ގަލްފް ސަރަހައްދުން ދަތުރުކުރާ އާގު ބޯޓު ފަހަރު ސަމާލުވާން އަންގައިފި
އިނގިރޭސިވިލާތުގެ ޓްރާންސްޕޯޓް މިނިސްޓްރީން އަންގާފައިވަނީ އިނގިރޭސިވިލާތުގެ ދިދައިގެ ދަށުން ދަތުރުކުރާ އުޅަނދުފަހަރު ދެކުނު ރަތް ކަނޑުންނާއި އަދަން ކަނޑުގެ ސަރަޙައްދުން ދަތުރު ނުކުރުމަށެވެ.
ގަލްފް އޮފް އޮމާން ގައި ނޮވެމްބަރު 23، 1987 ގައި، އީރާނުގެ ހަނގުރާމަމަތީ މަނަވަަރަކުން ދިން ހަމަލާއެއް 8،750 ޓަނުގެ ރޫމޭނިޔާ ދިދައިގެ ދަށުން ދަތުރުކުރި ބޯޓަކަށް އެރުމުގެ ސަބަބުން ބޯޓުގައި ރޯވުމުން ޓަގު ބޯޓަކުން އަލިފާން ނިއްވުމުގެ މަސައްކަތް ކުރަނީ
ހުކުރު ދުވަހު އިސްރާއީލުން އީރާނަށް ދިން ބޮޑެތި ހަމަލާތަކަށްފަހު، ގްރީސް އަދި އިނގިރޭސިވިލާތުން އެ ޤައުމުތަކުގެ އާގު ބޯޓު ފަހަރަށް އަދަން ކަނޑުގެ ސަރަޙައްދުން ދަތުރު ނުކުރުމަށާއި ހޯމޫޒް ކަނޑުން ކުރާ ހުރިހާ ދަތުރުތަކެއްގެ ރެކޯޑް ރަނގަޅަށް ބެލެހެއްޓުމަށް އިރުޝާދު ދީފައިވާ ކަމަށް ރޮއިޓާރސް އިން ބުނެފިއެވެ.
މީގެ ކުރިން އީރާނުން ބުނެފައިވަނީ ހުޅަނގުގެ ޤައުމުތަކުން އެ ޤައުމަށް ފިއްތުންތަކެއް ކުރިމަތި ކުރަން އުޅެފި ނަމަ، މުހިންމު ހޯމޫޒް ކަނޑު ބަންދުކުރާނެ ކަމަށެވެ. ދިރާސާވެރިން ބުނެފައިވަނީ ހޯމޫޒް ކަނޑު ބަންދު ކޮށްފި ނަމަ ވިޔަފާރި އަށް ހުރަސްއެޅި، ދުނިޔޭގެ ތެލުގެ އަގު އުފުލޭނެ ކަމަށެވެ.
ހުކުރު ދުވަހު ގްރީސްގެ ޝިޕިންގ އެސޯސިއޭޝަނުން ނެރުނު ލިޔުމެއްގައިވާ ގޮތުން، ގްރީސްގެ އުޅަނދުފަހަރުގެ ވެރިންގެ ކިބައިން އެދިފައިވަނީ ހޯމޫޒް ކަނޑުން ދަތުރުކުރާ އެ ޤައުމުގެ އުޅަނދުފަހަރުގެ ތަފްސީލު ގްރީސްގެ މެރިޓައިމް މިނިސްޓްރީ އަށް ފޮނުވުމަށެވެ.
"މެދުއިރުމަތީގައި ހިނގަމުންދާ ކަންތައްތަކާއި އެ ސަރަޙައްދުގައި އަސްކަރީ ޙަރަކާތްތައް އިތުރުވަމުން ދިއުމާ ގުޅިގެން، (ގްރީސްގެ) ޝިޕިންގ މިނިސްޓްރީ އިން ... ޝިޕިންގ ކުންފުނިތަކަށް އިލްތިމާސް ކުރަނީ ހޯމޫޒް ކަނޑުގެ ސަރަޙައްދުގައި ދަތުރުކުރާ ގްރީސްގެ އުޅަނދުފަހަރުގެ ތަފްސީލު ... ފޮނުވުމަށް،" މި ލިޔުމުގައި ބުނެފައިވެއެވެ.
ރޮއިޓަރސް އަށް ފެނިފައިވާ އިނގިރޭސިވިލާތުގެ ޓްރާންސްޕޯޓް މިނިސްޓްރީން ނެރުނު ވަކި ލިޔުމެއްގައިވާ ގޮތުން، އިނގިރޭސިވިލާތުގެ ދިދައިގެ ދަށުން ދަތުރުކުރާ އުޅަނދުފަހަރަށް އިރުޝާދު ދީފައިވަނީ ދެކުނު ރަތް ކަނޑުންނާއި އަދަން ކަނޑުގެ ސަރަޙައްދުން ދަތުރު ނުކުރުމަށެވެ.
މި ސަރަޙައްދުތަކުން ދަތުރު ކުރާނަމަ، އުޅަނދުފަހަރުން އެންމެ މަތީ ދަރަޖައިގެ ސަލާމަތީ ފިޔަވަޅުތައް އަޅަންވާނެ ކަމަށާއި ދަތުރު ކުރާއިރު ފަޅުވެރިންގެ އަދަދު ވީހާވެސް މަދުކުރަން ވާނެ ކަމަށް މި އިރުޝާދުގައި ބުނެފައިވެއެވެ.
ހަމަލާތަކުގައި އެމެރިކާ ބައިވެރިވާ ހިސާބަށް ހިނގައްޖެ ނަމަ، ކަންތައްތައް އިތުރަށް ގޯސްވުމުގެ ރިސްކު ވަރަށް ބޮޑަށް އިތުރު ވެގެން ދާނެ ކަމަށް ތަޖުރިބާކާރުން ދެކެއެވެ.
