ކުލަގަދަ ހަފްލާއަކާއެކު ނަހުލާގެ "ސޮރީ" ޕްރިމިއަރކޮށްފި
18 ޖޫން 2025 | ބުދަ 14:10"ސޮރީ" ފިލްމު އެޅުވުމުގެ ކުރިން ނަހުލާ ވަނީ ބެލުންތެރިންނަށް ދޭ ހަދިޔާއެއްގެ ގޮތުން ދެން އެންމެ އަވަހަށް ނެރޭނެ ދިވެހި ފިލްމު "ގިސް"ކަން އިއުލާން ކޮށްފަ
ދިވެހި ފިލްމު "ސޮރީ" ޕްރމިއަރގެ ތެރެއިން
ކުލަގަދަ ހަފްލާއަކާއެކު އޮލިމްޕަހުގައި ނަހުލާގެ "ސޮރީ" ޕްރިމިއަރކޮށްފިއެވެ.
މި ފިލްމު ރަސްމީކޮށް ޕްރިމިއަރކޮށްދެއްވީ ތަފާތު ގިނަ ފިލްމުތަކެއް ދިވެހިންނާ ހަމައަށް ގެނެސްދެއްވި ތަޖުރިބާކާރު ޑައިރެކްޓަރ މުޙައްމަދު މުސްތަފާ ޙުސައިންއެވެ.
މި ފިލްމު ސްކްރީނަށް މިއަންނަނީ މުޅިން އާ ރެކޯޑެއްގާއިމުކުރަމުންނެވެ. އެގޮތުން މިހާތަނަށް މި ފިލްމުގެ ޖުމްލަ 18ޝޯގެ ޓިކެޓްވަނީ ވިކިހުސްވެފައެވެ. އަދި މިހާރުވިކެމުންދަނީ 19ވަނަ ޝޯގެ ޓިކެޓްކަމަށް ފިލްމުގެ ޑައިރެކްޓަރ އަދި ޕްރޮޑިއުސަރ ނަހުލާ ބުނެއެވެ.
މިއީ މިހާތަނަށް ދިވެހިފިލްމެއް ރިލީޒްކުރުމުގެ ކުރިން މިހާގިނަ ޝޯތަކެއް ހައުސްފުލްވި ފުރަތަމަފަހަރު ކަމަށް މައުލޫމާތުލިބެއެވެ. އަދި "ސޮރީ" މި ފިލްމަކީ ލޯބީގެ އަސަރުގަދަ ވާހަކައެއްގެ މައްޗަށް ބިނާކޮށް އުފައްދާފައިވާ ފިލްމެކެވެ. ބޮޑު ކާސްޓަކާއެކު އުފައްދާފައިވާ މި ފިލްމުން ރާއްޖޭގެ ފިލްމީ ދާއިރާގައި އެންމެ ފާހަގަ ކޮށްލެވޭ މަޝްހޫރު ތަރިން ކަމަށްވާ ޔޫސުފް ޝަފީޢު(ޔޫއްޕެ)، އައްޒަ، މަރިޔަމް ނިޝާ، ޝީލާ ފަދަ ތަރިން ފެނިގެންދާނެއެވެ. ފިލްމު ޕްރިމިއަރ ކުރުމަށް ބޭއްވި ޙަފްލާގައި ހުރިހާ ކާސްޓުން ބައިވެރިވިއެވެ.
މި ފިލްމު ޕްރްމިއަރ ކޮށްފައިވަނީ މީގެ 16 އަހަރު ކުރިން ގެނެސްދިން ދިވެހި ފިލްމު ޔޫސުފްގެ ރެކޯޑު މުގުރުމުގެ އުންމީދުގައިކަމަށް ނަހުލާގެ އިންޓަވިއުތަކުގައި ބުނެފައިވެއެވެ.
ރާއްޖެ އިމްވީއަށް ދެއްވި އިންޓަވިއުއެއްގައި މަޝްހޫރު ތަރިއެއް ކަމަށްވާ ޔޫސުފް ޝަފީޢު(ޔޫއްޕެ) ބުނީ، މިހާރުވެސް މި ފިލްމު ކާމިޔާބުވެފައިވާކަމަށާއި ބެލުންތެރިންގެ ތަރުހީބާއި ލޯބި ލިބިއްޖެކަމަށެވެ.
އެންމެ މުހިންމު ކަމަކީ ހަގީގަތުގައި މިދަނޑިވަޅުގައި ފާހަގަކޮށްލަން ބޭނުންވަނީ ޒަމާންތަކަށްފަހު އަނެއްކާވެސް ނަހޫގެ ފިލްމެއް ސިނެމާއަށް އައުން އެއީ މުޅި ފިލްމު އިންޑަސްޓްރީއަށް ލިބޭ ކުރިއެރުމެއްކަމަށް ގަބޫލުކުރެވެނީ، އަދި ހާއްސަ ގޮތޮއްގައި މިހާރު ބަޔަކު ގަބޫލުކުރިޔަސް ނުކުރިޔަސް އޯޑިއަންސް ވަނީ ކޮންމެސް ވަރަކަށް ގެއްލިފަ ލޯބީގެ ފިލްމްތައް މަދުވީމަ، އެހެންވީމަ އަނެއްކާވެސް މާޔޫސްވެފަތިބި އޯޑިއަންސާއި އެއްކޮށް ފިލްމު އިންޑަސްޓްރީގެ ފިލްމްތައް އިރާދަކުރެއްވިއްޔާ ކުރިއަށްދާނެ ކަމަށް މިބަލަނީ، އެހެންވީމަ ނަހޫގެ މި ފެށުމަކީ ފިލްމު އިންޑަސްޓްރީއަށް ލިބުނު ބޮޑު ކުރިއެރުމެއް ކަމަށް ގަބޫލުކުރަނީ،ޔޫސުފް ޝަފީޢު (ޔޫއްޕެ)
ކާމިޔާބު ފިލްމުތަކެއް ބެލުންތެރިންނާ ހަމައަށް ގެނެސްދީފައިވާ ނަހުލާ ކުރިންވެސް ވަނީ "ސޮރީ" އާމެދު އުންމީދުތަކެއް އޮޮތްކަމަށް ބުނެފައެވެ. މިއާއެކު މާލޭގެ އިތުރުން ރަށްރަށުގައިވެސް "ސޮރީ" އެޅުވުމަށް ޓިކެޓް ވިއްކުންކުރިއަށްދެއެވެ.
"ސޮރީ" ފިލްމު އެޅުވުމުގެ ކުރިން ނަހުލާ ވަނީ ބެލުންތެރިންނަށް ދޭ ހަދިޔާއެއްގެ ގޮތުން ދެން އެންމެ އަވަހަށް ނެރޭނެ ފިލްމުވެސް އިޢުލާންކޮށްފައެވެ. އެގޮތުން ދެން އުފައްދާނީ ދިވެހި ފިލްމު "ގިސް"ކަން ނަހުލާ ފާހަގަކުރެއެވެ.
