ކުރީ ސަރުކާރުން ތަރައްޤީކުރަން ފެށި، 4000 ފްލެޓްގެ މަސައްކަތް ކުރިއަށްދާ ގޮތް ރައީސް ބައްލަވާލައްވައިފި
ކުރީގެ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމުން ފްލެޓް ލިބޭނެ ކަމަށް އެ ސަރުކާރުން ނެރެފައިވާ ލިސްޓުން ގާތްގަނޑަކަށް 700 މީހުން އުނިވާނެ ކަމަށް ހައުސިންގ މިނިސްޓަރ ޑރ. އަބްދުﷲ މުއްތަލިބު ވަނީ ވިދާޅުވެފަ
ހުޅުމާލޭ 2 ވަނަ ފިޔަވަހީގައި ތަރައްޤީކުރަމުންދާ 4000 ފްލެޓްގެ މަސައްކަތް ކުރިއަށްދާ ގޮތް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބައްލަވާލެއްވުން
ނިމިދިޔަ ސަރުކާރުން ތަރައްޤީކުރަން ފެށި ބޯހިޔާވަހިކަމުގެ މަޝްރޫޢޫތަކުގެ ތެރެއިން، ހުޅުމާލޭ 2 ވަނަ ފިޔަވަހީގައި ތަރައްޤީކުރަމުންދާ 4000 ފްލެޓްގެ މަސައްކަތް ކުރިއަށްދާ ގޮތް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ބައްލަވައިލައްވައިފިއެވެ.
ރައީސް ވަނީ މި ފްލެޓްތައް ޢިމާރާތްކުރުމުގެ މަސައްކަތް ކުރިއަށްދާ ސަރަޙައްދުތަކަށް ބުރާސްފަތި ދުވަހު ޒިޔާރަތްކުރައްވާ އެ މަޝްރޫޢާ ބެހޭ އެންމެ ފަހުގެ މައުލޫމާތު އޮޅުންފިލުއްވާފައެވެ.
4000 ފްލެޓް ތަރައްޤީކުރުމުގެ މަސައްކަތުގެ ދުވެލި އަވަސްކުރަން މި ސަރުކާރުން މަސައްކަތްކުރަމުންދާ ކަމަށް ބުނެ އެކަމުގެ ކްރެޑިޓް ރައީސް ޑރ.މުއިއްޒު އަށް ދިން ނަމަ ވެސް މި މަޝްރޫޢު ކުރިއަށް ގެންދިއުމަށް ހަމަޖައްސަން ޖެހޭ ހުރިހާ ކަމެއް ނިމިދިޔަ ސަރުކާރުން ވަނީ ހަމަޖައްސާފައެވެ. އަދި ނިމިފައިވާ ފްލެޓްތައް ވެސް އާއްމުންނާއި ހަވާލު ނުކޮށް ވާތީ އާއްމުންގެ ފާޑުކިޔުން ސަރުކާރަށް ވަނީ އަމާޒުވެފައެވެ.
ރިޔާސީ އިންތިޚާބުގެ ތެރޭގައި ރައީސް ޑރ.މުހައްމަދު މުއިއްޒު ވައުދުވެވަޑައިގަތީ ނިމިދިޔަ ސަރުކާރުން ދިން ފްލެޓްތަކާއި ގޯތި ދިން ތަނަކުން ދިން ގޮތަަކަށް އާއްމުންނާއި ހަވާލުކުރުމަށެވެ. ނަމަވެސް ކުރިން ފްލެޓް ލިބުނު ކަމަށް ކަނޑައެޅި ތެރެއިން ބައެއް ފަރާތްތަކަށް ފްލެޓް ނުލިބޭކަން ފާހަގަކޮށްލެވެއެވެެ.
ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި އިމާރާތް ކުރަން ފެށި 'ގެދޮރުވެރިޔާ' ސްކީމްގެ 4،000 ފްލެޓް މަޝްރޫއު އަށް ކުރިމަތިލި ފަރާތްތަކުގެ ތެރެއިން ފްލެޓް ލިބުނު ކަމަށް ކުރިން ކަނޑައެޅި ބައެއް ފަރާތްތަކަށް، ޝަރުތު ފުރިހަމަ ނުވާ ކަމަށް ކަނޑައަޅާ ފަރާތްތަކަށް ހައުސިންގ މިނިސްޓްރީން އެކަން އަންގަން ވަނީ ފަށާފައެވެ.
ކުރީގެ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމުން ފްލެޓް ލިބޭނެ ކަމަށް އެ ސަރުކާރުން ނެރެފައިވާ ލިސްޓުން ގާތްގަނޑަކަށް 700 މީހުން އުނިވާނެ ކަމަށް ހައުސިންގ މިނިސްޓަރ ޑރ. އަބްދުﷲ މުއްތަލިބު ވަނީ ވިދާޅުވެފައެވެ.
އެ ގޮތުން އެ ލިސްޓުގައި 391 ދެމަފިރިންނާއި، ގޯތި ނުވަތަ ފްލެޓް އޮތް 302 މީހަކު ހިމެނޭ ކަން މިނިސްޓަރު ފާހަގަ ކުރެއްވިއެވެ. އަދި ބިންވެރިޔާ ސްކީމުގެ ދަށުން ގޯތި ލިބުނު 305 މީހަކު ހިމެނޭ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވެފައި ވަނީ ކުރީ ސަރުކާރުން އާންމުކުރި ލިސްޓުގައި ދެމަފިރިން ހިމެނިފައިވާ ނަމަ ފްލެޓު ލިބޭނީ ކޮންމެވެސް އެކަކަށް ކަމަށާއި ބިންވެރިޔާ ސްކީމުގެ ދަށުން އެ މީހެއްގެ އަނބިމީހާ ނުވަތަ ފިރިމީހާ އަށް ގޯތި ލިބިފައި ވާނަމަ އެ މީހަކަށް ފްލެޓު ލިބޭނީ އެ ގޯތި ދޫކޮށްލަން އެއްބަސްވުމުން ކަމަށެވެ.
