ޑެބިޓު ކާޑުތަކުގެ ޑޮލަރު ލިމިޓު 500 އަށް ބޮޑުކުރުމަކީ ބޮޑު ސްކޭމެއް: މެންބަރު ނާޒިލް
500 ޑޮލަރެއް ކާޑަކަށް ނުލިބޭނެ
ރައްޔިތުން މަޖިލީހުގައި، އެމްޑީޕީ ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވާހަކަދައްކަވަނީ
ޑެބިޓު ކާޑުތަކުގެ ޑޮލަރު ލިމިޓު 500 އަށް ބޮޑުކުރުމަކީ ބޮޑު ސްކޭމެއް ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
ހޯމަ ދުވަހު ކުއްލި ގޮތަކަށް ބީއެމްއެލުން ވަނީ 1 ޖުލައި 2025ން ފެށިގެން އެ ބޭންކުގެ ޑެބިޓު ކާޑުތައް ބޭނުންކޮށްގެން އާންމުކޮށް ދިވެހީން ކުރާ ވިޔަފާރިތަކުން 30 ޕަސެންޓްގެ ފީއެއް ނަގަން ނިންމައި، ކާޑުތަކުގެ ޑޮލަރު ލިމިޓު 500 އަށް ބޮޑުކުރިކަން އިއުލާން ކޮށްފައެވެ. ބީއެމްއެލުން ވަނީ ޑެބިޓު ކާޑުތައް ބޭނުންކޮށްގެން ރާއްޖެއިން ބޭރުގެ އޭޓީއެމްތަކުން ނެގޭ ޑޮލަރުގެ ލިމިޓު ވެސް ކުޑަ ކޮށްފައެވެ. ކުރިން 250 ޑޮލަރު މަހެއްގެ މައްޗަށް ނެގުނު ނަމަވެސް މި ބަދަލާއެކު ދެން ނެގޭނީ 125 ޑޮލަރެވެ. ނަގުދު ފައިސާ ނަގަން ކުރާ ޓްރާންސެކްޝަންތަކަށް 10 ޑޮލަރުގެ އޭޓީއެމް ޗާޖެއް ވެސް ބީއެމްއެލުން ނަގާނެއެވެ.
މި ބަދަލާގުޅޭ ގޮތުން ހޯމަ ދުވަހު ކުރިއަށް ގެންދިޔަ ރައްޔިތުންގެ މަޖިލީހުގެ ޖަލްސާގައި މެންބަރު ނާޒިލް ވިދާޅުވީ ޑެބިޓް ކާޑަށް 500 ޑޮލަރަށް މަތި ކުރެވުނު ވާހަކައަކީ ސަރުކާރުގެ ބޮޑު ސްކޭމެއް ކަމަށެވެ. އަދި 500 ޑޮލަރު ނުލިބޭނެ ކަމަށް މެންބަރު ނާޒިލް ވިދާޅުވިއެވެ.
އާއްމު އުސޫލުން ޑެބިޓް ކާޑު ބޭނުންކޮށްގެން ވިޔަފާރި ކުރާ ތަންތަނުން ކުރާ ވިޔަފާރިތަކުން 30 ޕަސެންޓު އަގުބޮޑުވެއްޖެ. އޭގައި އެބައޮތް ލިޔެފައި ވަރަށް ސާފުކޮށް. އެހެންވީމަ އޭގެ މާނައަކީ 250 ޑޮލަރުގެ ވިޔަފާރި ކޮށްފިއްޔާ 75 ޑޮލަރު 30 ޕަސެންޓުގެ ޓެކްސްއެއްގެ ގޮތުގައި ނޫނިއްޔާ އިތުރަށް އެބޭފުޅުން ނަގާ ފީއެއްގެ ގޮތުގައި ނަގާނެ ވާހަކަ. 500 ޑޮލަރާ ހިސާބަށް ވިޔަފާރި ކުރެވެންޏާ 150 ޑޮލަރުވަރު އެބަ ޗާޖު ކުރޭ. އެހެންވީމަ 500 ޑޮލަރެއް ނުލިބޭނެ. ހަމަ ބޮޑު ސްކޭމެއް އެއީ. އަނެއްކާ ވެސް ބޭންކް އޮފް މޯލްޑިވްސްއިން ރައީސުލްޖުމްހޫރިއްޔާ ބޮލަށް މިފަދަ ބޮޑު އެއްޗެއް ޖަހާލުމަކީ އަޅުގަނޑު ދަންނަވާނީ އަނެއްކާ ބޯޑު ބަދަލުކޮށްލަން ލިބޭ ފުރުސަތަކަށް ވެދާނޭ.ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް
މެންބަރު ނާޒިލްގެ އިތުރުން ގިނަ އާއްމު ރައްޔިތުންގެ ފާޑުކިޔުން ސަރުކާރަށް އަދި ބީއެމްއެލްއަށް ވަނީ އަމާޒުވެފައެވެ.
ބީއެމްއެލްގެ މި ނިންމުމާއެކު، އޮންލައިންކޮށް ވިޔަފާރި ކުރާ އާއްމު ރައްޔިތުނަށް ވަރަށް ބޮޑަށް ދަތިވެ، ރާއްޖެއިން ބޭރުގައި ދިރިއުޅޭ ދިވެހިންނަށް ބޮޑު އަގުގައި ޑޮލަރު ގަންނަން މަޖުބާރުވާނެ ކަމަށް ގިނަ ބަޔަކު ދަނީ ބުނަމުންނެވެ.
މި ސަރުކާރާއެކު ޑޮލަރު ލިބުން ވަރަށް ބޮޑަށް ތާށިވެ، ޑޮލަރުގެ ރޭޓު ވެސް ދަށްނުވެ ދަނީ މައްޗަށް އުފުލެމުންނެވެ. ބޭރު ފައިސާއިން އާމްދަނީ ލިބޭ ވިޔަފާރިތަކުގެ އާމްދަނީ ރާއްޖޭގެ ބޭންކަކަށް ޖަމާކުރުމަށް ގާނޫނުން ލާޒިމް ކޮށްފައިވާއިރު، ޑޮލަރުގެ ރޭޓު ދަށެއް ނުވެއެވެ. އަދި ގާނޫނުން އެބަދަލު ގެނައުމާ ގުޅިގެން ޑޮލަރު ލިބޭ މިންވަރު އިތުރުވެ، ބޭންކިން ނިޒާމު ހަރުދަނާވަމުންދާ ކަމަށް ސަރުކާރުން ބުނެއެވެ. ނަމަވެސް ރާއްޖޭގެ ރައްޔިތުންނަށް ޑޮލަރު ނުލިބި ބްލެކް މާކެޓުގައި 19 ނުވަތަ 20 ރުފިޔާއަށް ޑޮލަރު ގަތުމަށް ވަނީ މަޖުބޫރުވެފައެވެ.
