ޗައިނާ އެހީގައި ވިލިމާލޭގައި ތަރައްގީކުރާ ހޮސްޕިޓަލުގެ ޑީޓެއިލްޑް ޑިޒައިން ހެދުމުގެ އެއްބަސްވުމުގައި ސޮއިކޮށްފި
ޗައިނާ ސަރުކާރުގެ އެހީގައި ވިލިމާލޭގައި އަޅާ ހޮސްޕިޓަލްގެ ޑިޒައިނިން މަސައްކަތް ކުރުމަށް ކޮންސްޓްރަކްޝަން މިނިސްޓްރީން ޗައިނާ ސަރުކާރާއެކު ބުދަ ދުވަހު އެއްބަސްވުމެއްގައި ސޮއިކޮށްފައިވާއިރު، ވިލިމާލޭގައި ހަދަނީ 112 އެނދުގެ ހޮސްޕިޓަލެއް
ޗައިނާގެ އެހީގައި އަޅާ ވިލިމާލެ ހޮސްޕިޓަލްގެ ޑިޒައިނިން މަސައްކަތަށް ސޮއިކުރުން
ޗައިނާ ސަރުކާރުގެ އެހީގައި ވިލިމާލޭގައި އަޅާ ހޮސްޕިޓަލްގެ ޑިޒައިނިން މަސައްކަތް ކުރުމަށް ކޮންސްޓްރަކްޝަން މިނިސްޓްރީން ޗައިނާ ސަރުކާރާއެކު މިއަދު އެއްބަސްވުމެއްގައި ސޮއިކޮށްފިއެވެ.
އެ އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ ހައުސިން މިނިސްޓަރު، އަބްދުالله މުއްތަލިބު އެވެ. ޗައިނާ ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އެ ގައުމުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ކޮންގް ޝިއަންހު އެވެ.
އެ ބައްދަލުވުމުގައި ހެލްތު މިނިސްޓަރު، އަބްދުالله ނާޒިމް ގެ އިތުރުން ޗައިނާ ސަރުކާރުގެ ބައެއް އިސްވެރިން ވެސް ބައިވެރިވެވަޑައިގެންނެވި އެވެ.
އެ ރަސްމިއްޔާތުގައި ފާހަގަކޮށްފައިވާ ގޮތުގައި އެ ހޮސްޕިޓަލަށް ދީފައިވާ ނަމަކީ 'ޗައިނާ-މޯލްޑިވްސް ފްރެންޑްޝިޕް ހޮސްޕިޓަލް'އެވެ.
ވިލިމާލޭގައި ހަދަނީ 112 އެނދުގެ ހޮސްޕިޓަލެއް ކަމަށް އެ މިނިސްޓްރީން ވަނީ ބުނެފައެވެ.
އެ ހޮސްޕިޓަލުގެ ޑިޒައިން މަރުހަލާ ފެށުމަށް އެއްބަސްވުމުގައި ސޮއިކޮށްފައި ވަނީ، ފީސިބިލިޓީ މަސައްކަތް ނިންމުމަށް ފަހުގައެވެ.
އައު ހޮސްޕިޓަލު އެޅުމަށް ހަމަޖެހިފައިވަނީ މިހާރު ވިލިމާލޭގެ ހޮސްޕިޓަލް ހިންގާ ބިމުގަ އެވެ. ނަމަވެސް، އެކަށީގެންވާ ޖާގަ ނުލިބޭ ނަމަ، ޓާޝަރީ ހޮސްޕިޓަލް އަޅާނީ ވިލިމާލެ ހޮސްޕިޓަލް މިހާރު ހިންގާ އިމާރާތް ތަޅައިލުމަށް ފަހު ކަމަށް ސަރުކާރުން މީގެކުރިން ބުނެފައިވެ އެވެ.
ވިލިމާލޭގައި އަޅާ ހޮސްޕިޓަލުގެ ދިރާސާތައް ނިންމައި އެ ދިރާސާތަކުގެ ހޯދުންތައް ޗައިނާ ސަރުކާރުން ދިވެހި ސަރުކާރާ ހަވާލު ކުރީ މިދިޔަ އަހަރުގެ އޮކްޓޫބަރު 17، ގަ އެވެ.
މިދިޔަ އަހަރުގެ ޖަނަވަރީ މަހު، ރައީސް ޑރ. މުޙައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅުގެ ތެރެއިން، އެ ގައުމުގައި ހުންނަވައި ރައްޔިތުންނާ މުޚާތަބު ކުރައްވަމުން އެމަނިކުފާނު ވިދާޅުވީ، މި މަޝްރޫއުއަށް ޗައިނާ ސަރުކާރުގެ ހިލޭ އެހީ ހަމަޖެހިފައިވާ ކަމަށެވެ.
ރައީސް ވިދާޅުވީ، ހޮސްޕިޓަލް އަޅަން ބޭނުންވާ ބިން ވެސް މިހާރު ކަނޑައަޅާފައިވާ ކަމަށެވެ. އެ ހޮސްޕިޓަލާ އެކު ވިލިމާލޭ ރައްޔިތުންގެ ކަންބޮޑުވުންތަކަށް ހައްލު ލިބިގެންދާނެ ކަމަށް ވެސް ރައީސް ވިދާޅުވިއެވެ.
