އެއިޑްސް ނައްތާލުމަކީ ބައިނަލްއަގުވާމީ މުޖުތަމަޢު އެކުގައި ގުޅިލާމެހިގެން އަދާ ކުރަންޖެހޭ ޒިންމާ އެއް: ރައީސް މުއިއްޒު
ބައިނަލްއަގުވާމީ މުޖުތަމަޢު އެކުގައި ގުޅިގެން މަސައްކަތް ކޮށްފި ނަމަ 2030 ވަނަ އަހަރު އަންނަންވާއިރަށް ދުނިޔެ އިން އެއިޑްސް ނައްތާލެވޭނެ ކަމަށް ރައީސް ފާހަގަކުރެއްވި
ރައީސް ޑރ. މުހައްމަދު މުއިއްޒު
އެއިޑްސް ނައްތާލުމަކީ ވަކި ޤައުމަކަށް އެކަނި ކުރެވޭނެ މަސައްކަތެއް ނޫން ކަމަށާއި އެއީ ބައިނަލްއަގުވާމީ މުޖުތަމަޢު އެކުގައި ގުޅިލާމެހިގެން އަދާ ކުރަންޖެހޭ ޒިންމާ އެއް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެ އެވެ.
ބައިނަލްއަގުވާމީ އެއިޑްސް ދުވަހުގެ މުނާސަބަތުގައި އެމަނިކުފާނުގެ ރަސްމީ އެކްސް އެކައުންޓު މެދުވެރިކޮށް ހިއްސާކުރެއްވި ޕޯސްޓެއްގައި ވިދާޅުވީ، ބައިނަލްއަގުވާމީ މުޖުތަމަޢު އެކުގައި ގުޅިގެން މަސައްކަތް ކޮށްފިނަމަ 2030 ވަނަ އަހަރު އަންނަންވާއިރަށް ދުނިޔެ އިން އެއިޑްސް ނައްތާލެވޭނެ ކަމަށެވެ. އަދި މިދަތުރަކީ ފަރުދީ ފެންވަރުގައި ފެށެންޖެހޭ ދަތުރެއްގެ ގޮތުގައި އެމަނިކުފާނު ވަނީ ފާހަގަކުރައްވާފަ އެވެ.
މިއަހަރުގެ ބައިނަލްއަގުވާމީ އެއިޑްސް ދުވަހުގެ ޝިޢާރަކީ "އޯވަރކަމިންގ ޑިސްޓްރަޕްޝަން، ޓްރާންސްފޯމިންގ ދަ އެއިޑްސް ރެސްޕޯންސް" އެވެ. މި ޝިޢާރަށް އަލިއަޅުއްވާލައްވައި ރައީސް މުއިއްޒު ވަނީ، އެއިޑްސްގެ ދުޅަހެޔޮކަމާ ދެކޮޅަށް ކުރާ މަސައްކަތުގައި ދިމާވާ ހުރަސްތައް ހައްލުކުރުމަށް ބައިނަލްއަގުވާމީ މުޖުތަމަޢުން އެއްބައިވަންތަކަމާއެކު މަސައްކަތްކުރުމުގެ މުހިންމުކަން ފާހަގަކުރައްވާފަ އެވެ.
ރައީސް މުއިއްޒު ވަނީ މި ދުވަހުގެ މުނާސަބަތުގައި ރާއްޖެއިން ހޯދާފައިވާ ވަރަށް މުހިންމު ކާމިޔާބީ އެއް ފާހަގަ ކުރައްވާފަ އެވެ. އެގޮތުން މަންމައިންގެ ފަރާތުން ތުއްތު ދަރިފުޅަށް އެޗްއައިވީ، ސިފިލިސް އަދި ހެޕިޓައިޓިސް ބީ ވާރުތަވުން ހުއްޓުވައި، "ޓްރިޕްލް އެލިމިނޭޓް" ވި ދުނިޔޭގެ ފުރަތަމަ ޤައުމަކީ ރާއްޖެކަން އެމަނިކުފާނު ފާހަގަ ކުރެއްވި އެވެ.
ރައީސް މުއިއްޒު ވަނީ، އެއިޑްސް ނައްތާލުމުގެ މަސައްކަތުގައި ބައިނަލްއަގުވާމީ މުޖުތަމަޢުން އެކުވެރިކަމާއެކު މަސައްކަތް ކުރުމުގެ މުހިންމުކަން ފާހަގަކުރައްވައި، މި ދާއިރާގައި ރާއްޖެއިން ވެސް ބައިނަލްއަގުވާމީ މުޖުތަމަޢާއެކު ގުޅިގެން މަސައްކަތްކުރަމުން ގެންދާނެކަމުގެ ޔަޤީންކަން ދެއްވާފަ އެވެ.
