ޝަރީއަތް ނިމެންދެން ބަންދުކޮށްފައި ހުރި މީހަކަށް ފަރުވާ ދެމުން ދަނިކޮށް ނިޔާވެއްޖެ
ނިޔާވީ މ. މަލަސް، 46 އަހަރުގެ އިސްމާއީލް ޝަބީން
އައިޖީއެމްއެޗް
ޝަރީއަތް ނިމެންދެން މާލެ ޖަލުގައި ބަންދުކޮށްފައި ހުރި މީހަކު އައިޖީއެމްއެޗްގައި ފަރުވާ ދެމުންދަނިކޮށް ނިޔާވެއްޖެއެވެ.
ނިޔާވީ ކ.މާލެ މ. މަލަސް، 46 އަހަރުގެ އިސްމާއީލް ޝަބީން އެވެ.
މޯލްޑިވްސް ކަރެކްޝަނަލް ސަރވިސްއިން ބުނީ އަންގާރަ ދުވަހުގެ ރޭ ގާތްގަނޑަކަށް 7:00ހާއިރު، ނޭވާ ލުމަށް އުނދަގޫތަކެއް ހުރުމުން އެމަޖެންސީ ހާލަތުގައި އައިޖީއެމްއެޗަށް ގެންގޮސް ފަރުވާ ދެމުންދަނިކޮށް ހާލު ދެރަވެ އައިސީޔޫއަށް ބަދަލުކުރި ކަމަށެވެ. އަދި ފަރުވާ ދެމުން ދަނިކޮށް އޮކްޓޫބަރ 6 ވީ ބުދަ ދުވަހުގެ ރޭ ގާތްގަނޑަކަށް 7:30 ހާއިރު ނިޔާވެފައިވާ ކަމަށެވެ.
ކަރެކްޝަންސް އިން ބުނީ އޭނާއަކީ ހަކުރު ބައްޔަށް ބޭސްކުރަމުންދިޔަ މީހެއް ކަމަށެވެ.
އިސްމާއީލް ޝަބީންއަކީ މަސްތުވާތަކެތި ބޭނުންކޮށް، ގެންގުޅެ އަދި ވިއްކިކަމަށް ކުރާ ދައުވާގެ ޝަރީއަތް ނިމެންދެން މާލެ ޖަލުގައި ބަންދުކޮށްފައިހުރި މީހެކެވެ.
އޭނާ ހޮސްޕިޓަލަށް ގެންދިއުމާ ގުޅިގެން ކަރެކްޝަންސްއިން ވަނީ އެކަން އިންސްޕެކްޓަރ އޮފް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް އަންގާފައެވެ.
