ތިނަދޫގެ ތަރައްގީގެ މަޝްރޫއުތަކުގައި ވަޅުޖެހިފައި، އިންޓަނޭޝަނަލް އެއަރޕޯޓު މަޝްރޫއު ދަނީ ބިލާހަކަށް: މޭޔަރު ސައުދު
9 ޖޫން 2025 | ހޯމަ 08:23ތިނަދޫ ރީޖަނަލް ޕޯޓު ޑިވެލޮޕްމެންޓްގެ މަސައްކަތްތައް ވެސް ކުރިއަށް ނުދޭ
ތިނަދޫ ސިޓީގެ މޭޔަރު ސައުދު އަލީ
މި ސަރުކާރާއެކު ތިނަދޫ ސިޓީގެ ތަރައްގީގެ މަޝްރޫއުތައް ވަޅުޖެހިފައިވާ ކަމަށް ސިޓީގެ މޭޔަރު ސައުދު އަލީ ވިދާޅުވެއްޖެއެވެ.
ރާއްޖެޓީވީގެ ވައުދުނާމާ ޕްރޮގްރާމްގައި ސައުދު ވިދާޅުވީ ނިމިދިޔަ ސަރުކާރުން ތިނަދޫގައި ގިނަ މަޝްރޫއުތަކެއް ކުރިއަށް ގެންދިޔަ ކަމަށާއި، އެމަޝްރޫއުތަކުގެ ތެރެއިން ބައެއް މަޝްރޫއުތައް ނިމިފައިވާ ކަމަށެވެ. މިހާރު ކުރިއަށްދާ މަޝްރޫއުތަކުގެ ސްޕީޑް ވަރަށް ލަސް ކަމަށާއި، ބައެއް މަޝްރޫއުތައް ކުރިއަށް ނުދާ ކަމަށް އޭނާ ވިދާޅުވިއެވެ.
ތިނަދޫ އިންޑަސްޓްރީ ވިލެޖުގެ މަސައްކަތަށް އިޝާރާތް ކުރައްވައި ސައުދު ވިދާޅުވީ މިސަރުކާރާއެކު، އެމަޝްރޫއު އޮތީ ވަޅުޖެހިފައި ކަމަށެވެ. އަދި ވިދާޅުވީ ތިނަދޫ ރީޖަނަލް ޕޯޓު ޑިވެލޮޕްމެންޓްގެ މަސައްކަތްތައް ވެސް ކުރިއަށް ނުދާ ކަމަށާއި، އެކަމުގެ ކަންބޮޑުވުން އެބަ އޮތް ކަމަށެވެ.
އެއީ އޭގެ ޒާތުގައި އިގްތިސާދީ ވަރަށް ބޮޑެތި މަސައްކަތްތަކެއް ހުއްޓުމަކަށް އެއަންނަނީ. މިކަމުގައި އޭގެ ސަބަބުން ހުވަދު އަތޮޅުގައި ވިޔަފާރި ކުރަން ބޭނުންވާ ފަރާތްތަކާއި، ޚާއްސަކޮށް ލ.އަތޮޅުގެ ދެކުނުގެ ވިޔަފާރިއަށް އަސަރުތަކެއް ކުރާނެ. ރާއްޖެއިން ބޭރުން މުދާ ގެނައުމަށްޓަކައި ސަރުކާރުން ފެއްޓެވި އެންމެ ބޮޑު މަޝްރޫއަކަށް ވެގެންދިޔައީ އިންޓަރނޭޝަނަލް ސީ ޕްލޭން ޕޯޓެއް ސީޕޯޓެއް އެކުލެވިގެންދިޔުން. އެކަން މިވަގުތު ކުރިއަށް ނުދާތީ އެކަންބޮޑުވުންތައް އެބަހުރި. އަޅުގަނޑުމެން މި މަސައްކަތް ކުރަނީ ކަމާގުޅުންހުރި އިދާރާތަކާ ޚާއްސަކޮށް ސަރުކާރުގެ އެންމެ މައި ކުންފުނި އެމްޓީސީސީއާ ހަވާލުކޮށްފައިވާ މަަސައްކަތަކަށްވާތީވެ އެމަސައްކަތް ވަޅުޖެހިފައި އޮތް އޮތުން ނިމުމަކަށް ގެނެސް މަސައްކަތް ކުރިއަށް ގެންދެވޭތޯ.ތިނަދޫ ސިޓީގެ މޭޔަރު ސައުދު އަލީ
ތިނަދޫ ރީޖަނަލް ޕޯޓު ޑިވެލޮޕްމެންޓް މަޝްރޫއުގެ ދެވަނަ ފިޔަވަހީގެ ދަށުން، ޕޯޓް އެޑްމިނިސްޓްރޭޓިވް އިމާރާތެއް ގާއިމުކުރުމާއި، ގާޑް ހައުސް އިމާރާތަކާއި، ވެއާހައުސް އަދި ވޯކްޝޮޕް އިމާރާތެއްގެ އިތުރުން ނެރުބައްތި ހަރުކުރުމާއި ފެންޑާ ހަރުކުރުމަށް އެމްޓީސީސީއާ ހަވާލު ކޮށްފައިވަނީ 27 ޖެނުއަރީ 2022 ގައެވެ. މި މަޝްރޫއު ހަވާލުކޮށްފައިވަނީ 17.8 މިލިއަން ރުފިޔާ އަށް 330 ދުވަސްތެރޭގައި ނިންމާ ހަވާލު ކުރާ ގޮތަށެވެ.
މީގެ އިތުރުން ތިނަދޫގައި އިންޓަނޭޝަނަލް އެއަރޕޯޓެއް ތަރައްގީ ކޮށްދެއްވާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެފައިވާތީ އެކަމަށް އިޝާރާތް ކުރައްވައި ސައުދު ވިދާޅުވީ 2026 ގެ ކުރިން ތިނަދޫގައި އިންޓަނޭޝަނަލް އެއަރޕޯޓެއް ގާއިމްކުރެވި، ފްލެޓްތައް ޖެއްސި ތަރައްގީ ކުރެވިގެންދާނެ ކަމަށް އެމަނިކުފާނު ވިދާޅުވެފައިވާ ކަމަށެވެ. އަދި ފްލޯޓިން ޓާމިނަލްތަކަކާއެކު މިމަސައްކަތް ދުނިޔޭގެ ފެންވަރުގައި މުހިންމު ބޮޑު މަޝްރޫއަކަށްވާނެ ކަމަށް ރައީސް މުއިއްޒު ވިދާޅުވިކަން ފާހަގަކުރެއްވިއެވެ.
މި މަޝްރޫއަށް ރައްޔިތުން އުންމީދު ކުރި ނަމަވެސް މިހާރު މިމަޝްރޫއާއެކު ރައްޔިތުން މާޔޫސްވެ، ކަންބޮޑުވުވެފައިވާ ކަމަށް ސައުދު ވިދާޅުވިއެވެ.
ހަމައެއާއެކު އަދުގެ ސަރުކާރުން ކެންޕޭން ދުވަސްވަރު އަދި މަޖިލިސް އިންތިޚާބުގައި ވެފައިހުރި ވަރަށް މުހިންމު ބޮޑެތި ވައުދުތައް އެބަހުރި. އިގްތިސާދީ ގޮތުންނާއި، ފަތުރުވެރިކަން ފުޅާކުރުމުގެ ގޮތުން ވެފައިވާ އެންމެ ބޮޑު ވައުދަކަށް ވެފައި މިވަނީ ތިނަދޫގައި އިންޓަނޭޝަނަލް އެއާރޕޯޓުގެ މަަސައްކަތުގެ ވާހަކަ. އަޅުގަނޑު ހަނދާނަށް އަންނަނީ ރައީސުލްޖުމްހޫރިއްޔާ ވިދާޅުވި ވިދާޅުވުން. 2026 ގެ ކުރިން ތިނަދޫގައި އިންޓަނޭޝަނަލް އެއަރޕޯޓެއް ގާއިމްކުރެވި، ފްލެޓްތައް ޖެއްސި ތަރައްގީ ކުރެވިގެންދާނެ ކަމަށް. ފްލޯޓިން ޓާމިނަލްތަކަކާއެކު މިމަސައްކަތް ދުނިޔޭގެ ފެންވަރުގައި މުހިންމު ބޮޑު މަޝްރޫއަކަށް މިމަޝްރޫއު ވެގެންދާނެ. އަދި ހިތްގައިމު މިމަޝްރޫއު އަޅުގަނޑުމެން ބަލާހިތުން އަޅުގަނޑުމެން ރައްޔިތުން އެކަމަށް ކެތްމަދުވެފައި ތިބި ތިބުން އަޅުގަނޑުމެންނަށް މިވަނީ ބިލާހަކަށްވެފައި.ތިނަދޫ ސިޓީގެ މޭޔަރު ސައުދު އަލީ
ސައުދު ވިދާޅުވީ މިމަޝްރޫއާ ގުޅޭގޮތުން މިހާރު ސަރުކާރުގެ ބޭފުޅުންގެ ވާހަކަތައް ބަދަލުވެފައިވާ ކަމަށާއި، އެއީ ރައްޔިތުން ހިތާމަ ކުރާ ކަމެއް ކަމަށެވެ. މިހާރު ތިނަދޫގެ ތަރައްގީއަށް ވާހަކަ ނުދައްކަވާ ކާޑެއްދޫއަށް މާ ބޮޑަށް އިސްކަންދޭ މޭރުމަކުން މިސަރުކާރުގެ ބޭފުޅުންގެ ވާހަކަތައް ބައްޓަންވެފައިވާ ކަމަށް އޭނާ ވިދާޅުވިއެވެ.
ސައުދު ވިދާޅުވީ ތިނަދޫއާއި، ކާޑެއްދޫ ގުޅާލުމުގެ ވާހަކަތައް ދެއްކި ނަމަވެސް މިމަޝްރޫއުގެ އެއްވެސް މައުލޫމާތެއް ކައުންސިލްއާ ހިއްސާކޮށްފައިނުވާ ކަމަށާއި، މިމަޝްރޫއާމެދު އެއްވެސް އުންމީދެއް މިހާރު ނެތް ކަމަށެވެ.
