ވެރިކަން ކުރުމުގެ ބާރާއި މަޖިލީހުގެ ފުރިހަމަ އަގުލަބިއްޔަތާއެކު ވަރަށް ހަމަޖެހިގެން ވެރިކަން ކުރަމުން އައި މި ސަރުކާރު ޑިފެންސަށް ފައިބަން ފަށައިފިއެވެ. ކޮންމެއަކަސް ޑިފެންސަށް ފައިބަން ޖެހޭ ސަބަބުތައް ވަރަށްވެސް ގިނައެވެ. ބޮޑު ތާއީދެއް ލިބި ވެރިކަމަށް އައީ ވައުދުތަށް ގޯނި ގޯނީގައި ތުން އައްސާ ބަރާ ކޮށްގެންނެވެ. އެންމެންނަށް ފެންނާނެހެން ފޮތް ފޮތުގައި ލިޔެގެންނެވެ. ބަދުނާމު ވަނީ އެކި އެކި ދާއިރާތަކުގެ މެންބަރުންނެވެ. ރާއްޖޭގެ ރައީސުލްޖުމްހޫރިއްޔާ އިންނަވަނީ ބާބުލާލު ހެދިފައި އެނބުރޭ ގޮނޑީގައެވެ.

މުއިއްޒު ހިތުހުރި ގޮތަކަށް ކަންތައް ކުރަމުންދަނީ ރައްޔިތުންގެ މަޖިލީހުގެ މެންބަރުންގެ ގޮތުގައި ތިބި ޕީއެންސީ މެންބަރުން ފިތިފައި ތިބޭތީ ކަމަށް ބުނަމުންދާ އަޑު ދަނީ ގަދަވަމުންނެވެ. އަމިއްލަ ބާރު އަމިއްލައަށް ކަނޑުވާލައިގެންތިބެ މުއިއްޒު އެޅިހާ ބަތަކަށް ރިހަވެގެން އުޅޭ އަށްޑިހަ ވަރަކަށް މެންބަރުންނަކީ ރައްޔިތުންނަށް މިއަދު ޖެހެމުން މިދާ ގިލަންވެރި ކަމުގެ މައިގަނޑު ސަބަބެވެ.

ދައުލަތް ދަވާލުމުގައި މުއިއްޒުގެ ހަގީގީ ބައިވެރިންނަކީ ޕީއެންސީއަށް ނިސްބަތްވާ މަޖިލިސް މެންބަރުންނެވެ. މިނިވަން މުއައްސަސާތަކުގެ ބާރު ކަނޑުވާލާ ދަތްނެތް ސިންގާ ތަކަކަށް އެ މުއައްސަސާތަށް ހަދާދީގެން އުޅެނީވެސް މިބުނާ މެންބަރުންނެވެ. ފަނޑިޔާރުގެ މުއިއްޒުގެ ގޮނޑިކޮއްކޮއަކަށް ހަދައިދެނީވެސް އެ މެންބަރުންނެވެ.

ދައުލަތުގެ ބަޖެޓުން ބައި އަޅައިގެން ދައުލަތުގެ މިލްކިއްޔާތު ބަހާލައި ކައިހުސްކުރަނީވެސް މެންބަރުންނަށް ބައިއެޅިގެންނެވެ. ދާއިރާއަށް ކަމެއް ނުކޮށްދީވެސް އަމިއްލަ ޖީބުތައް ފުރާލެވޭތީ ދާއިރާގެ ހައްގުގައި ޗުއްޕުވެސް ނުބުނެ އެތިބެނީ ހިނިއައިސްފައެވެ. ދާއިރާގެ ރައްޔިތުންނަށް ހައްގު މިންވަރަކީ ހަމައެކަނި އާސަންދަ ކަމުގައި ދެކިގެން ދައުލަތް ކައި ހުސްކުރާ މެންބަރުންގެ ލަދު ހަޔާތުގެ ކަންފުޅެއްވެސް ހަމަ ނެތީތާއެވެ.

މަޖިލީހުގެ ކަންކަން މުއިއްޒު ބުނާގޮތަށް ތަރުތީބުކޮށްދޭނެ މީހަކު ހުރެއެވެ. ކުރި ބޯށީގައި އަބްދުއް ރަހީމް ބައިންދާފާ އިނަސް މުޅި ގޭމް ޕްލޭން ރާވަނީ މުއިއްޒު އެވެ. އިންނަމާދޫ މާވަޑި ފަލާހު މޫނުމައްޗަށް ނެރެ ދައްކާފައި ބަހައްޓައިގެން ރާރާގުޑި ހައްދާފައި މީހުނާ ކުރިމަތިލާން ބަޔަކުތިބެއެވެ. ވައި އަނބުރަން ނެރެފައި ތިބެނީ ހޯރަފުށީ މުހައްމަދާއި ބާރަށު ޝުޖާއު ކަހަލަ ދެތިން މައިކެވެ.

ގާނޫނީ އޮނިގަނޑު ރޫޅާލާ ޝަރުއީ ނިޒާމް މުއިއްޒުގެ އަންބޮޑިއަށް ޖަހާދިނުމުގައި އިތުރު ގޮތެއް ނެތް އެމަނިކުފާނުގެ ބޯއީސް ހިދުމަތުގައި ތިބެއެވެ. ޖުމްލަކޮށް ޕީއެންސީއަށް ނިސްބަތްވާ ހުރިހާ މެންބަރުންހެން އެތިބީ ކޮށްގެން ތިބި ހުވަޔާ ހިލާފަށް ރައްޔިތުން ދޫކޮށް މުއިއްޒަށް ބޯލަނބާ ކިޔަމަން ގަތުމަށް ބައިއަތު ހިފައިގެންނެވެ.

ކޯމަހު ކުރީ އައިނަކަށް އެރިގެންއުޅޭ މަސްދޯންޏެކޭ މި މެންބަރުންނެކޭ ތަފާތެއްނެތެވެ. ފަސް އަހަރު ދުވަހަށް ނަގާނެ ވަރަކަށް ނަގަން ލިބިފައި އޮތް ރަންވަޅަކަށް މަޖިލިސް މެންބަރުކަން ވަނީ ހަދާފައެވެ. އިންސާނީ ކަރާމާތެއް ދުނިޔަވީ ހަމައެއް ގޮތެއް ފޮތެއް ހަލާލެއް ހަރާމެއް ބެލުމެއްނެތެވެ. ދިނީމާ ހިފަނީ ބިރަކާ ނުލައެވެ. މުޢިއްޒު ބުންޏަސް އެއީ ހަމަ ތެދެކެވެ. ދިމްޔާތުން އެކި ކުލަ ކުލައިގެ ދަބަހަސް ނެރޭތަން ފެންނަމީހުން މަދެއް ނޫނެވެ. މަޖީލުހުގެ މެންބަރުންނާއި ވަޒީރުން ހަނީމޫނަށް ދަނީ ދިމްޔާތަށް ބާވައޭވެސް ހިތަށްއަރައެވެ.

މި ފަދަ އެތަށް ކަމެއް ބޮސްމޭން ރައީސް މުޢިއްޒުގެ ފުށުން ފެންނަން އެބަހުއްޓެވެ. ކޮނުނުކޮނުނުހެން ގިނަވާނީ ފަހެވެ. މި ހިސާބުން މި ވަގުތަށް ކުރުކޮށް ލާނަމެވެ.