ބައެއް އޮފީސްތަކުގައި ކުލަގަދަ ގޮތެއްގައި ފިރިހެނުންގެ ދުވަސް ފާހަގަކޮށްފި

ބައިނަލްއަގުވާމީ ގޮތުން ފާހަގަ ކުރާ ފިރިހެނުންގެ ދުވަސް ބައެއް އޮފީސްތަކުގައި ކުލަގަދަ ގޮތެއްގައި ފާހަގަކޮށްފިއެވެ.

މިދުވަސް ފާހަގަކުރުމުގެ ގޮތުން މޯލްޑިވްސް އިންލެންޑް އޮތޯރިޓީ (މީރާ) އިން ވަނީ އެ ތަނުގެ ފިރިހެން މުވައްޒަފުންނަށް ހާއްސަ ހަފްލާއެއް ބާއްވައި ރަތް ދޫލައިގެ މަރުހަބާއެއް ކިޔާފައެވެ.

ބައިނަލްއަގުވާމީ ގޮތުން ފާހަގަކުރާ ފިރިހެނުންގެ ދުވަސް ފާހަގަ ކުރުމުގެ ގޮތުން ހޯމަ ދުވަހު މީރާގެ ފިރިހެން މުވައްޒަފުން އޮފީހަށް ދިއުމުން އެތަނުގެ އަންހެން މުވައްޒަފުން، އެ މީހުންނަށް މަރުހަބާ ކިޔާފައި ވަނީ ރަތް ދޫލައިންނެވެ. އެގޮތުން އޮފީސް ކުރިމަތީ އަޅާފައި އޮތް ރަތް ދޫލަ ވަށައިގެން އަންހެން މުވައްޒަފުން ތިބީ ރަން ތާޖުތަކެއް ހިފައިގެންނެވެ. މަރުހަބާ ކިޔުމުގެ ގޮތުން ކޮންމެ ފިރިހެން މުވައްޒަފެއްގެ ބޮލުގައި ތާޖު އަޅުވާފައި ވަނީ އަންހެން މުވައްޒަފުންނެވެ.

މީރާގެ ފިރިހެން މުވައްޒަފުންނަށް މިއަދު މަރުހަބާ ކިޔަނީ

މީގެ އިތުރުން މުވައްޒަފުންގެ ފަރާތުން ހެނދުނުގެ ސައި ދިނުމާއި ކޭކް ފެޅުން ވެސް އޮތެވެ.

ނޮވެމްބަރު 19 ވަނަ ދުވަހު މުޅި ދުނިޔޭގައި ބައިނަލްއަގްވާމީ ފިރިހެނުންގެ ދުވަސް ފާހަގަކުރަނީ، ދުނިޔެ އާއި އާއިލާތަކާއި އަދި މުޖުތަމައު އަށް ފިރިހެނުން ގެނެސްދޭ ހެޔޮ އުސޫލުތަކާއި ފިރިހެނުންގެ ދުޅަހެޔޮކަމަށް ހޭލުންތެރިކަން އިތުރު ކުރުމަށެވެ.

މީރާގެ އިތުރުން ރާއްޖޭގެ ބައެއް މުއައްސަސާތަކާއި ކުންފުނިތަކުގައި ފިރިހެނުންގެ ދުވަސް ވަނީ ކުލަގަދަކޮށް ފާހަގަކޮށްފައެވެ.

ކޮންމެ އަހަރެއްގެ ވެސް އަންހެނުންގެ ދުވަހަކީ މުޅި ރާއްޖޭގައި ވަރަށް ކުލަ ގަދަކޮށް ފާހަގަ ކުރާ ދުވަހެކެވެ. އެ ފެންވަރުގައި ފިރިހެނުންގެ ދުވަސް ފާހަގަނުކުރާ ކަމަށް ބުނެ ބައެއް ފަރާތްތަކުން ގެންދަނީ ސޯޝަލް މީޑިއާގައި ޝުއޫރު ފާޅު ކުރަމުންނެވެ.

ފިރިހެނުންގެ ދުވަސް ފުރަތަމަ ފަހަރަށް ފާހަގަ ކުރި މުއައްސަސާތަކުގެ ތެރޭގައި މަރުކަޒީ ބޭންކް އެމްއެމްއޭ ވެސް ހިމެނެއެވެ. އެ އޮތޯރިޓީގެ ފިރިހެން މުވައްޒަފުން އޮފީހަށް އައުމުން ވަކިވަކި އަންހެން މުވައްޒަފުން ފިރިހެން މުވައްޒަފުންނަށް މާ ހަދިޔާކުރިއެވެ. އަދި އަންހެން މުވައްޒަފުންގެ ފަރާތުން ހެނދުނުގެ ސައެއް ދިނެވެ.

އޮފީސްތަކާއި ބައެއް އަމިއްލަ ކުންފުނިތަކުގައި ވެސް އެކި ފެންވަރުގައި ވަނީ ފިރިހެނުންގެ ދުވަސް ފާހަގަ ކޮށްފައެވެ.