އާދިއްތަ ދުވަހު މާލެ ސަރަހައްދުން ކުއްލި ގޮތަކަށް ކަރަންޓު ކެނޑި އެތައް އިރެއް ވަންދެން ޚިދުމަތް ނުލިބި އޮތުމުން އެ މައްސަލަ ހަގީގީ މާނާގައި ތަހުގީގު ކުރުމަށް ދަ ޑިމޮކްރެޓްސްއިން ގޮވާލައިފިއެވެ.

އެ މައްސަލައާ ގުޅޭ ގޮތުން ހުރި ކަންބޮޑުވުންތައް ފާޅުކޮށް، ޑިމޮކްރެޓުން ވަނީ ބަޔާނެއް ނެރެފައެވެ. ދަ ޑިމޮކްރެޓްސް އިން ނެރުނު ބަޔާނުގައި ބުނީ، މާލެ އަކީ ދިވެހި ރާއްޖޭގެ އާބާދީގެ 40 އިންސައްތަ ދިރިއުޅޭ ވަޒަނަށްވެފައި، އިއްޔެ އާންމު ދިރިއުޅުމުގެ އެންމެހާ ޚިދުމަތަށް ކަރަންޓާ ގުޅިފައި ހުރިއިރު، ކުރިން އެންގުމެއް ނެތި، މުޅި ސަރަހައްދުން ކަރަންޓު ކެނޑުމަކީ ނުހަނު ކަންބޮޑުވުން ހުރި ކަމެއް ކަމަށެވެ. އަދި އެއީ ހޮސްޕިޓަލް ތަކާއި ސްކޫލް ތަކާއި ސަރުކާރު އޮފީސް ތަކާއި އަދި ވިޔަފާރިތައް މުޅިން ހުއްޓުމަކަށް އަންނާން ޖެހިފައިވާ ނުރައްކާތެރި ކަމެއްކަމަށާއި އެކަމުގެ ސަބަބުން ސީދާގޮތުންނާއި ނުސީދާގޮތުން އެތައް މިލިޔަނެއްގެ ގެއްލުން އާންމުންނާއި ދިވެހި ދައުލަތުން ބޮލު އަޅާންޖެހޭނެ، މިފަދަ ޒަމާނެއްގައި ބަލައިގަނެވޭނެ ކަމެއް ނޫންކަމަށެވެ.

އެ މައްސަލަ ސީރިއަސް މައްސަލައެއްގެ ގޮތުގައި ބެލުމަށް ރައީސް ޑރ. މުޙައްމަދު މުއިއްޒު އަންގަވައިފައި ވާއިރު، އެކަން ހަގީގީ މާނައިގައި ފުރިހަމަ ކޮށް ”ބޮޑުނަގުލަށް ނުވެ، ކޮޅަކު ޖެހޭނެ ގޮތަށް“ ކުރާނެ ކަމަށް އުންމީދު ކުރާ ކަމަށް ޑިމޮކްރެޓްސްގެ ބަޔާނުގައިވެއެވެ.

މާލެ ސަރަހައްދުން ކަރަންޓު ކެނޑުނު ސަބަބެއް މިހާތަނަށް ކަށަވަރުވެފައިނުވާއިރު ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވަނީ ކަރަންޓު ކެނޑުނު ސަބަބު ދެނެގަތުމަށް ފަހު ހާމަކުރައްވާނެ ކަމަށާއި އެ މައްސަލަ ތަކުރާރު ނުވާނެހެން ފިޔަވަޅު އަޅާނެ ކަމަށް ވިދާޅުވެފައެވެ.