ޖަރުމަނުގެ ޑިފެންސް މިނިސްޓަރު ބޯރިސް ޕިސްޓޯރިއަސް ޔުކްރެއިން އަށް ވަަޑައިގެންފި އެވެ.

ބުރާސްފަތި ދުވަހު އޭނާ ޔުކްރެއިންގެ ވެރި ރަށް ކީވް އަށް ވަޑައިގެންފައިވާއިރު، މި ދަތުރުފުޅުގައި ޔުކްރެއިން ސަރުކާރުގެ އިސްވެރިންނާ ވެސް އޭނާ ބައްދަލު ކުރައްވާނެ އެވެ.

މިދަތުރުފުޅުގައި ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގައި، ޔުކްރެއިން އަށް ފޯރުކޮށްދެވޭނެ އިތުރު އެހީތެރިމަކާއި، އެއްބާރުލުމާ ގުޅޭ ގޮތުން ވެސް މަޝްވަރާ ކުރައްވާނެ އެވެ. 

ޔުކްރެއިން އަށް ވަޑައިގެންނެވުމުގެ ކުރިން ޖަރުމަނުގެ ޑިފެންސް މިނިސްޓަރު ވިދާޅުވީ، ޔުކްރެއިން އަށް އެހީތެރިކަން ފޯރުކޮށްދީ، ޔުކްރެއިން އަށް އެއްބާރުލުން ދިނުމުގެ ގޮތުން ޖަރުމަނުން ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. އަދި ހަނގުރާމަ ހުއްޓާލުމަށް ކުރަމުން އަންނަ މަސައްކަތްތަކުގައި، މަޝްވަރާތަކަށް ރަޝިޔާ ގެނައުމަށް މަގު ފަހި ކުރާނެ ކަމަށް ވެސް ވިދާޅުވި އެވެ. 

އެެމެރިކާ ފިޔަވައި، ދެން ޔުކްރެއިން އަށް އެންމެ ބޮޑަށް އެހީތެރިކަން ދެމުން އަންނަ އެއް ޤައުމަކީ ޖަރުމަނެވެ. އެމެރިކާ އިން ޔުކްރެއިން އަށް ދޭ އެހީތެރިކަމާ މެދު ސުވާލުތަކެއް އުފެދެމުން އަންނަ ދަނޑިވަޅުގައި، ޖަރުމަނުން އަންނަނީ ޔުކްރެއިން އަށް އެހީތެރިވުމަށް މަސައްކަތް ކުރަމުންނެވެ. އަދި އެކަމުގައި ޔޫރަޕުގެ އެހެން ޤައުމުތަކަށް ބާރު ވެސް އަޅަމުން ގެންދެ އެވެ. 

މި މަހު، ތުރުކީގެ އިސްތަންބޫލް ގައި ބޭއްވުނު ސުލްހައިގެ މަޝްވަރާތަކުގައި ރަޝިޔާ އާއި ޔުކްރެއިން އިން ވެސް ވަނީ ބައިވެރިވެފަ އެވެ. ނަމަވެސް ސަރަހައްދީ މައްސަލަތަކާއި، ނޭޓޯގައި ޔުކްރެއިން ބައިވެރިވުމުގެ މައްސަލައިގައި ދެފަރާތުން އެއްބަސްވުމަކަށް ނާދެވި، ހަނގުރާމަ ދަނީ ކުރިއަށެވެ.