފަހު އޭނާ އެ ކުލަބަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު 2026 ވަނަ އަހަރު ހަމަވާން އޮތް ނަމަވެސް، އެއްބަސްވުމުގައި ބާކީ އެއް އަހަރު އޮއްވައި އޭނާ ވަނީ އެ ކުލަބުގެ އެއްބަސްވުން އުވާލައިފަ އެވެ.

އަލް ޤަދްސިއްޔާ އާއެކު ކުރިއަށް ގެންދިޔަ މަޝްވަރާތަކަށް ފަހު އެ ކުލަބުގެ އެއްބަސްވުން އުވާލަން އޮބާމަޔަން ނިންމީ، އެހެން ކުލަބުތަކެއްގެ އޮފާ އޭނާ އަށް ލިބިފައިވާ ވަގުތެއްގަ އެވެ. އެގޮތުން އޭނާ ކުރިން ކުޅުނު ފްރާންސްގެ މާސޭ އިން އަންނަނީ އޮބާމަޔަން ގެނައުމަށް މަސައްކަތް ކުރަމުން ކަމަށް މީޑިއާ ރިޕޯޓުތައް ބުނެ އެވެ.

އޮބާމަޔަން ވަނީ އަލް ޤަދްސިއްޔާ އަށް އޭނާ ކުޅެދިން 36 މެޗުގައި 21 ލަނޑު ޖަހައިފަ އެވެ. އެ ޓީމާ އެކު އޭނާ ވަނީ ކިންގްސް ކަޕްގެ ފައިނަލްގައި ވާދަކޮށްފަ އެވެ. ނަމަވެސް އަލް ޤަދްސިއްޔާގެ މައްޗަށް ކުރި ހޯދައި އެ މުބާރާތް ކާމިޔާބު ކުރީ އަލް އިއްތިހާދުންނެވެ. މީގެ އިތުރުން އަލް ޤަދްސިއްޔާ އިން މިދިޔަ ސީޒަންގެ ސައުދީ ލީގު ނިންމާލީ ތާވަލްގެ ހަތަރު ވަނައިގަ އެވެ.

މީޑިއާ ތަކުގައި ބުނެފައިވާ ގޮތުން މާސޭ އިން އޭނާ ހޯދުމުގެ މަސައްކަތް ކުރަމުން އަންނަނީ، ދެ އަހަރު ދުވަހުގެ ޑީލެއްގެ ދަށުންންނެވެ. މީގެ ކުރިން 2023 ވަނަ އަހަރު އޭނާ މާސޭ އަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. ނަމަވެސް، 2024 ވަނަ އަހަރުގެ ޖުލައި މަހު އޭނާ ވަނީ މާސޭ ދޫކޮށް އަލް ޤަދްސިއްޔާ އަށް ބަދަލުވެފަ އެވެ.

އޭސީ މިލާން އިން ސީނިއާ ކެރިއަރު ފެށި އޮބާމަޔަން ވަނީ ގިނަ ކުލަބުތަކަށް ކުޅެފަ އެވެ. އެގޮތުން އޭނާ ވަނީ ލީލް، މޮނާކޯ، ބޮރޫޝިއާ ޑޯޓްމަންޑް، އާސެނަލް، ބާސެލޯނާ، ޗެލްސީ އަދި މާސޭ އަށް ވެސް ކުޅެފަ އެވެ.