ގްލޯނެޓް އެޑިއުކޭޝަން ފެއަރ ފަށައިފި
އެޑިއުކޭޝަން ފެއަރ ކުރިއަށްދަނީ ދެދުވަހަށް
ގްލޯނެޓް އެޑިއުކޭޝަން ފެއަރ
ގްލޯނެޓުން އިންތިޒާމު ކޮށްގެން ބާއްވާ 21 ވަނަ އެޑިއުކޭޝަން ފެއަރ ފަށައިފި އެވެ.
މިފެއަރ ކުރިއަށް ދަނީ އޮގަސްޓް 29 ހުން 30 ވަނަ ދުވަހަށެވެ. ފެއަރގައި 14 ޔުނިވަރސިޓީން ބައިވެރިވެ އެވެ.
މިފެއަރ އާއި ގުޅޭ ގޮތުން ގްލޯނެޓްގެ މެނޭޖިން ޑިރެކްޓަރ މުހައްމަދު ނަސީމު އަހުމަދު ވިދާޅުވީ، މިފެއަރގައި އެންމެ ބޮޑަށް ޓާގެޓް ކުރަނީ، މަތީ ތައުލީމު ހާސިލުކުރަން ބޭނުންވާ ފަރާތްތަކާއި ސާނަވީ ތައުލީމު ހާސިލުކުރަމުންދާ ކުދިންނަށް ކަމަށެވެ.
" ފެއަރގައި ބެލެނިވެރިން ވެސް ބައިވެރިވުމަކީ ވަރަށް މުހިއްމު ކަމެއް. ތަފާތު މާހައުލަކަށް ގޮސް ކުދިން ތައުލީމު ހާސިލު ކުރާ އިރު ދާނެ ހަރަދާއި، އެފަދަ މާހައުލެއްގައި އުޅެން ޖެހޭނެ ގޮތް ކުރިއާލާ ދެނެގަންނަން ޖެހޭ. ޒިންމާދާރު ކުދި ބަޔަކަށް ވެއްޖެނަމަ، އަމިއްލަޔަށް ބޭރު ގައުމަކަށް ގޮސް ކިޔަވަން އުޅެން ފަސޭހަވާނެ." ނަސީމު ވިދާޅުވި އެވެ.
ނަސީމު ވިދާޅުވީ، މިފަހަރުގެ ފެއަރ އިން ވެސް ވަރަށް ރަގަޅު ފުރުސަތުތަކެއް މަތީ ތައުލީމު ހާސިލު ކުރުމަށް ލިބިގެންދާނެ ކަމަށެވެ. އެގޮތުން ޑިސްކައުންޓް ސްކީމުތަކުގެ އިތުރަށް، ފެއަރ އަށް އަންނަ ކުދިންގެ ތެރެއިން ދެ ކުދިންނަށް މެލޭޝިޔާގެ ޔުނިވަރސިޓީއަކަށް ގޮސް އެތަނުގެ ކިޔަވައިދިނުމުގެ ކަންކަން އެކްސްޕީރިއެންސް ކޮށްލަން ފުރުސަތު ލިބޭނެ ކަަމަށް އޭނާ ވިދާޅުވި އެވެ.
"ރަގަޅު ނަތީޖާ ލިބިފައިވާ ކުދިންނަށް މިފަހަރުގެ ފެއަރގައި ބައިވެރިވާ ކުދިންނަށް ޑިސްކައުންޓް ސްކިމުތަކެއް ފޯރުކޮށްދެވޭ. އެހެނިހެން ސްކޯލާޝިޕްގެ ފުރުސަތުތަކެއް ވެސް މިފެއަރގެ ތެރެއިން ލިބޭނެ. އަދި ބައެއް ޔުނިވަރސިޓީ ތަކުން 60 ޕަސެންޓާ ހަމައަށް ވެސް ޑިސްކައުންޓް ދިނުމަށް ވަނީ ހަމަޖެހިފައި." ނަސިމު ވިދާޅުވި އެވެ.
ދެ ދުވަހުގެ މުއްދަތަށް ކުރިއަށްދާ މިފެއަރ ހުޅުވާފައި ހުންނާނީ ހަވީރު 05:00 އިން ރޭގަނޑު 10:00 އަށެވެ.
