އަސްލަމްގެ މަރު: ތަހުގީގު ދަނީ ކުރިއަށް، އިހުމާލެއްވާނަމަ ފިޔަވަޅު އަޅާނަން
ތަހުގީގު ނިމޭނެ ދުވަހެއް ނޭނގޭ
މޯލްޑިވްސް ކަރެކްޝަނަލް ސަރވިސަސް،
ހުޅުމާލެ ޖަލުގައި، 3 އަހަރުގެެ ހުކުމެއް ތަންފީޒު ކުރަމުންދިޔަ ގައިދީއަކު މަރުވުމާއި ގުޅިގެން ކުރިއަށް ގެންދާ އިންޓަރނަލް ތަހުގީގުގަށް އިހުމާލެއްވާކަން ފާހަގަކުރެވޭނަމަ ފިޔަވަޅު އަޅާނެ ކަމަށް މޯލްޑިވްސް ކަރެކްޝަނަލް ސަރވިސް އިން ބުނެފިއެވެ.
ހުޅުމާލޭ ޖަލުގައި މިމަހުގެ 13 ވީ ހޯމަ ދުވަހު ރޭ މަރުވީ ގދ. ވާދޫ/ ޖަނަވަރީގެ މުހައްމަދު އަސްލަމެވެ. އޭނާގެ މަރާ ގުޅިގެން އާއިލާއާ ހަވާލާދީ އަނިޔާކޮށްފައިވާ ކަމަށް ބައެއް މީޑިއާތަކުގައި ރިޕޯޓުކޮށްފައިވެއެވެ. ނަމަވެސް އެކަން ކަރެކްޝަންސްއިން ވަނީ ދޮގުކޮށްފައެވެ. އަދި ކަން ހިނގާދިޔަ ގޮތުގެ ޓައިމްލައިނެއް ވެސް އާއްމުކޮށްފައިވެއެވެ.
މިމަރާ ގުޅިގެން ކަރެކްޝަންސްއިން ބުނީ އިންޓަރނަލް ތަހުގީގު ކުރިއަށްދާ ކަމަށާއި، ނިމޭނެ ދުވަހެއް ނޭނގޭ ކަމަށެވެ. ނަމަވެސް މިތަހުގީގުގައި އިހުމާލެއްވާކަން ފާހަގަކުރެވޭނަމަ ފިޔަވަޅު އަޅާނެ ކަމަށް ކަރެކްޝަންސްއިން ބުނެއެވެ. އިންޓަރނަލް ތަހުގީގީ ރިޕޯޓަކީ މީޑިއާތަކަށް އާއްމުކުރާ ރިޕޯޓެއް ނޫނެވެ.
މިހާދިސާ ހިނގާދިޔަ ގޮތާއި ބެހޭ ގޮތުން ކަރެކްޝަންސްއިން ބުނީ ސެޕްޓެމްބަރު 13 ވަނަ ދުވަހުގެ ރޭ ގާތްގަނޑަކަށް އިރުއޮއްސި 6:00 ހާއިރު އަސްލަމް ޔާޑު ސަރަަހައްދުގައި އިށީނދެގެން އިންދާ ކުއްލިއަކަށް ވެއްޓުމާއި ގުޅިގެން 8 މިނެޓް ތެރޭ އެމަރޖެންސީ ހާލަތުގައި ހުޅުމާލެ ހޮސްޕިޓަލަށް ގެންގޮސް ފަރުވާދޭން ފެށި ކަމަށެވެ. އަދި އާއިލާއަށް 6:30 ގައި ގުޅުމަށް މަސައްކަތްކޮށް، ގުޅިފައިވަނީ 6:42 ހާއިރު ކަމަށެވެ. އޭނާ އަކީ އެއްވެސް ބޮޑު ބައްޔަކަށް ބޭސްފަރުވާ ކުރަމުންދިޔަ މީހެއް ނޫން ކަމަށާއި އަސްލަމްގެ ބޮލަށް ގެއްލުން ލިބުނީ އޭނާ އިށީނދެ އިންދައި ވެއްޓުމާއި ގުޅިގެން ކަމަށް ވެސް ބުންޏެވެ. އަދި މަންޒަރު ހުޅުމާލެ ޖަލުގެ ސީސީޓީވީ ފުޓޭޖުން ސާފުކޮށް ފެންނަ ކަމަށް ވެސް ވަނީ ބުނެފައެވެ.
ހުޅުމާލެ ހޮސްޕިޓަލުން އަސްލަމަށް ފަރުވާ ދިނުމަށްފަހު އޭނާ މަރުވި ކަމަށް އަންގާފައިވަނީ 8:23 ގައި ކަމަށާއި މަރުގެ ސެޓްފިކެޓްގައި މަރުގެ ސަބަބު ދެނެގަނެފައި ނުވާ ކަމަށް ބުނެއެވެ. އަދި މަރުވެފައިވާ ވަގުތަކީ 6:55 ކަމަށް ބަޔާންކޮށްފައިވާ ކަމަށް ވެސް ކަރެކްޝަންސް އިން ބުނެއެވެ.
