ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން އަމިއްލަ ވިޔަފާރިތަކާ ދެކޮޅަށް ހަނގުރާމަ އިއުލާން ކޮށްފައިވާ ކަމަށާއި، މިއީ ނުރައްކަލެއް ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

އަމީރު މިހެން ވިދާޅުވެފައިމިވަނީ އަމިއްލަ ވިޔަފާރިވެރިންނަށް އަމާޒު ކުރައްވައި، ރައީސް މުއިއްޒު ބަހުގެ ހަމަލާތަކެއް ދެއްވާފައިވަނިކޮށްށެވެ. 31 މެއި 2025 ގައި ދައުލަަތުގެ މީޑިއާއަށް ދެއްވި އިންޓަވިޔުއެއްގައި ރައީސް މުއިއްޒު ވިދާޅުވީ ވިޔަފާރިވެރިންގެ އޮތީ ރައްޔިތުންނަށް ދެރަ ނިކަމެތިކަން ދިނުމުގެ އާދައެއް ކަމަށެވެ. ރައީސް މުއިއްޒު މީގެ ކުރިން ވެސް ވަނީ ވިޔަފާރިވެރިންނަށް ބަހުގެ ހަމަލާތަކެއް ދެއްވާފައެވެ.

މިކަމާ ގުޅިގެން ކަންބޮޑުވުން ފާޅުކުރައްވައި، އާދިއްތަ ދުވަހު އެކްސްގައި އަމީރު ވިދާޅުވީ ރައީސް މުއިއްޒު ނުކުމެ ރާއްޖޭގެ ވިޔަފާރިވެރިންނާ ޖައްސާލުމަކީ ކަންބޮޑުވާންޖެހޭ ކަމެއް ކަމަށާއި، މިއަދު ރާއްޖޭގެ އިގްތިސާދީ، މާލީ ސިޔާސަތު ފެއިލްވެ ފާލުން ނެއްޓި، އިގްތިސާދަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމުގެ ގާބިލްކަމެއް މިސަރުކާރުގަ ނެތުމުން، ސަރުކާރުން ނުކުމެ ވިޔަފާރިތަކާއި ދެކޮޅަށް ހަނގުރާމަ އިއުލާން ކުރުމަކީ ނުރައްކަލެއް ކަމަށެވެ.

ވިޔަފާރިތަކަށް ސަރުކާރުން ދޭންޖެހޭ އެތައް ބިލިއަން ރުފިޔާ ނުދީ ހިފަހައްޓާ، ވިޔަފާރިތައް ބަނގުރޫޓު ކޮށްލާފައިވާކަން ފާހަގަކުރައްވައި އަމީރު ވިދާޅުވީ ލޯނު ލިބުން ދަތިވެފައިވާ ކަމަށާއި، ޑޮލަރު ލިބުން ދަތިވެ ކަޅު ބާޒާރުގައި ޑޮލަރުގެ އަގު މަތިވަމުންދާ ކަމަށެވެ. އަދި ސަރުކާރުގެ އަމަލުތަކުން އެނގިގެންދަނީ މި ގޮންޖެހުންތަކަށް ހައްލެއް ހޯދައިދިނުމުގެ ވިސްނުމެއްވެސް ނެތްކަން ކަމަށް އަމީރު ވިދާޅުވިއެވެ.

މީގެ އިތުރުން އަމީރު ވިދާޅުވީ 2024 ވަނައަހަރުގެ އުފެއްދުންތެރިކަމުގެ ހިސާބުތަކަށް ބަލާއިރު، ސީދާ ސަރުކާރުން އުފެއްދުންތެރިކަމަށް 'ކޮންޓްރިބިއުޓް' ކޮށްފަ ހުރީ 8.6 އިންސައްތަ ކަމަށެވެ. އެއީ (ޖުމްލަ 101 ބިލިއަން ތެރެއިން 8.8 ބިލިއަން ރުފިޔާ) ކަމަށް އަމީރު ވިދާޅުވިއެވެ.

އެހެންކަމުން ގައުމީ އުފެއްދުންތެރިކަމުގެ 91.4 އިން ސައްތަ 'ވެލިއު އެޑް' ކުރަނީ ސީދާ ޕްރައިވެޓް ސެކްޓަރުގެ މަސައްކަތުން ކަމަށާއި، ޕްރައިވެޓް ސެކްޓަރުގައި ހަރަކާތްތެރިވާ ކުދި އަދި މެދުފަންތީގެ ވިޔަފާރިތަކަށް ސަރުކާރުން ވަނުމަކީ ކުދި އަދި މެދު ފަންތީގެ ވިޔަފާރިތައް ހަލާކުކޮށްލުން ކަމަށް އޭނާ ވިދާޅުވިއެވެ. އަދި ސަރުކާރުން މި ވިޔަފާރިތަކަށް ވަންނަނީ އިސްރާފަށް ޖާގަދިނުމަށް ކަމަށް އަމީރު ވިދާޅުވިއެވެ.

މީގެ އިތުރުން ސަރުކާރުގެ ޚަރަދު ކުޑަކުރުމެއް ނެތި، ސިޔާސީ މުވައްޒަފުން ހައްދެއް ނެތި އިތުރުކުރަމުންދާކަން އަމީރު ފާހަގަކުރެއްވިއެވެ.

އަމީރު ވިދާޅުވީ ވިޔަފާރިވެރިންނާއި ސަރުކާރުން ޖައްސާލުމަކީ އިގްތިސާދަށް މި ސަރުކާރުން ގަސްތުގައި ދޭ ވަރަށް ބޮޑު ގެއްލުމެއް ކަމަށާއި، އިގްތިސާދުގެ އުފެއްދުންތެރިކަން ފަނާކުރަނިވި ކަމެއް ކަމަށެވެ.