އިސްރާއީލްގެ މުދާ އެތެރެ ކުރުން މަނާ ކުރަން އަޔަލެންޑް ސަރުކާރުން ނިންމަނީ
28 މެއި 2025 | ބުދަ 08:43އާދީއްތަ ދުވަހު އަޔަލެންޑުގެ ސަރުކާރުން ވަނީ ބައިނަލްއަޤުވާމީ ޤާނޫނުގެ ދަށުން، ޣައިރު ޤާނޫނީ ކަމަށް ބެލެވޭ އިސްރާއީލް އިން އުފައްދާ މުދާ އެތެރެ ކުރުން މަނާ ކުރުމަށް ބިލެއް އެކުލަވާލަން ނިންމާފައެވެ.
އިސްރާއީލްގެ އަމަލުތަކާ ދެކޮޅަށް އަޔަލެންޑުގައި ނުރުހުން ފާޅު ކުރަނީ
އިސްރާއީލް އިން ޣައްޒާގައި ހިންގަމުން އަންނަ ލާއިންސާނީ އަަމަލުތަކުގެ ސަބަބުން، އިސްރާއީލަށް ދަތި ކުރުމުގެ ގޮތުން އެ ޤައުމުގެ މުދާ އަޔަލެންޑަށް އެތެރެ ނުކުރެވޭނެ ކަމަށް އެ ޤައުމުގެ ސަރުކާރުން ނިންމައި، އެކަމާ ގުޅޭ ޚާއްސަ ބިލެއް ތައްޔާރު ކުރުމުގެ މަސައްކަތް ފަށައިފި އެވެ.
އާދީއްތަ ދުވަހު އަޔަލެންޑުގެ ސަރުކާރުން ވަނީ ބައިނަލްއަޤުވާމީ ޤާނޫނުގެ ދަށުން، ޣައިރު ޤާނޫނީ ކަމަށް ބެލެވޭ އިސްރާއީލް އިން އުފައްދާ މުދާ އެތެރެ ކުރުން މަނާ ކުރުމަށް ބިލެއް އެކުލަވާލަން ނިންމައިފަ އެވެ.
މިއީ ޔޫރަޕިއަން ޔޫނިއަންގެ މެމްބަރު ޤައުމަކުން މި ފަދަ ފިޔަވަޅެއް އަޅާ ފުރަތަމަ ފަހަރެވެ. އަޔަލެންޑު ސަރުކާރުގެ މި ނިންމުން ބިނާވެފައި ވަނީ، އިންޓަނޭޝަނަލް ކޯޓް އޮފް ޖަސްޓިސް އިން، ޣައްޒާގައި އިސްރާއީލް އިން ހިންގަމުން ދަނީ ޣައިރު ޤާނޫނީ އަމަލުތަކެއް ކަމަށް މިދިޔަ އަހަރު ކަނޑައަޅާފައި ވަނިކޮށެވެ.
އަޔަލެންޑު ސަރުކާރުގެ ޚާރިޖީ ވަޒީރު އަދި ޑެޕިއުޓީ ބޮޑު ވަޒީރު ސައިމަން ހެރިސް ވިދާޅުވި ގޮތުގައި، ޔޫރަޕިއަން ޔޫނިއަންގެ އެހެން ޤައުމުތަކުން ވެސް އަޔަލެންޑުގެ އެ ނިންމުން މިސާލެއްގެ ގޮތުގައި ދެކޭނެ ކަމަށް އުންމީދު ކުރައްވާ ކަމަށެވެ. އަދި އެ ނިންމުމަކީ ބައިނަލްއަޤުވާމީ ޤާނޫނުގެ ދަށުން އުފުލަން ޖެހޭ ޒިންމާއެއް ކަމަށް ވެސް އަޔަލެންޑުގެ ސަރުކާރުން ދެކެ އެވެ.
އަޔަލެންޑުގެ މި ނިންމުމުގެ ސަބަބުން އިޤްތިސާދީ ގޮތުން މާ ބޮޑު އަސަރެއް ނުކުރި ނަމަވެސް، އެ ނިންމުމުގެ ރަމްޒީ މާނަ ބޮޑުވާނެ ކަމަށް މާހިރުން ވަނީ ފާހަގަ ކޮށްފަ އެވެ.
މީގެ ކުރިން 2020 ވަނަ އަހަރުން 2024 ވަނަ އަހަރާ ދެމެދު ވަނީ މޭވާ، ތަރުކާރީ އަދި ލަކުޑީގެ ބާވަތްތަކެއް އެތެރެ ކޮށްފަ އެވެ. އެއީ ގާތް ގަނޑަކަށް އެއް މިލިއަން ޔޫރޯގެ އަދަދެއް ކަމަށް ފާހަގަ ކޮށްފައިވެ އެވެ.
އަޔަލެންޑް ސަރުކާރުން ހުށަހަޅާފައިވާ މި ބިލު ޤާނޫނަކަށް ވުމުގެ ކުރިން އިތުރު މަސައްކަތް ތަކެއް ކުރަން ޖެހޭނެ ކަމަށް ބެލެވެ އެވެ. އެ ޤައުމުގެ ސަރުކާރުން ބުނާ ގޮތުގައި އަންނަ ހަފްތާ ތަކުގައި ބިލުގެ ޑްރާފްޓާ ބެހޭ އެންމެ ފަހުގެ މައުލޫމާތު ހިއްސާ ކުރެވޭނެ އެވެ. ނަމަވެސް ބިލު ޤާނޫނަކަށް ވާނީ މި އަހަރުގެ ފަހު ކޮޅުގައި ކަމަށް ލަފާ ކުރެވެ އެވެ.
މިދިޔަ އަހަރުގެ ތެރޭގައި އަޔަލެންޑުން ވަނީ ފަލަސްޠީނުގެ މިނިވަން ދައުލަތް ބަލައިގަންނަން ވެސް ނިންމައިފަ އެވެ. އެ ފަހަރު އަޔަލެންޑުގެ އިތުރުން އެހެން ޤައުމުތަކަކުން ވެސް ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ނިންމައިފަ އެވެ.
އެގޮތުން ސްޕެއިން، ނޯވޭ، ޖަރުމަނު އަދި ސްލޮވޭނިއާ އިން ވެސް ވަނީ ފަލަސްޠީނުގެ މިނިވަން ދައުލަތް ބަލައިގަންނަން ނިންމައިފަ އެވެ. އޭގެ ފަހުން ފްރާންސް އިން ވެސް ވަނީ މި އަންނަ ޖޫން މަހުގެ ތެރޭގައި ފަލަސްޠީނުގެ މިނިވަން ދައުލަތް ބަލައި ގަންނާނެ ކަމަށް ހާމަކޮށްފަ އެވެ.
