ސިންވާރުގެ ހަށިގަނޑު ފެނިފައިވާ ކަމަށް އިސްރާއީލް އިން ބުނެފި
އިސްކާރީލްގެ އަސްކަރިއްޔާ އިން ހާމަކޮށްފައިވާ ގޮތުގައި ސިންވާރުގެ ހަށިގަނޑު ފެނިފައި ވަނީ ޣައްޒާގެ ޚާން ޔުނިސްގައި ހުންނަ ޔޫރަޕިއަން ހޮސްޕިޓަލްގެ ދަށުގައިވާ ބިމު އަޑީގެ ޓަނަލް އަކުން.
އިސްރާއީލުގެ ސިފައިން އާންމުކުރި ވީޑިއޯއަކުން ނަގާފައިވާ ސްކްރީން ޝޮޓެއްގައި ހަމާސްގެ ވެރިޔާ މުހައްމަދު ސިންވާރު
ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުގެ އިސް ލީޑަރު މުޙައްމަދު ސިންވާރުގެ ހަށިގަނޑު ފެނިފައިވާ ކަމަށް އިސްރާއީލްގެ އަސްކަރިއްޔާ އިން ހާމަކޮށްފި އެވެ.
އިސްކާރީލްގެ އަސްކަރިއްޔާ އިން ހާމަކޮށްފައިވާ ގޮތުގައި ސިންވާރުގެ ހަށިގަނޑު ފެނިފައި ވަނީ ޣައްޒާގެ ޚާން ޔުނިސްގައި ހުންނަ ޔޫރަޕިއަން ހޮސްޕިޓަލްގެ ދަށުގައިވާ ބިމު އަޑީގެ ޓަނަލް އަކުންނެވެ.
އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ މީގެ ކުރިން ވަނީ، ހަމާސްގެ ލީޑަރު ސިންވާރު އަވާހަރާކޮށްލާފައިވާކަން ހާމަކޮށްފަ އެވެ. ނަމަވެސް އެކަމާ ގުޅޭ އިތުރު އެއްވެސް ތަފްސީލެއް އެ ދުވަހު އެނާ ދީފައި ނުވެ އެވެ.
ސިންވާރު އަވަހާރަކޮށްލުމަށް ފަހު އޭނާގެ ހަށިގަނޑު ފެނިފައިވާ ކަމަށް އިސްރާއީލްގެ އަސްކަރިއްޔާ އިން ހާމަކޮށްފައިވާ އިރު، އެ އަސްކަރިއްޔާ އިން ބުނެފައި ވަނީ ސިންވާރު އަވަހާރަކޮށްލާފައި ވަނީ މިއަހަރުގެ މެއި މަހުގެ 13 ދުވަހު ކުރިއަށް ގެންދިޔަ ޚާއްސަ އޮޕަރޭޝަނެއްގައި، ވައިގެ މަގުން ދެެވުނު ހަމަލާއެއްގައި ކަމަށެވެ.
މީގެ އިތުރުން އިސްރާއީލްގެ އަސްކަރިއްޔާ އިން ބުނެފައި ވަނީ ސިންވާރުގެ އިތުރުން، އޭނާ އާއެކު ހަމާސް ޖަމާއަތުގެ އިތުރު މެމްބަރުން ތަކެއް ވެސް އަވަހާރަކޮށްލެވިފައިވާ ކަމަށެވެ. ސިންވާރުގެ ހަށިގަނޑު ފެނުނު ޓަނަލްގެ ތެރެއިން އޭނާގެ ބައެއް އަމިއްލަ ސާމާނުގެ އިތުރުން، ބައެއް އިންޓެލިޖެންސް މައުލޫމާތުތައް ލިބިފައިވާ ކަމަށް ވެސް އިސްރާއީލްގެ އަސްކަރިއްޔާ އިން ވަނީ ބުނެފަ އެވެ.
އިސްރާއީލްގެ އަސްކަރިއްޔާގެ ތަރުޖަމާނު ބްރިގޭޑިއާ ޖެނަރަލް އެފީ ޑެފްރިން ނޫސްވެރިންނަށް މައުލޫމާދު ދެމުން ބުނެފައި ވަނީ، ސިންވާރުގެ ހަށިގަނޑު ފެނިފައި ވަނީ އެ ހޮސްޕިޓަލްގެ އިމަޖެންސީ ރޫމުގެ ދަށުން ކަމަށެވެ. އަދި ޑީއެންއޭ ޓެސްޓުތަކުން، އެއީ ސިންވާރުގެ ހަށިގަނޑުކަން ޔަގީން ކުރެވިފައިވާ ކަމަށް ވެސް އޭނާ ވަނީ ބުނެފަ އެވެ.
މުޙައްމަދު ސިންވާރު އަވަހާރަކޮށްލާފައިވާކަން އިސްރާއީލް އިން ހާމަކޮށްފައިވާއިރު، މިދިޔަ އަހަރު ވަނީ ހަމާސްގެ ލީޑަރަކަށް އޭރު ހުންނެވި އޭނާގެ ބޭބެ ޔަހްޔާ ސިންވާރު ވެސް އަވަހާރަކޮށްލައިފަ އެވެ. ހަމާސް ޖަމާއަތުގެ ލީޑަރަކަށް މުޙައްމަދު ސިންވާރު ހަމަޖެއްސީ އޭގެ ފަހުންނެވެ.
