ކޭ-ޕާކް ރެސިޑެންސީސް މަޝްރޫޢުއާ ގުޅިގެން ދިގުލައިގެން ގޮސްފައިވާ އަދި ހައްލުނުވެ އޮތް ބޯހިޔާވަހިކަމުގެ މައްސަލަ އާއި ގުޅިގެން ރައްޔިތުންގެ މަޖިލީހަށް ޕެޓިޝަނެއް ހުށަހަޅައިފިއެވެ.

މަޖިލީހުގެ ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހިމް (ކުޑޫ)، މަޖިލީހުގެ ރައީސް އަށް މި ޕެޓިޝަނާއި ގުޅޭގޮތުން ފޮނުވި ސިޓީގައި ވިދާޅުވެފައި ވަނީ، އެ ޕެޓިޝަންގެ މައްސަލަ އަކީ ކޭ-ޕާކް ރެސިޑެންސީސް މަޝްރޫޢުއާ ގުޅިގެން ދިގުލައިގެން ގޮސްފައިވާ އަދި ހައްލުނުވެ އޮތް ބޯހިޔާވަހިކަމުގެ މައްސަލަ އާއި ގުޅިގެން ހުށަހެޅި ޕެޓިޝަންއެކެވެ.

އެ ޕެޓިޝަނާއި ގުޅޭ ގޮތުން އޭނާ ވިދާޅުވެފައި ވަނީ ގިނަ އަދަދެއްގެ މަޢުޞޫމު ރައްޔިތުންގެ ދިރިއުޅުމަށް ނޭދެވޭ އަސަރުކޮށްފައިވާ މި ހައުސިންގ މައްސަލައާ ގުޅޭގޮތުން ކަންބޮޑުވުން ފާޅުކޮށް އެކަމަށް އަވަސް ޙައްލެއް ހޯދުމަށް އެދި އެތަނުން އެޕާޓްމަންޓް ބައްލަވައިގެންފައިވާ ފަރާތްތަކުން ކަންބޮޑުވުން ފާޅުކުރަމުންދާ ކަމަށެވެ.

އެހެންކަމުން މިކަންތައްތަކަށް އަވަސް ހައްލެއް، ރައްޔިތުންގެ މަޖިލިސް މެދުވެރިކޮށް ހޯއްދަވައިދެއްވުމަށް މެމްބަރު ކުޑޫ ވަނީ އެދިވަޑައިގަންނަވާފައެވެ.

މަޖިލީހަށް މި ޕެޓިޝަން ހުށަހަޅާފައި ވަނީ 50 މީހުންގެ ސޮޔާއި އެކުގައެވެ.

ޕެޓިޝަން އާއި އެކު ހުށަހެޅި ސިޓީގައި ބުނެފައި ވަނީ ކޭ-ޕާކް ރެސިޑެންސީސް މަޝްރޫޢުއާ ގުޅިގެން ދިގުލައިގެން ގޮސްފައިވާ އަދި ހައްލުނުވެ އޮތް ބޯހިޔާވަހިކަމުގެ މައްސަލަ މަޖިލީހުގެ ސަމާލުކަމަށް ގެންނަން ބޭނުންވާ ކަމަށެވެ. އެގޮތުން ގިނަ އަދަދެއްގެ މަޢުޞޫމު ރައްޔިތުންގެ ދިރިއުޅުމަށް ނޭދެވޭ އަސަރުކޮށްފައިވާ މި ހައުސިންގ މައްސަލައާ ގުޅޭގޮތުން ވަރަށް ކަންބޮޑުވުންތައް ހުރި ކަމަށް ބުނެފައިވެއެވެ.

އެ ޕެޓިޝަން އާއި އެކު ހުށަހެޅި ސިޓީގައި ބުނެފައި ވަނީ ފެށުނީއްސުރެ، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ މި މައްސަލައިގައި ޒިންމާ ނަގަން އިންކާރުކޮށް، އަދި މައްސަލަ ހައްލުކުރުމަށް އެކަށީގެންވާ ފިޔަވަޅެއްވެސް އަޅާފަ ނުވާ ކަމަށެވެ. ހަމައެހެންމެ އެތެރޭގެ ރިވިއުތަކެއް ހަދާނެކަމުގެ ޔަޤީންކަން ތަކުރާރުކޮށް ދީފައިވީ ނަމަވެސް، ދެ އަހަރަށްވުރެ ގިނަ ދުވަސްވެފައިވާއިރުވެސް އެއްވެސް ކުރިއެރުމެއް ލިބިފަ ނުވާކަން އެ ޕެޓިޝަންގައި ފާހަގަކޮށްފައިވެއެވެ.

މީގެ އިތުރުން މިކަމުގެ ސަބަބުން، މި މައްސަލަ ދިގުލައިގެން ސީދާގޮތުންނާއި ނުސީދާގޮތުން އެތަށް ހާސް ޢާއިލާތަކަށް އަސަރުކޮށްފައިވާ ކަމަށެވެ. މި ޢާއިލާތައްކަށް މިހާރު ވަނީ ސީރިއަސް މާލީ، ޤާނޫނީ އަދި ނަފްސާނީ ދަތިތަކާ ކުރިމަތިލާންޖެހިފަ ކަމަށް އެ ޕެޓިޝަންގައި ވެއެވެ.

އެޗްޑީސީ ފަދަ ދައުލަތުގެ ބާރު ލިބިފައިވާ، ވަސީލަތްތައް ތަނަވަސް މުއައްސަސާއަކުން މި މައްސަލައިން އަސަރުކޮށްފައިވާ ފަރާތްތަކަށް އަސާސީ އިންސާފު ނުވަތަ ލުޔެއްވެސް ހޯދައި ނުދީ އޮތުމަކީ ޤަބޫލުކުރެވޭނެ ކަމެއް ނޫން ކަމަށް އެ ސިޓީގައި ވަނީ ބުނެފައެވެ.

ހަމައެހެންމެ އެޗްޑީސީގެ ސީދާ ޒިންމާ މާ ކުޑަ މަޝްރޫޢުތަކެއް ކަމުގައިވާ ޖާހް އިންވެސްޓްމަންޓްގެ "ދަ ގާޑަންސް" ފަދަ މަޝްރޫޢުތަކަށް އެޗްޑީސީއިން ހަރުދަނާ އެހީތެރިކަން ފޯރުކޮށްދެމުންދާތަން ފެންނަމުންދާ ކަމަށް ބުނެފައިވެއެވެ. ކޭ-ޕާކްގެ މައްސަލަތަކަކީ އެޗްޑީސީގެ އަމިއްލަ ގޯސްތަކަކުން ދިމާވެފައިވާ މައްސަލައެއް ކަމަށް ވެސް ވަނީ ބުނެފައެވެ. މީގެ ތެރޭގައި ހިމެނެނީ ބިން ދޫކުރުމުގައި ހުރި މައްސަލަތަކާއި، ރެގިއުލޭޓަރީ ބެލުން ނެތުމާއި، އަދި ޒިންމާދާރުކަމެއް ނެތި ތަކުރާރުކޮށް ސުންގަޑި ފަސްކުރަމުންދިޔަ ކަމަށް ބަޔާންކޮށްފައިވެއެވެ.

" މި ހާލަތަކީ ހަމައެކަނި އިދާރީ ފެއިލްވުމެއް ނޫނެވެ. މިއީ ޤާނޫނުއަސާސީގެ ދަށުން އަދާކުރަންޖެހޭ ވާޖިބުތަކާ ޚިލާފުވުމެކެވެ. ދިވެހިރާއްޖޭގެ ޤާނޫނުއަސާސީގެ 17 ވަނަ މާއްދާގައިވާ ގޮތުން، "ކޮންމެ މީހަކަށްމެ ޤާނޫނުގެ ރައްކާތެރިކަމާއި، ޤާނޫނުން ލިބިދޭ މަންފާތައް ހަމަހަމަކަމާއެކު ލިބުމުގެ ޙައްޤު ލިބިގެންވެއެވެ." ކޭ-ޕާކްގެ ވިކްޓިމުންނަށް މިހާރު ކުރިމަތިވެފައިވާ އިހުމާލު މި އުސޫލާ ޚިލާފުވެ، އަދި ރައްޔިތުން ދައުލަތުގެ މުއައްސަސާތަކަށް ކުރާ އިތުބާރު ގެއްލޭ ގޮތަށް ޢަމަލުކުރެވެމުންދެއެވެ." އެ ސިޓީގައި ވަނީ މި ފަދައިން ބުނެފައެވެ.

މީގެ އިތުރުން، ޤާނޫނުއަސާސީގެ 70 ވަނަ މާއްދާ އަދި 75 ވަނަ މާއްދާގެ ދަށުން، ރައްޔިތުންގެ މަޖިލީހަށް ވަނީ ދައުލަތުގެ މުއައްސަސާތަކުގެ ޢަމަލުތައް ބެލުމުގެ އަދި ހުރިހާ ދިވެހި ރައްޔިތުންގެ ޙައްޤުތަކާއި ދުޅަހެޔޮކަން ކަށަވަރުކުރުމުގެ ސާފު މެންޑޭޓެއް ލިބިދީފައެވެ. އެހެންކަމުން، ޢާންމު މަޞްލަޙަތާއި ޢަދުލު އިންޞާފު ގެއްލިގެންދާ ކަންކަމުގައި އަޅާލައި ފިޔަވަޅު އެޅުމަކީ މަޖިލީހުގެ ޒިންމާއެއް ކަމަށް ވަނީ ބުނެފައެވެ.

އެ ޕެޓިޝަންގައި މަޖިލީހުގެ ކިބައިން އެދިފައި ވަނީ އެޗްޑީސީން މިމައްސަލާއިގަ ހައްލެއް ހޯދާދިން ލަސްކުރަމުންދިއުން ތަޙްޤީޤުކުރުމާއި، މިކަމުގައި ޒިންމާވާންޖެހޭ ފަރާތްތައް ޖަވާބުދާރީކުރުވުމާއި، އަސަރުކޮށްފައިވާ ޢާއިލާތަކުގެ ޤާނޫނުއަސާސީން ލިބިދޭ ޙައްޤުތައް ހިމާޔަތްކޮށް، ޢަދުލުވެރި އަދި އަވަސް ހައްލެއް ހޯދައިދިނުމަށް މަގުފަހިކޮށްދިނުމަށެވެ.