ފުޅަނދުބުރާއި މިނިވަންދުވަހުގެ ޚާއްސަ ޖަލްސާ ކެންސަލް
މިއަހަރު އޮންނާނީ ދިދަ ނެގުމުގެ ހަރަކާތް އެކަނި
ފުޅަނދުބުރު
މިއަހަރުގެ މިނިވަން ދުވަހާ ގުޅުވައިގެން ހޯމް މިނިސްޓްރީން ކުރިއަށްގެންދާނީ ހަމައެކަނި ދިދަ ނެގުމުގެ ހަރަކާތް ކަމުގައި އެ މިނިސްޓްރީން ބުނެފިއެވެ.
ހޯމް މިނިސްޓްރީގެ ކޮމިއުނިކޭޝަން ޑިރެކްޓަރ ހަފްސީ އަބްދުﷲ ރާއްޖެއެމްވީއަށް ވިދާޅުވީ ދިދަ ނެގުމުގެ ހަރަކާތް ފިޔަވައި އެހެނިހެން ހަރަކާތްތައް ކެންސަލް ކުރަން ނިންމާފައިވާކަމަށެވެ. އެ ނިންމުން ނިންމާފައިވަނީ ރައީސް އޮފީހުގެ ލަފާގެ މަތިން ޚަރަދު ކުޑަކުރުމުގެ ގޮތުން ކަމަށް ހަފްސީ ވިދާޅުވިއެވެ.
ދިދަ ނެގުމުގެ ރަސްމިއްޔާތު އޮންނާނީ ޖުލައި 26 ވާ އަންގާރަ ދުވަހުގެ ހެނދުނު 6:00 ގައި ޖުމްހޫރީ މައިދާނުގައެވެ.
މިއަހަރުގެ މިނިވަން ދުވަހާ ގުޅިގެން ފުޅަނދުބުރު ބާއްވަން ހަމަޖެހިފައިވާކަމަށް ހޯމް މިނިސްޓްރީން މީގެ ކުރިން ބުނެފައިވެއެވެ. އެހެންނަމަޗެސް ފުޅަނދުބުރާއި، އާންމުގޮތެއްގައި މިނިވަންދުވަހު ބާއްވާ ޖަލްސާވެސް މިއަހަރު ނޯންނާނެއެވެ.
ޚަރަދު ކުޑަކުރުމުގެ ގޮތުން މި ހަރަކާތްތައް ކެންސަލް ކޮށްފައިވާއިރު، ފިނޭންސް މިނިސްޓަރު އިބްރާހިމް އަމީރު ވަނީ ޚަރަދު ކުޑަކުރުމަށް ފިޔަވަޅުތަކެއް އަޅަންޖެހޭކަމަށް މީގެ ކުރިން ވިދާޅުވެފައެވެ. ދުނިޔޭގެ އިގްތިސާދަށް ކުރާ އަސަރު ރާއްޖޭގެ އިގްތިސާދަށްވެސް ކުރަމުންދާކަމަށް މިނިސްޓަރު ވިދާޅުވިއެވެ.
