"ކުރީ ސަރުކާރުން ދޫކުރި ގޯތީގެ ރަޖިސްޓަރީ ބާތިލްކުރީ ޤާނޫނާއި ޚިލާފަށް، ބައެއް މީހުންނަށް ގޯތި ނުލިބުން ވެސް އެކަށީގެންވޭ"
ނިޝާން ވިދާޅުވީ ދައުލަތުގެ އިދާރާތަކުން އެގްރީމެންޓްތަކުގައި ސޮއިކުރުމުގެ މަސައްކަތް ކުރިއަށް ގެންދާ އިރު އޭގައި ޤާނޫނީ ނަޒަރަކުން ބަލާއިރު ބަލައި ނުގަނެވޭ ކަމަށް
ގުޅީފަޅު ރައްޔިތުންގެ އެސޯސިއޭޝަންގެ ނޫސްވެރިންގެ ބައްދަލުވުން
ކުރީ ސަރުކާރުން ދޫކުރި ގޯތީގެ ރަޖިސްޓަރީ އާއި އެއްބަސްވުން ބާތިލު ކޮށްފައި ވަނީ ޤާނޫނީ އުސޫލާއި ޚިލާފަށް ކަމަށް ގުޅީފަޅު ރައްޔިތުންގެ އެސޯސިއޭޝަންގެ ޤާނޫނީ ވަކީލް މުހައްމަދު ނިޝާން އިބްރާހިމް ވިދާޅުވެއްޖެ އެވެ.
އޭނާ އެފަދައިން ވިދާޅުވީ ގުޅީފަޅު ރައްޔިތުންގެ އެސޯސިއޭޝަންގެ ފަރާތުން ބޭއްވި ނޫސްވެރިންގެ ބައްދަަލުވުމުގައި ވާހަކަދައްކަމުންނެވެ.
ކުރީ ސަރުކާރުން ދޫކުރި ގޯތީގެ ރަޖިސްޓަރީ އާއި އެއްބަސްވުން ބާތިލު ކުރުމަށް ފަހު، މި ސަރުކާރުން އައު ރަޖިސްޓަރީ އާއި "ގެދޮރުވެރިން ޕްރޮގްރާމްގެ ދަށުން ބަންޑާރަ ގޯތި ދޫކުރުމުގެ އެއްބަސްވުން" ދޫކުރަން ނިންމާފައިވާކަން ހާމަކުރީ އާއްމު އިއުލާނަކުންނެވެ. ކުރީގެ އެއްބަސްވުންތައް ބާތިލް ކުރީ ގުޅީފަޅު ލޭންޑް ޔޫޒް ޕްލޭނަށް ގެނައި ބަދަލަކާއި ގުޅިގެން ކަމަށް ނިޝާން ވަނީ ވިދާޅުވެފައެވެ.
އެކަމަށް އިޝާރާތް ކުރައްވާ ވާހަކަދައްކަވަމުން، ލޭންޑްޔޫޒް ޕްލޭނަށް ގެނައި ބަދަލަކާއި ގުޅިގެން ގުޅީފަޅުގެ އެގްރީމެންޓްތައް ބާތިލްކުރާ ކަމަށް ސިޓީ އަކުން އަންގާފައި ވީ ނަމަވެސް އެއީ ޤާނޫނާއި އެއްގޮތަށް ކޮށްފައިވާ ކަމެއް ނޫން ކަމަށް ނިޝާން ވިދާޅުވިއެވެ. ނިޝާންގެ ވާހަކައިގައި ވަނީ މި އެއްބަސްވުމުގައި ނުރައްކާތެރި ކަންތައްތަކެއް ހުރި ކަމަށް ފާހަގަކުރައްވާފައެވެ.
ކުރިން އޮތީ މާލެ ސަރަހައްދުގައި 600 އަކަފޫޓަށް ވުރެ ބޮޑު ގޯއްޗެއް އޮތް ނަމަ ދޫކޮށްލަން. ފަހުން ގެނައި އިސްލާހުގައި ބުނަނީ އެ ދާއިރާ ފުޅާކޮށް މުޅި ރާއްޖޭގައި އެއްވެސް ތަނަކުން 600 އަކަ ފޫޓަށް ވުރެ ބޮޑު ނޫން ގޯއްޗެއް އޮތް ކަމަށް އެބަ ބުނޭ. މިއާއި އެކު ޤާނޫނީ ފުށުއެރުންތަކެއް އަންނާނެ. މިހެން ހެދީމަ ބައެއް މީހުންނަށް ގޯތި ނުލިބުން ވެސް އެކަށިގެންވޭ.ޤާނޫނީ ވަކީލް މުހައްމަދު ނިޝާން އިބްރާހިމް
ނިޝާން ވިދާޅުވީ ދައުލަތުގެ އިދާރާތަކުން އެގްރީމެންޓްތަކުގައި ސޮއިކުރުމުގެ މަސައްކަތް ކުރިއަށް ގެންދާ އިރު އޭގައި ޤާނޫނީ ނަޒަރަކުން ބަލާއިރު ބަލައި ނުގަނެވޭ ކަމަށެވެ. ނިޝާން ވަނީ ނިމިދިޔަ ސަރުކާރުން ދިން ގޯތި ލިބުނު މީހުންނަށް ގޯތި ހަވާލުކުރުމަށް ފުރިހަމަ ކުރަން ޖެހޭ ޤާނޫނީ އިޖުރާއަތުތައް ފުރިހަމަކޮށްފައިވާ ކަމަށް ވިދާޅުވެފައެވެ. ރިޔާސީ ދައުރު ބަދަލުވީ އެ ނިންމުން ނިންމާފައި ވަނިކޮށް ކަމަށް ވެސް އޭނާ ވިދާޅުވިއެވެ. ނަމަވެސް ވެރިކަން ބަދަލު ވުމަކީ ދައުލަތަކާއި އެކު ވެފައިވާ ސައްހަ ޤާނޫނީ އެއްބަސްވުމެއް އުވާލެވޭނެ ސަބަބެއް ކަމަށް ޤަބޫލު ނުކުރައްވާ ކަމަށް އޭނާ ވަނީ ވިދާޅުވެފައެވެ.
އެ އެއްބަސްވުމުގައިވާ ކަންކަން އުނިކޮށް އިތުރުކުރަން ވާނީ އެއްބަސްވުމުގައި ހިމެނޭ ދެ ފަރާތުން ވާހަކަދެއްކިގެން ކަމަށާއި އެ ނޫން ގޮތަކަށް އެކަން ނުކުރެވޭނެ ކަމަށް ނިޝާން ވިދާޅުވިއެވެ. އާއްމު އިޖުރާއީ އުސޫލަށް ބަލާއިރު، ސިޓީ އާއި ނޯޓު ފަދަ ލިޔެކިޔުމަކުން ޤާނޫނާއި ޤަވާއިދު ނުވަތަ ޤާނޫނުއަސާސީ އަށް އިސްލާހު ނުގެނެވޭނެ ކަމަށް ވެސް އޭނާ ވިދާޅުވިއެވެ.
