"އީދު ފާހަގަކުރަން ކަމަދޫއަށް ނުދާންވީ ސަބަބެއް ނެތް"
އީދަކީ އުފާ ފާޅުކޮށް ގުުޅުން ބަދަހި ކުރުމަށް ލިބޭ ފުރުސަތަކަށްވާއިރު، ކަމަދޫ ފަދަ ރަށްތަކުން ގެންދަނީ އެ ނަމޫނާ ދައްކަމުން
ކަމަދޫ ޢީދު އުފާ 1446 - ކަމަދޫގެ ކުޅިވަރުގެ ފޯރި، ވަރަށް ތަފާތު
ބޮޑު އީދުގެ ހަރަކާތްތައް އެންމެ ފޯރިގަދަކޮށް ކުރިއަށްގެންދާނީ ކޮންރަށެއްގައިތޯ ސުވާލުވެސް އުފައްދާނެ ކަމެއް ނެތެއެވެ. ކަމަދޫގެ ނަން ފަހަތަށް ޖައްސާލުމަށްފަހު ލިސްޓްގެ ކުރިން ޖާގަ ހޯދޭނެ އެހެން ރަށެއް ނެތެއެވެ.
ކަމަދޫގެ އީދު ފޯރިން ފާހަގަކުރެވުނު އެންމެ މުހިއްމު ކަމަކީ ސަގާފީ ކުޅިވަރުތަކަށް ހުރި ފޯރިއެވެ. އަންހެން ފިރިހެން ކުދިބޮޑު އެންމެން ޝާމިލްވެގެން ކުރިއަށްގެންދާ ސަގާފީ ހަރަކާތްތަކުގައި ރަށަށް ދިރުން ގެނުވައިދެއެވެ. މަންޒަރު ބަލަން ތިބޭ މީހުންނަށްވެސް ޖޯޝުން ފުރިގެންވާ އުފާވެރިކަމެއް ގެނުވައިދެއެވެ.
އެގޮތުން ބަލާއިރު ކޯޑި ކެނޑުމާއި، ބޮޑުމަސް ބޭނުމާއި، ސްޓޭޖް ޝޯވ ގެ އިތުރުން، ދަފި ނެގުމާއި، މާފަތީގެ ހަރަކާތްތަކާއި، ކުޅިވަރު ހަރަކާތްތަކާއެކު ކަމަދޫގެ ކުދިބޮޑު ރައްޔިތުން އީދު ފާހަގަކުރަމުންދަނީ ރަށަށް އީދަށް ޒިޔާރަތްކުރި މެހެމާނުންވެސް ހައިރާން ކޮށްލާފައެވެ. ސަބަބަކީ މިފަދަ ފުރިހަމަކޮށް އިންތިޒާމްކުރެވިގެން ސަގާފީ ހަރަކާތްތައް ނުފެންނާތީއެވެ. ޒަމާނަށް އަންނަ ބަދަލާއި ގުޅިގެން ސަގާފީ ކަންކަމަށް ބަދަލުތަކެއް އަންނައިރު، މިފަދަ ކުޅިވަރުތައް ދިރުވާއި އާލާކޮށް ކުރިއަށްގެންދިއުމަކީ ވަރަށް މުހިއްމު ކަމެކެވެ.
އީދުގެ ދެވަނަ ދުވަހުވެސް ކަމަދޫގައި ފެނިގެންދިޔައީ މުޅިން ސަގާފީ ހަރަކާތްތަކެއެވެ. އެގޮތުން ކުރުދަނޑި އަދި ފަތިގަނޑު ނެށުމާއި، ފަތްމާލި ނެރުމާއި، ދެ ޖިންސުގެ ދަތި ނެގުމާއި އަދި ރޭގަނޑު އޮތީ ބޮޑުމަހުގެ ކުޅިވަރުތަކެއެވެ.
މީގެ އިތުރުން އާދިއްތަ ދުވަހު ކުރިއަށްގެންދިޔަ ކުޅިވަރު ހަރަކާތްތަކުގެ ތެރޭގައި ކުޅިވަރު ހާލި އަދި އަންހެނުންގެ ކޯޑި ހެދުމަށް ހުއްދަ ހޯދަން ދިއުމާއި އަގު ކިޔުމަށް ދިއުމާއި ފިރިހެންނުންގެ ކޯޑި ކުޅިވަރުވަނީ ބާއްވާފައެވެ. މިއީ ސަގާފީ ހަރަކާތްތަކުގެ ތެރެއިން އެންމެ ފޯރިގަދަ ކުޅިވަރެއެވެ. ކޯޑި ޖެހުމާއި ކޯޑި ކެނޑުމަކީ ދިވެހި ސަގާފީ ކުޅިވަރުތަކުގެ ތެރޭގައި ހިމެނޭ ފޯރިގަދަ ކުޅުމެކެވެ. މިހާރުވެސް އީދުގައި ރަށްރަށުގައި އެންމެ މަޖާ ނަގާ އެއް ކުޅިވަރަކީ ކޯޑީގެ ކުޅިވަރެވެ..
އެކި ރަށްރަށުގައި ކޯޑި ހަދާފައި ހުންނަނީ އެކި ގޮތަށެވެ. ބައެއް މީހުން ކޯޑި ހަދައިފައި ހުންނަނީ ބޮލުގައި އަޅާ ކޯރިއެއް ގޮތަށެވެ، އޭގެ ވަށައިގެން ހުންނަނީ ބޮންތިފަން އެލުވާފަ އެވެ، އަނެއްބައި މީހުން ދަނޑިން އޭގެ މައިގަނޑެއް ހަދައި މޫނެއް ލައިފައި ވަށައިގެން އެކި އެއްޗެހި އެލުވައި ކޯޑީގެ މަންޒަރު ރީތިކޮށް ދައްކާގޮތަށް ހަދައިފައި ހުރެ އެވެ.
ކޯޑި ކުޅޭއިރު ފިރިހެނުން ކޯޑި ޖަހަނީ އަންހެނެއްގެ ބޮލުގައެވެ، އަންހެނުން ކޯޑި ޖަހަނީ ފިރިހެނުން ބޮލުގައެވެ. މިގޮތައް އެއްބަޔަކު ކޯޑި ޖެހުމުން އަނެއް ބަޔަކު އެވީ ކޯޑި ކަޑާށެވެ. ކޯޑި ޖެހި މީހުން އުޅޭނީ ކޯޑި ކެނޑިޔަ ނުދޭށެވެ. އަތުނުވަން ކޮޅުކޮޅުމައްޗަށް ދުވެ އަދި ގަދަހަދައި އުޅޭނެ އެވެ. އެކަމަކު ހަލުއިކޮށް ރުއްގަހަށް އަރާ މީހުން ކޯޑި ހިފައިގެން ރުކަކަށް އަރައި ރުކުގެ ކުރިޔަށް ނޫނީ ގަހުގެ ކުރިޔަށް ކޯޑިލަ އެވެ.
އިހު ޒަމާނުގައި ކޯޑިއަކީ އަންހެނުންނާއި ފިރިހެނުންގެ މެދުގައި ވަރަށް ބޮޑު ވާދަވެރިކަމެއް އަދި ވަރަށް ބޮޑު ފޯރިއެއް އޮންނަ ކުޅިވަރެކެވެ. މަގުމަތީ ކުޅިވަރެއްގެ ގޮތުގައި ބުނެވޭ މި ކުޅިވަރަށް އިހުގައި އޮތް ފޯރިއެއް މިއަދަކު ނެތެވެ.
އޭގެފަހުން ކޯޑި ކަނޑަން ރުކަށް ނުވަތަ ގަހަށް އަރާތޯ ބަލަން އެމީހުން އެތާ ފާރައަށް ތިބެ އެވެ. އެއީ ރުކަށް ނުވަތަ ގަހަށް އެރިޔަ ނުދޭން ނުވަތަ ކޯޑި ކެނޑިޔަ ނުދޭށެވެ. ނަމަވެސް އެންމެ ފަހުން ސިއްރުސިއްރުން ރުކަށް ނުވަތަ ގަހަށް އަރައި ކޮންމެވެސް މީހަކު ކޯޑި ކަނޑާލަ އެވެ.
އީދުގެ ހަރަކާތްތަކަށް ބަލާއިރުވެސް، ޒަމާންވީ ދިވެހިވަންތަ ސަޤާފަތްތަކާއި ރަހަތަކުގެ ކުލަވަރު ކަމަދޫއިން ދަނީ ދައްކުވައިދެމުންނެވެ. ކަމަދޫވަނީ 1446 ވަނަ އަހަރުގެ އީދު ފާހަގަކުރުމަށްޓަކައި ދުރާލައި ވަރަށް ބޮޑަށް ތައްޔާރުވެފައެވެ. އެގޮތުން އެންމެ ހާއްސަކަމަކަށް ކަމަދޫގެ ރައްޔިތުން ދެކެނީ ރަށަށް އަރާ މެހެމާނުންނަށް ހިނިތުންވުމާއި އެކު މަރުހަބާ ކިޔުމެއެވެ. މިއަހަރުގެ ޝިއާރެއްގެ ގޮތުގައިވެސް ކަމަދޫ އީދު އުފާ ހާއްސަކޮށްފައިވަނީ އެކަކު އަނެކަކަށް ހިނިތުންވުމަށެވެ.
