ހިތްފަސޭހަ މައިޒާންފަދަ ތަންތަން ހެދުމަށް މުސްލިމުންގެ ގަބުރުސްތާނުތައް ނެގުން ހުއްދައެއް ނުވާނެ: ފަތުވާ
އިސްލާމްދީނުގައި އާދަމްގެފާނުންގެ ދަރީން، އެކަލާނގެ އުފެއްދެވި ގިނަ މަހުލޫގުތަކުންގެ މައްޗަށް ވަނީ މާތް ކުރައްވާފައި
ޕާކިން ޒޯނެއް ތަރައްގީ ކުރުމަށް މާފަންނު ސަހަރާ ހުސްކުރަނީ - ފައިލް ފޮޓޯ
ކުޅިވަރުކުޅޭ ތަންތަނާއި ހިތްފަސޭހަ މައިޒާންފަދަ ތަންތަން ހެދުމަށް މުސްލިމުންގެ ގަބުރުސްތާނުތައް އުވާލުން ނުވަތަ ނެގުން ހުއްދައެއް ނުވާނެ ކަމަށް އިސްލާމީ ފަތުވާދޭ އެންމެ މަތީ މަޖިލީހުން ބުނެފިއެވެ.
ފަތުވާ މަޖިލީހުން އާއްމު ކުރި 31 ވަނަ ފަތުވާގައި މުސްލިމުންގެ ގަބުރުސްތާނުތައް އުވާލުމުގެ ހުކުމާ ގުޅޭގޮތުން ގިނަ ދަލީލުތަކެއް ހިމަނާފައިވެއެވެ.
އިސްލާމްދީނުގައި އާދަމްގެފާނުންގެ ދަރީން، އެކަލާނގެ އުފެއްދެވި ގިނަ މަހުލޫގުތަކުންގެ މައްޗަށް މާތް ކުރައްވައި މަތިވެރި ކުރައްވާފައިވާކަން ފަތުވާގައި ފާހަގަކޮށްފައިވެއެވެ.
އެގޮތުން ސޫރަތު އަލްއިސްރާއުގެ 70 ވަނަ އާޔަތުގައި މާތް ﷲ ވަހީ ކުރައްވާފައިވެއެވެ. މާނައީ ''ހަމަކަށަވަރުން ތިމަންރަސްކަލާނގެ އާދަމްގެ ދަރިން މާތް ކުރެއްވިއެވެ. އަދި އެއުރެން އެއްގަމާއި، ކަނޑުގައި އުފުއްލެވީމެވެ. އަދި އެއުރެންނަށް ރަނގަޅު ތަކެތިން ރިޒުގު ދެއްވީމެވެ. އަދި ތިމަންރަސްކަލާނގެ ހެއްދެވި ތަކެތީގެ ތެރެއިން ގިނަ ތަކެތީގެ މައްޗަށް އެއުރެން މަތިވެރި ދަރަޖައަކަށް މާތް ކުރެއްވީމެވެ.އިސްލާމީ ފަތުވާދޭ އެންމެ މަތީ މަޖިލިސް
ފަތުވާގައި ވަނީ މި މަތިވެރިކަމަކީ މުސްލިމު އަހާ ދިރިހުރުމާ ގުޅިފައިވާ ކަމެއް ނޫން ކަމާއި، މަރުވުމަށްފަހުވެސް މި ދެންނެވި އިހުތިރާމު ދެމިގެންވާ ކަމަށެވެ.
މާނައީ: އާއިޝަތުގެފާނުންގެ އަރިހުން ރިވާވެފައިވެއެވެ. ހަމަކަށަވަރުން ﷲގެ ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ހަދީސް ކުރެއްވިއެވެ. މައްޔިތެއްގެ ކަށި ބިންދުމަކީ އެމީހާ ދިރިހުރިއިރު އޭނާގެ ކަށި ބިންދުން ފަދަ ކަމެކެވެ.އިސްލާމީ ފަތުވާދޭ އެންމެ މަތީ މަޖިލިސް
މީގެ އިތުރުން ގަބުރުސްތާނު ކޮނެގެން ކަށިތައް ނަގާ އެހެންތަނަކަށް ބަދަލުކުރުމަކީ ވަޅުލެވިފައިވާ މީސްތަކުންގެ ހުރުމަތް ކެނޑޭ ކަމެއް ކަމަށް ފަތުވާގައި ބުނެފައިވެއެވެ.
މާނައީ: އަބޫ ހުރައިރާގެ އަރިހުން ރިވާވެފައިވެއެވެ. އެކަލޭގެފާނު ވިދާޅުވިއެވެ. މާތްﷲގެ ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ހަދީސް ކުރެއްވިއެވެ. ތިޔަބައިމީހުންކުރެ މީހަކު އަނދަމުންދާ އަލިފާންގަނޑެއްގެ މަތީގައި އީށީނދެ އޭނާގެ ހެދުން އަންދާލައި އަދި އަލިފާން އޭނާއާ ހަމައަށް ފޯރުމަކީ ގަބުރެއްގެ މަތީގައި އިށީނުމަށްވުރެ އޭނާއަށް މާ ހެޔޮވެގެންވާ ކަމެކެވެ.އިސްލާމީ ފަތުވާދޭ އެންމެ މަތީ މަޖިލިސް
ފަތުވާގައި ބުނީ، މިއީ އިސްލާމީ ޝަރީއަތުގައި ގިނަގުނަ ވައީދުގެ ބަސްފުޅުތައް ވާރިދުވެފައިވާ ކަމަކަށްވާއިރު، ކުޅިވަރުކުޅޭ ތަންތަނާއި ހިތްފަސޭހަ މައިޒާންފަދަ ތަންތަން ހެދުމަށް މުސްލިމުންގެ ގަބުރުސްތާނުތައް އުވާލުން ނުވަތަ ނެގުން ހުއްދަ ނުވާނެ ކަމަށެވެ.
ނަމަވެސް ރާއްޖޭގެ އެކިއެކި ރަށްރަށުގައި ގަބުރުސްތާނުތައް އުވާލާފައިވެއެވެ. އެކަށިތައް ނަގާ އެހެން ދިމާލަކަށް ގެންގޮސް، އެގާޖަތަކުގައި ކުޅިވަރު ކޯޓުތައް ހަދައި ބޭނުންކުރެއެވެ. މީގެ އިތުރުން މާލެސިޓީގައި ވެސް މާފަންނު ސަހަރާ ހުސްކުރުމަށް ފަހު އެ ތަނުގައި ޕާކިން ޒޯނެއް ހަދައި، ބާސްކެޓު ކޯޓެއް ވެސް ތަރައްގީކުރުމުގެ މަސައްކަތް ދަނީ ކުރަމުންނެވެ. އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް މާފަންނު ސަހަރާއިން ބައެއް ހުސްކޮށް ވަނީ އެ ތަނުގައި ޕާކިން ޒޯނެއް ހަދާފައެވެ. އަދި މިހާރު ގަލޮޅު ސަހަރާގެ ބައެއް ހުސްކޮށްގެން ވެސް އެސަރަހައްދު ތަރައްގީ ކުރުމުގެ މަސައްކަތް މާލެސިޓީ ކައުންސިލުން ދަނީ ކުރަމުންނެވެ.
