މި ސަރުކާރަށް ރަށްރަށަށް 60 ނުވަތަ 70 ހާސް ރުފިޔާ ދިނުމަށް ބޮޑުވޭ، އުއްތަމަ ފަނޑިޔާރަށް މަހަކު 70 ހާސް ރުފިޔާ ދިނުން އެއްވެސް އެއްޗަކަށް ނުވޭ: މެންބަރު އަމީން ފައިސަލް
16 ޖޫން 2025 | ހޯމަ 07:00މި ސަރުކާރުން ލާމަރުކަޒީ ނިޒާމަކީ ހަރަދު ބޮޑު ނިޒާމެއްގެ ގޮތުގައި ދައްކަން ބޭނުންވޭ
ރައްޔިތުން މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް ވާހަކަދައްކަވަނީ
މި ސަރުކާރަށް ރާއްޖޭގެ ރަށްރަށަށް 60 ނުވަތަ 70 ހާސް ރުފިޔާ ދިނުމަށް ބޮޑުވާ ކަމަށާއި، އުއްތަމަ ފަނޑިޔާރަށް މަހަކު 70 ހާސްދޭން ނިންމުން އެއްވެސް ކަމަކަށް ނުވާ ކަމަށް ރައްޔިތުން މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވެއްޖެއެވެ.
ހޯމަ ދުވަހު ރައްޔިތުން މަޖިލީހުގެ ޖަލްސާގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ނިޒާމަށް ދިމާވެފައިވާ ދަތިތަކާއި، ގޮންޖެހުންތަކާ ހުށަހަޅާ ގަރާރަށް ބަހުސް ކުރައްވަމުން މެންބަރު އަމީން ފައިސަލް ވިދާޅުވީ މި ސަރުކާރުން ލާމަރުކަޒީ ނިޒާމަކީ ހަރަދު ބޮޑު ނިޒާމެއްގެ ގޮތުގައި ދައްކަން ބޭނުންވާ ކަމަށެވެ. ނަމަވެސް އެއީ ހަގީގަތް ނޫން ކަމަށް މެންބަރު އަމީން ފައިސަލް ވިދާޅުވިއެވެ.
މިސަރުކާރަށް ބޮޑުވެގެން އުޅެނީ ރަށަކަށް ނުވަތަ ކައުންސިލަރަކަށް މޫސާރަ ދޭންވުމުން ކަމަށެވެ. އެގޮތުން ރަށަކަށް 60 ނުވަތަ 70 ހާސް ރުފިޔާ ދޭންވެޖެއްނަމަ ބޮޑުވާ ކަމަށާއި، ނަމަވެސް އުއްތަމަ ފަނޑިޔާރަށް މަހަކު 70 ހާސް ރުފިޔާ ދިނުން އެއްވެސް އެއްޗަކަށް ނުވާނެ ކަމަށް އޭނާ ވިދާޅުވިއެވެ.
މިސަރުކާރުގެ ސިޔާސީ މަގާމުތަކަށް އިޝާރާތް ކުރައްވައި މެންބަރު އަމީން ފައިސަލް ވިދާޅުވީ އިންތިޚާބަކާ ގުޅިގެން އެރަކަށް ނަގާ 15 މުވައްޒަފުންނާއި، ވެރިކަން ދެމެހެއްޓުމަށްޓަކައި މިސަރުކާރުން ކުރާ ބޭކާރު ހަރަދުތައް އިންތިހާއަށް ބޮޑު ކަމަށެވެ. އެއީ ލާމަރުކަޒީ ނިޒާމުގެ މައްސަލައެއް ނޫން ކަމަށް މެންބަރު އަމީން ފައިސަލް ވިދާޅުވިއެވެ.
މިއުޅެނީ ނިޒާމުގެ މައްސަލައެއް ނޫން. މިނިސްޓްރީތަކަށް ވެސް ސިޔާސީ މަގާމަށް ވެސް ވެރިންނަށް ވެސް އައްޔަން ކުރާ މީހުންގެ އިހުލާސްތެރިކަމެއް ނެތިގެން މިއުޅެނީ. ހިސާބަށްވުރެ ނުލަފާކަން ވައްކަން ކުރަން ބޫތު ކައިފަ ހުރީމަ ވާ ގޮތް މި ފެންނަނީ. އެހެންވީމަ ނިޒާމުގެ ތެރެއިން ގޯސްމީހުން އައްޔަންކޮށްފައި ދެން ނިޒާމެއް ނޫން ކުށްވެރި ކުރަންވީ. ގޯސް މީހުން އައްޔަން ކުރެވުނީމަ އެމީހުން ބާލާފައި ރަނގަޅު މީހުން އައްޔަން ކުރެވޭނެ ގޮތެއް ހޯދަންވީ. ގާނޫނުގައި އެބައޮތް 5 މިލިއަން ދަށުގެ ހުރިހާ ޕްރޮޖެކްޓެއް ދޭންޖެހޭނީ ކައުންސިލްތަކަށްދޭ. މިއަދު ވެސް ކުރިން ވެސް މިކަމެއް ނުވޭ. ކުރިން ވެސް އެގޮތަށް އެކަން ކުރާނަމަ މިހާރު ރަށްރަށުގައި ނުނިމފައި ހުރި ޕްރޮޖެކްޓްތައް ވެސް ނިންމޭނެ.ރައްޔިތުން މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް
މެންބަރު އަމީން ފައިސަލް ވިދާޅުވީ ލާމަރުކަޒީ ނިޒާމު ފުޑާލުމަށް އެއްބަސްނުވެވޭނެ ކަމަށާއި، ކައުންސިލަރުންގެ އަދަދު މަދުކުރުމަށް ދެކޮޅު ކަމަށެވެ. ހަރަދު ކުޑަ ކުރުމުގެ ސިޔާސަތުގެ ދަށުން، ކައުންސިލަރުންގެ އަދަދު މަދުނުކޮށް، މިއަދު ރަށްރަށުގެ ސިއްހީ މަރުކަޒުތަކާއި، ހޮސްޕިޓަކްތަކަށް އައްޔަން ކުރައްވާފައިވާ ސިޔާސީ ބޭފުޅުންގެ ވަކި ކުރުން މާ ރަނގަޅުވާނެ ކަަމަށް އޭނާ ވިދާޅުވިއެވެ. އަދި ވިދާޅުވީ ހެލްތް ސެންޓަރުތަކަށް ވެސް ބަޖެޓު ވަކިކުރުމަށްފަހު ދޭ ކަމަށްވާނަމަ މާ ރަނގަޅަށް އެ މަރުކަޒުތައް ހިންގާނެ ކަމަށާއި، ރަށްރަށުން ސަރުކާރަށް ބަރޯސާވުން ކުޑަވާނެ ކަމަށެވެ.
މީގެ އިތުރުން މެންބަރު އަމީން ފައިސަލް ވިދާޅުވީ ބައެއް ރަށްރަށުގެ ކައުންސިލްތަކުގެ މަސައްކަތް ވަރަށް ރަނގަޅު ކަމަށާއި، ރަށްރަށުގެ ތަރައްގީއަށް ގިނަ މަސައްކަތްތައް ކޮށްފައިވާ ކަމަށެވެ. ބަޖެޓުގައި ވާ ގޮތަށް ކައުންސިލްތަކަށް ފައިސާ ދޫކުރާނަމަ މިނިސްޓްރީތަކަށްވުރެ ރަނގަޅަށް ކައުންސިލުންތަކުން މަސައްކަތް ކުރާނެ ކަމަށް އޭނާ ވިދާޅުވިއެވެ. އަދި ވިދާޅުވީ މާލެސިޓީ ކައުންސިލް ނުހިނގުމަކީ ނިޒާމުގެ މައްސަލައެއް ނޫން ކަމަށެވެ. އެއީ މާލެސިޓީ ކައުންސިލަށް އިންތިޚާބުކުރާ ބައެއްގެ މައްސަލަ ކަމަށެވެ.
