އޮސްޓްރޭލިއާ ސަރުކާރުން ޕެޓްރޯލް ބޯޓެއް ރާއްޖެއަށް ހަދިޔާ ކޮށްފި
މިދިޔަ ސަރުކާރުން ހައިޑްރޮގްރަފީގެ މަސައްކަތް ކުރީ އިންޑިއާގެ ސަރުކާރާއެކު ވެވުނު އެއްބަސްވުމެއްގެ ދަށުން، ނަމަވެސް، ރާއްޖޭގެ ކަނޑުފަޅުތައް ދިރާސާކޮށް، ޗާޓު ހެދުން ފަދަ މަސައްކަތް ކުރުމަށް އެކުލަވާލި އެ އެއްބަސްވުން އައު ނުކޮށް އުވާލަން މި ސަރުކާރުން ނިންމި
އޮސްޓްރޭލިއާއިން ހަދިޔާ ކުރާ ގާޑިއަން ކްލާސް ޕްޓެރޯލް ބޯޓު
އޮސްޓްރޭލިއާ ސަރުކާރުން ގާޑިއަން-ކްލާސް ޕެޓްރޯލް ބޯޓެއް ރާއްޖެއަށް ހަދިޔާ ކުރަން ނިންމައިފިއެވެ.
ރާއްޖެ އަށް ގާޑިއަން-ކްލާސް ޕެޓްރޯލް ބޯޓެއް ހަދިޔާކުރަން ނިންމާފައިވަނީ އޮސްޓްރޭލިއާގެ ބޮޑުވަޒީރުުގެ ނައިބު އަދި ޑިފެންސް މިނިސްޓަރު ރިޗާޑް މާލްސްއާއި ރާއްޖޭގެ ޑިފެންސް މިނިސްޓަރު ޣައްސާން މައުމޫން ނެރުއްވި ޖޮއިންޓް ސްޓެޓްމެންޓެއްގައެވެ.
ޑިފެންސުން ނެރުނު ބަޔާނުގައި ބުނެފައިވާ ގޮތުގައި އެ މުއާމަލާތަކީ ދެ ގައުމުގެ ގުޅުމަށް ލިބުނު ވަރަށް ބޮޑު ކާމިޔާބީއެކެވެ. އަދި އެއީ ރާއްޖޭގެ ކަނޑުގެ ސަރަހައްދު ހިމާޔަތްކުރުމުގެ ގާބިލުކަން އިތުރުކޮށް، އިންޑިއާ ކަނޑުގެ ސަރަހައްދުގެ ސަލާމަތާއި ރައްކާތެރިކަމަށް މުހިންމު ދައުރެއް އަދާކުރުމުގެ ގާބިލުކަން އިތުރުކުރުމަށް ލިބުނު ވަރަށް ބޮޑު ކުރިއެރުމެއް ކަމަށް އެ ބަޔާނުގައި ބުނެފައިވެއެވެ.
މީގެ އިތުރުން މި ބޯޓުގެ ސަބަބުން ގަވައިދާ ޚިލާފަށް ކަނޑު ދަތުރުކުރާ ބޯޓުތަށް ހުއްޓުވުމަށާއި އެފަދަ ހަރަކާތްތައް ދެނެގަތުމަށް މަގުފަހި ވާނެ ކަމަށް އެ ބަޔާނުގައި ބުނެފައިވެއެވެ. އޮސްޓްރޭލިއާގެ ޑިފެންސުން ބުނިގޮތުގައި ގާޑިއަން ކްލާސް ޕެޓްރޯލް ބޯޓު މިހާރު ދަނީ ހަދަމުންނެވެ. އަދި އެ ބޯޓު އަންނަ އަހަރު ނިމޭނެ ކަމަށް ބެލެވޭ ކަމަށް ވަނީ ބުނެފައެވެ. ރާއްޖެއާ ގުޅިގެން އޮސްޓްރޭލިއާއިން އެ އުޅަނދަށް އެހީވުމުގެ ގޮތުން މެއިންޓެނެންސް އެންޑް ސަސްޓެއިނަބިލިޓީ ޕްލޭނެއް އެކުލަވާލާނެ ކަމަށް ވެސް އެ ގައުމުގެ ޑިފެންސުން ވަނީ ބުނެފައެވެ.
އޭގެ އިތުރުން އޮސްޓްރޭލިއާއިން ރާއްޖެއަށް ހަދިޔާކުރަން ނިންމާފައިވަނީ މަލްޓި ބީމް އެކޯ ސައުންޑާ އެކެވެ. މިއީ ހައިޑްރޮގްރަފީ ދިރާސާ ކުރުމަށް ބޭނުންކުރާ އާލާތެކެވެ. ދެ ގައުމުން ނެރުނު ބަޔާނުގައި ބުނެފައިވަނީ މި އެހީއާއެކު ރާއްޖެއިން އަމިއްލައަށް ދިވެހި ކަނޑުތަކުގެ އަޑި މެޕް ކުރުމުގެ ގާބިލުކަން ހޯދުމަށް މަގުފަހިވެގެންދާނެ ކަމަށެވެ.
މިދިޔަ ސަރުކާރުން ހައިޑްރޮގްރަފީގެ މަސައްކަތް ކުރީ އިންޑިއާގެ ސަރުކާރާއެކު ވެވުނު އެއްބަސްވުމެއްގެ ދަށުންނެވެ. ނަމަވެސް، ރާއްޖޭގެ ކަނޑުފަޅުތައް ދިރާސާކޮށް، ޗާޓު ހެދުން ފަދަ މަސައްކަތް ކުރުމަށް އެކުލަވާލި އެ އެއްބަސްވުން އައު ނުކޮށް އުވާލަން މި ސަރުކާރުން ނިންމި އެވެ.
