ޣައްޒާ ހަނގުރާމައިގައި އިސްރާއީލް އަށް ފުރިހަމަ އެއްބާރުލުން ދޭނެ ކަމަށް ރޫބިއޯ ވިދާޅުވެއްޖެ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، އެމެރިކާ އިން އިސްރާއީލް އަށް ފުރިހަމަ އެއްބާރުލުން ދޭނެ ކަމަށް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

ރޫބިއޯ މިހެން ވިދާޅުވެފައި ވަނީ އޭނާ އިސްރާއީލް އަށް ކުރެއްވި ދަތުރުފުޅުގައި އެ ޤައުމުގެ ބޮޑު ވަޒީރު ބެންޖަމިން ނަތަންޔާހޫއާ އެކު ބޭއްވި ނޫސްވެރިންގެ ބައްދަލުވުމުގަ އެވެ. އެ ބައްދަލުވުމުގައި ރޫބިއޯ ވިދާޅުވީ ހަމާސް ޖަމާއަތް ނައްތާލުމަކީ މުހިންމު ކަމެއް ކަމަށާއި، އެ ހަނގުރާމައިގައި އެމެރިކާ އިން އިސްރާއީލް އަށް ފުރިހަމަ އެއްބާރުލުން ދޭނެ ކަމަށެވެ.

ރޫބިއޯ ވިދާޅުވީ ޣައްޒާގެ ރައްޔިތުންނަށް ރަނގަޅު މުސްތަޤުބަލެއް ހައްގުވާ ކަމަށެވެ. އެހެން ނަމަވެސް، ޣައްޒާގެ ރައްޔިތުންނަށް ބޭނުންވާ ރަނގަޅު މުސްތަޤުބަލު ހޯދޭނީ، ހަމާސް ޖަމާއަތް މުޅިން ބަލިކޮށްގެން ނުވަތަ ނައްތާލައިގެން ކަމަށް ރޫބިއޯ ވަނީ ވިދާޅުވެފަ އެެވެ.

އެ ނޫސްވެރިންގެ ބައްދަލުވުމުގައި އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެފައި ވަނީ، އިސްރާއީލް އަށް ރޫބިއޯ ކުރެއްވި ދަތުރުފުޅަކީ އެމެރިކާ އިން އިސްރާއީލް އަށް ދެމުން އަންނަ އެއްބާރުލުމުގެ ސާފު މެސެޖެއް ކަމަށެވެ. އަދި އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން ލިބެމުން އަންނަ އެހީތެރިކަން ފާހަގަ ކުރައްވައި ނަތަންޔާހޫ ވިދާޅުވީ، އެމެރިކާ އަދި ޓްރަމްޕް އަކީ އިސްރާއީލް އަށް ލިބުނު އެންމެ ރަނގަޅު ރަޙުމަތްތެރިޔާ ކަމަށެވެ.

މީގެ އިތުރުން އެ ބައްދަލުވުމުގައި ރޫބިއޯ ވަނީ، ފަލަސްޠީނުގެ މިނިވަން ދައުލަތް ޤަބޫލު ކުރުމަށް ޔޫރަޕުގެ ބައެއް ޤައުމު ތަކުން ނިންމާފައިވާ ނިންމުމަށް ވެސް ފާޑު ވިދާޅުވެފަ އެވެ. އޭނާ ވިދާޅުވީ، އެއީ ހަމާސް ޖަމާއަތަށް އިތުރު ހިތްވަރު ލިބިގެން ދާނެ ނިންމުމެއް ކަމަށެވެ. އެއީ ހަމައެކަނި ލޯ މައްޗަށް ދައްކާލަން ކުރާ ކަމެއް ކަމަށާއި، ނަމަވެސް އެކަމުގެ ފައިދާ ހަމާސް ޖަމާއަތަށް ލިބިގެން ދާނެ ކަމުގައި ރޫބިއޯ ވިދާޅުވެފައިވެ އެވެ.

ޣައްޒާ ސިޓީ އެއްކޮށް ހިފުމާއި، ފަލަސްޠީނުގެ ދައުލަތެއް ޤާއިމުވިޔަ ނުދިނުމަށް ވެސްޓް ބޭންކުގެ ބައެއް ސަރަހައްދުތައް އިސްރާއީލްއާ އެއްކުރުމުގެ ވާހަކަތަކާ ގުޅޭ ގޮތުން ކުރިއަށް އޮތް ތަނުގައި ނަތަންޔާހޫއާ އެކު މަޝްވަރާ ކުރައްވާނެ ކަމުގައި ރޫބިއޯ ވިދާލުވި އެވެ.

ޣައްޒާ ހަނގުރާމަ ހުއްޓުމަކަށް ގެނައުމަކީ އެމެރިކާގެ ރައީސް ޓްރަމްޕްގެ އެންމެ ބޮޑު އެއް ވައުދެެވެ. އެމެރިކާގެ ރިޔާސީ އިންތިޚާބުގެ ކެމްޕެއިންގައި ވެސް ޓްރަމްޕް ވަނީ އެކަމަށް ވައުދުވެފަ އެވެ. ނަމަވެސް، ޓްރަމްޕްގެ ވެރިކަަމަށް އަށް މަސް ދުވަސް ވެގެން ދިޔައިރު ވެސް، އެކަމުގައި ޓްރަމްޕް އަށް ކާމިޔާބު ހޯދިފައި ނުވާ ކަމަށެވެ.