ރެއާލް އިން ކޯޓުއާގެ އެއްބަސްވުން އައު ކުރަނީ

ސްޕެއިންގެ ރެއާލް މެޑްރިޑަށް ކުޅެމުން އަންނަ ބެލްޖިއަމްގެ ގޯލު ކީޕަރު ތިބައޫ ކޯޓުއާގެ އެއްބަސްވުން އައު ކުރުމުގެ މަސައްކަތް އެ ކުލަބުން ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ޗެލްސީ ދޫކޮށްލުމަށް ފަހު، އުމުރުން 33 އަހަރުގެ ކޯޓުއާ ރެއާލަށް ބަދަލުވީ 2018 ވަނަ އަހަރު އެވެ. ރެއާލްގެ އެއްބަސްވުން އެންމެ ފަހުން ކޯޓުއާ އައު ކޮށްފައި ވަނީ 2021 ވަނަ އަހަރު އެވެ. އެ އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރު އެވެ.

ކޯޓުއާގެ އެއްބަސްވުމުގައި ބާކީ އެއް އަހަރު އޮތްއިރު، މީޑިއާ ތަކުގައި ބުނެފައިވާ ގޮތުން ރެއާލް އިން މަސައްކަތް ކުރަމުން އަންނަނީ އޭނާގެ އެއްބަސްވުން އައު ކުރުމަށެވެ. އެގޮތުން ރެއާލް އިން އަންނަނީ އެކަމާ ގުޅުން ހުރި މަޝްވަރާތައް ކޯޓުއާ އެކު ކުރިއަށް ގެންދަމުން ކަމަށާއި، އޭނާ ވެސް ހުރީ ރެއާލްގައި ހުންނަން ބޭނުންވެފައި ކަމަށް ވެސް ބުނެފައިވެ އެވެ.

މީގެ އިތުރުން މީޑިއާ ތަކުގައި ބުނެފައިވާ ގޮތުން، ކުރިއަށް އޮތް ޖުލައި މަހުގެ ތެރޭގައި ރެއާލް އިން ކޯޓުއާ އަށް އައު އެއްބަސްވުން ހުށަހަޅާނެ އެވެ. އަދި އެއަށް ފަހު އައު އެއްބަސްވުމުގައި ސޮއި ކުރުމުގެ ކަންކަން ކުރިއަށް ގެންދާނެ ކަމަށް ލަފާ ކުރެވޭ ކަމަށް މީޑިއާ ތަކުގައި ބުނެފައިވެ އެވެ.

ބައެއް މީޑިއާ ތަކުގައި ބުނެފައިވާ ގޮތުން ރެއާލް އިން ކޯޓުއާ އަށް ހުށަހަޅަނީ ދެ އަހަރު ދުވަހުގެ އައު އެއްބަސްވުމެކެވެ. އެހެން ވެއްޖެ ނަމަ، 2028 ވަނަ އަހަރާ ހަމަ އަށް އޭނާ އެ ކުލަބުގައި މަޑު ކުރާނެ އެވެ.

ކޯޓުއާ ވަނީ ރެއާލާ އެކު މިހާތަނަށް ހަތް ސީޒަން ހޭދަކޮށްފަ އެވެ. އެ މުއްދަތުގެ ތެރޭގައި އޭނާ ވަނީ ރެއާލަށް 283 މެޗުގައި އެ ޓީމުގެ ގޯލު ބަލަހައްޓައިފަ އެވެ. އެ ކުލަބާ އެކު އޭނާ ވަނީ 12 ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު، ކޮޕާ ޑެލް ރޭ، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް، ފީފާ ކުލަބު ވޯލްޑް ކަޕް އަދި ފީފާ އިންޓަކޮންޓިނެންޓަލް ކަޕް ހިމެނެ އެވެ.

ރެއާލްގައި މި ފަހުން ކޯޓުއާ އަށް ކޮންމެ ވެސް ވަރެއްގެ އަނިޔާގެ މައްސަލަތަކެއް ދިމާވެފައިވެ އެވެ. 2023 ވަނަ އަހަރު ލިގަމެންޓުގެ އަނިޔާއާ ގުޅިގެން ގިނަ ދުވަސްތަކެއް ވަންދެން ކުޅުމާ ދުރުގައި ހުރުމަށް ފަހު، އަލުން އެނބުރި ކުޅުމެ ތެރެއަށް އައިތާ ގިނަ ދުވަސްތަކެއް ނުވެ އަނެއްކާ ވެސް އޭނާ އަށް އަނިޔާވި އެވެ.