ދިއްގަރުން ހިއްކި ސަރަހައްދު ހިމާޔަތް ކުރުމުގެ އެއްވެސް މަސައްކަތެއް ކުރިއަށް ނުދޭ: ކައުންސިލްގެ ރައީސް
ކުރީ ސަރުކާރުގައި ކުރިއަށް ގެންދިޔަ އެންމެ މުހިންމު މަޝްރޫއަކީ ބިން ހިއްކުމުގެ މަޝްރޫއު
މ. ދިއްގަރު
މ. ދިއްގަރު ބިން ބޮޑު ކުރުމުގެ މަޝްރޫއުގެ ރިވެޓްމަންޓު ޖެހުމާއި، އެސަރަހައްދު ހިމާޔަތް ކުރުމުގެ މަސައްކަތް ކުރިއަށް ނުދާ ކަމަށް އެރަށު ކައުންސިލްގެ ރައީސް އަހުމަދު ނިޝާން ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން، ނިޝާން ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އެރަށުގައި ކުރިއަށް ގެންދިޔަ އެންމެ މުހިންމު އަދި އެންމެ ބޮޑު މަޝްރޫއަކީ ބިން ބޮޑު ކުރުމަށް ކުރިއަށް ގެންދިޔަ ބިން ހިއްކުމުގެ މަޝްރޫއު ކަމަށެވެ.
ނިޝާން ވިދާޅުވީ ދިއްގަރު ބިން ހިއްކުމުގެ މަޝްރޫއުގެ ދަށުން، އެ ރަށަށް 25 ހެކްޓަރުގެ ބިން އިތުރުކޮށްފައިވާ ކަމަށާއި، ބިން ހިއްކާ ނިންމި ނަމަވެސް އެ ސަރަހައްދު ހިމާޔަތް ކުރުމަށް ރިވެޓްމަންޓް ޖެހުމާއި ބޭރުތޮށިލުމުގެ މަސައްކަތް ކުރިއަށް ނުދާ ކަމަށެވެ.
މި މަސައްކަތްތައް ކުރިއަށް ގެންދިއުމަށް ސަރުކާރުން އެކިއެކި ތަރީހުތައް ދިން ނަމަވެސް މަސައްކަތް ފެށިފައިނުވާ ކަމަށް އޭނާ ވިދާޅުވިއެވެ. މަސައްކަތް ކުރިއަށް ނުދާ ސަބަބަށް އިޝާރާތްކޮށް ނިޝާން ވިދާޅުވީ ހިލަ ލިބުމުގައި ދަތިވެފައިވާ ކަމަށް ސަރުކާރުން މައުލޫމާތު ދީފައިވާ ކަމަށާއި، ބާރު ސްޕީޑްގައި މަސައްކަތްތައް ކުރިއަށްދާނެ ދުވަހެއް ނޭނގޭ ކަމަށެވެ. ނަމަވެސް ކުރީ ސަރުކާރުގައި ބޭރުގެ ބޯޓުތައް ހިލަ ހިފައިގެން އެރަށަށް އައި ނަމަވެސް މިސަރުކާރުގައި ދޭތެރެއަކުން ހިލަ ގެންނަނީ ރާއްޖޭގެ އެހެން ރަށަކުން ކަމަށް ނިޝާން ވިދާޅުވިއެވެ.
ދެން އަޅުގަނޑުމެން ވަރަށް ބޮޑަށް އުންމީދުކުރިން 2023 ހާ ހަމައަށް އެމަސައްކަތް ނިމިގެންދާނެ ކަމަށް. އެހެންނަމަވެސް އެކި ސަބަބުތައް ދިމާވެ 2023 ގައި ވެސް ނުނިމުނު. ދެން ހުރިހާ ރައްޔިތުން ވެސް އުންމީދުކުރި 2024 ގައި ނިމޭނެ ކަމަށް. ދެން އޭރު ޔަގީންކަން ވެސް އަޅުގަނޑުމެންނަށް ދެއްވާފައިވަނީ. އެހެންނަމަވެސް އަދިވެސް މިދަނީ މަޑުޖެހެމުން. ވެލިއަޅާ ނިމިފައި. ރިވެޓްމަންޓް ޖެހުން އޮތީ. މައުލޫމާތު ލިބޭ ގޮތުގައި ހިލަ ލިބުމުގައި ދަތިތަކެއް އެބަ ދިމާވޭ. މިދޭތެރެއިން ވަރަށް ގިނަ ތާރީހުތަކެއް އަޅުގަނޑުމެންނަށް ދެއްވައިފި. މިއަހަރު ފެނުނުއިރު ޖެނުއަރީ، ފެބްރުއަރީ، މާރޗް، އޭޕްރީލް، މެއި އަނެއްކާ ޖޫން މިހެން ގޮސް އޯގަސްޓާ ހަމައަށް އެބަ އޮތް ޑޭޓްތައް ދީފައި.ދިއްގަރު ކައުންސިލްގެ ރައީސް އަހުމަދު ނިޝާން
ދިއްގަރު ބިން ހިއްކުމުގެ މަޝްރޫއުގެ ކުރިއަށް ގެންގޮސްފައިވަނީ އެމްޓީސީސީއާ ހަވާލުކޮށްގެންނެވެ. 16 ސެޕްޓެންބަރު 2023 ގައި ބިން ހިއްކާ ނިންމާފައިވާއިރު، މިއަދާ ހަމައަށް އިތުރު މަސައްކަތެއް އެ ސަރަހައްދުގައި ކޮށްފައިނުވެއެވެ. ދިއްގަރަކީ 9.9 ހެކްޓަރުގެ ބިމެއް އޮންނަ ރަށެކެވެ. ނަމަވެސް ބިން ހިއްކުމާއެކު، 34.9 ހެކްޓަރުގެ ރަށް ވަނީ ބަދަލުވެފައެވެ. މި މަޝްރޫއާއެކު އެރަށަށް ދިމާވެފައިވާ ބިމުގެ ދަތިކަމުގެ މައްސަލައަށް ބޮޑު ހައްލެއް ވަނީ ލިބިފައެވެ. ނަމަވެސް އެރަށުގައި ތަރައްގީގެ މަޝްރޫއުތައް ކުރިއަށް ނުދާތީ އެކަމުގެ ކަންބޮޑުވުން ރައްޔިތުން ފާޅުކުރެއެވެ.
