ގެދޮރުވެރިޔާ ސްކީމާ ގުޅިގެން ވަކި ފަރާތްތަކަކަށް ނާޖާއިޒު ފައިދާ ހޯދައިދިން މައްސަލަ އާ ގުޅިގެން ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި އޭރު އެ މިނިސްޓްރީގެ އިސްވެރިންގެ ގޮތުގައި ތިއްބެވި ތިން ބޭފުޅަކަށް ދައުވާ ކުރަން ޕްރޮސިކިއުޓަރ ޖެނެރަލް (ޕީޖީ) އޮފީހަށް ފޮނުވައިފި އެވެ.

އެންޓި ކޮރަޕްޝަން ކޮމިޝަން (އޭސީސީ) އިން އަންގާރަ ދުވަހު ބުނީ އެ މައްސަލަ ޕީޖީ އޮފީހަށް ފޮނުވީ ގެދޮރުވެރިޔާ ސްކީމުގެ ފުރަތަމަ ބުރުގެ، ފުރަތަމަ 4،000 ފްލެޓު ލިބޭ މީހުންގެ ތެރޭގައި ވަކި ފަރާތްތަކެއް ހިމަނައި، ވަކި ފަރާތްތަކަކަށް ނާޖާއިޒު މަންފާއެއް ހޯދައިދީފައިވާކަން އެ ކޮމިޝަނާއި ފުލުހުންނާ ގުޅިގެން ތަހުގީގު ކުރަމުންދާ މައްސަލައިގެ ތަހުގީގުގައި ހޯދާފައިވާ ހެކިގަރީނާއިން އެނގޭތީ ކަމަށެވެ.

އެ މައްސަލައާ ގުޅިގެން ދައުވާ ކޮށްދިނުމަށް އެދިފައިވަނީ އަކްރަމްގެ އިތުރުން ހައުސިންގ މިނިސްޓްރީގެ ސީނިއަރ އެގްޒެކެޓިވްގެ މަގާމުގައި އޭރު ހުންނެވި ހއ.އިހަވަންދޫ، ނެދުންގެ، މުޙައްމަދު ޢާރިފާއި އެ މިނިސްޓްރީގެ ސީނިއަރ އެގްޒެކެޓިވްގެ މަގާމުގައި އޭރު ހުންނެވި މއ. ވިރާޙް، ލިރުއާމް ވަހީދާއި އެ މިނިސްޓްރީގެ ޑިރެކްޓަރު ޖެނެރަލްގެ މަގާމުގައި ހުންނެވި މއ.އިހާދޫ، އަޙްމަދު ވިޝާން ނަސީމްގެ މައްޗަށެވެ.

އެ ބޭފުޅުންގެ މައްޗަށް ދައުވާ ކުރަން ފޮނުވައިފައިވަނީ ރަސްމީ ހައިސިއްޔަތާއި އެހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން ނާޖާއިޒު މަންފާ ހޯދައިދިނުމުގެ ކުށުގެ ދައުވާއެވެ.

އޭސީސީން ބުނީ, އެ ތުހުމަތުގެ އިތުރުން، އެހެން އިތުރު ކުށްތައް އެ މައްސަލައިގައި ޝާމިލުވާ ފަރާތްތަކުން ކޮށްފައިވާކަމަށް ތުހުމަތުކުރެވޭތީ، އެކުށްތައް ތަހުގީގު ކުރުމުގެ މަސައްކަތް ފުލުހުންނާ ގުޅިގެން ކުރަމުން އަންނަ ކަމަށެވެ.

ރައީސް ޞާލިޙްގެ ވެރިކަން ނިމެން ކުޑަ ދުވަސްކޮޅަކަށް ވެފައިވަނިކޮށް، 4،000 ފުލެޓު ލިސްޓު ނެރުނީ ނޮވެމްބަރު 4، 2023ގައެވެ. އެ ލިސްޓާ މެދު ގިނަ ބަޔަކު ޝަކުވާ ކުރުމުން، ޝަކުވާއަށް ހުޅުވަލުއްމަށްފަހު އެ ޝަކުވާތައްބަލައި އަލުން ލިސްޓް ނެރުނީ ނޮވެމްބަރ 17 ގައެވެ.

އޭސީސީން ވަނީ އެ ލިސްޓު އެކުލަވާލައިފައިވަނީ ވަކި ބަޔަކަށް ނާޖާއިޒު ފައިދާ ލިބޭ ގޮތަށް ކަމަށް ބުނެ އެ ފުލެޓުތައް ހަވާލުކުރުން ހުއްޓުވައިފައެވެ.

އެއަށް ފަހު މި ސަރުކާރުގެ ހައުސިންގ މިނިސްޓްރީން ލިސްޓު ބެލުމަށްފަހު މިދިޔަ ފެބްރުވަރީ މަހު އިއުލާންކުރީ، 4،000 ފުލެޓުގެ ހައްގުވެރިންނަކީ 1820 މީހުން ކަމަށާއި ކުރީގެ ލިސްޓުން 53 ޕަސެންޓު މީހުންނަށް ދިން ޕޮއިންޓް ސައްހަ ނޫން ކަމަށެވެ.

އޭގެ ސަބަބަން، ފުލެޓް ކުރިން ލިބިފައި ތިބި މީހުންނަށް ފުލެޓެއް ލިބުމުގެ ފުރުސަތު ގެއްލުނު ކަމުގެ ކަންބޮޑުވުން ގިނަ ބަޔަކު ފާޅުކުރިއެވެ.

ފްލެޓް ލިސްޓާ ގުޅިގެން އޭސީސީން ކުރަން ފެށި ތަހުގީގާ ގުޅިގެން މި ސަރުކާރު ވެރިކަމަށް އައިސް ފްލެޓް ދިނުމުން މަޑު ޖަހައްސާލައި، އެ ލިސްޓް މުރާޖާ ކުރުމުގެ މަސައްކަތް ފެށި އެވެ.

އަދި އެ ލިސްޓު މުރާޖާ ކުރުމަށް ފަހު، ވަގުތީ ލިސްޓެއް މިދިޔަ މާޗް މަހު އެކުލަވާލައި ޝަކުވާއަށްވެސް ހުޅުވާލި އެވެ. މި މަރުހަލާތައް ދިޔަފަހުން، ސަރުކާރުން މިދިޔަ ހަފްތާ އިއުލާންކޮށްފައި ވަނީ، އިތުރު ލިސްޓެއް ނުނެރުމަށް ނިންމާފައިވާ ކަމަށެވެ.

އެހެން ކަމުން މިހާރު އޮތް ގޮތުން ދެން ފްލެޓް ލިބެނީ، އޭރު ސޯލިހްގެ ސަރުކާރުގައި އެކުލަވާލި ފްލެޓް ލިސްޓަށް ކަމަށް މިދިޔަ ހަފުތާގައި މި ސަރުކާރުގެ ހައުސިންގ މިނިސްޓަރު އަބްދުﷲ މުއްތަލިބު ވަނީ ވިދާޅުވެފަ އެވެ.