ހަނދު ފެނިއްޖެ: ޙައްޖު ދުވަހަކީ ޖޫން ފަހެއް، ޢީދު ވާނީ ޖޫން ހަޔަކަށް
މި އަހަރުގެ ހައްޖު ދުވަހަކީ އަންނަ ޖޫން މަހުގެ ފަސް ވަނަ ދުވަސް ، އަދ ޢީދު ދުވަހަކީ އެ މަހުގެ ހަވަނަ ދުވަސް
ޖޫން މަހުގެ ފަސްވަނަ ދުވަހަކީ މިއަހަރުގެ ޙައްޖު ދުވަސް ކަމުގައި ވަނީ ކަނޑައަޅާފަ
1446 ވަނަ އަހަރުގެ ހައްޖު ދުވަހަކީ އަންނަ ޖޫން މަހުގެ ފަސް ވަނަ ދުވަސް ކަމަށް ސައުދީ ސަރުކާރުން ކަނޑައަޅައިފި އެވެ.
ސައުދީ ސަރުކާރުން ކަނޑައަޅާފައިވާ ގޮތުގައި ޒުލްޣައިދާ މަހުގެ އެންމެ ފަހު ދުވަހަކީ މެއި މަހުގެ 27 ވަނަ ދުވަހެވެ. އެގޮތުން ޙައްޖުމަހުގެ ފުރަތަމަ ދުވަހަށް ވާނީ މެއި މަހުގެ 28 ވާ ބުދަ ދުވަހެވެ.
ހައްޖު ދުވަހަކީ އަންނަ ޖޫން މަހުގެ ފަސް ވަނަ ދުވަހުއެވެ. އަދި ޙަޖުހެ އަޅުކަމާއި ގުޅިގެން އަންނަ އަޟްހާ ޢީދު ދުވަހަކީ ޖޫން މަހުގެ ހަ ވަނަ ދުވަހެވެ.
ސައުދީ ސަރުކާރުން އަންގާރަ ދުވަހުގެ ރޭ ބުނީ ހަނދު ފެނިފައިވާތީ މެއި މަހުގެ 28 ވާ ބުދަ ދުވަހަކީ ޙައްޖު މަހުގެ ފުރަތަމަ ދުވަހުގެ ގޮތުގައި ކަނޑައަޅާފައިވާ ކަމަށެވެ.
ހަމަ އެގޮތަށް ރާއްޖޭގެ އިސްލާމީ ކަންތައްތަކާއި ބެހޭ ވުޒާރާއިން ވެސް ބުނެފައިވަނީ މީލާދީ ސަނަތުން 2025 ވަނަ އަހަރުގެ މިހިނގާ މޭ މަހުގެ 28 ވާ ބުދަ ދުވަހަކީ 1446 ވަނަ އަހަރުގެ ޛުލްޙިއްޖާ މަހުގެ 01 ވަނަ ދުވަސް ކަމުގަ އެވެ.
އެހެންކަމުން މީލާދީ ސަނަތުން 2025 ވަނަ އަހަރުގެ ޖޫން މަހުގެ 05 ވާ ބުރާސްފަތި ދުހަކީ 1446 ވަނަ އަހަރުގެ ޙައްޖު (ޢަރަފާތު) ދުވަސް ކަމުގައި ދަންނަވާ ކަމަށެވެ.
މިމަހުގެ 28 ވާ ބުދަ ދުވަހަކީ ޙައްޖުމަހުގެ ފުރަތަމަ ދުވަސްކަމަށް ވުމުން، ދީނީ ދަންނަބޭކަލުން ވިދާޅުވާގޮތުންނަމަ ބަރަކާތްތެރިކަން އެންމެ ބޮޑު ދުވަސްތަކަކީ ޙައްޖު މަހުގެ ފުރަތަމަ 10 ދުވަހެވެ.
އަދި ކީރިތި ރަސޫލާ މުސްލިމުންނަށް އަމުރު ކުރައްވަނީ، އެ ދުވަސްތަކުގައި ތަކްބީރާއި، ތަމްޙީދާއި ތަހްލީލާއި ތަސްބީޙަ ކިޔުން ގިނަ ކުރުމަށެވެ.
ޙައްޖުވެރިޔާ ނޫން މީހުން އަރަފާތު ދުވަހު ރޯދަ ހިފުމަކީ، ވޭތުވެދިޔަ އަހަރާއި ކުރިއަށް އޮތް އަހަރުގެ ފާފަތައް ފުއްސަވާދެއްވާނެ ކަމެއް ކަމަށާއި ޢާޝޫރާ ދުވަހު ރޯދަ ހިފުމަކީ ވޭތިވެދިޔަ އަހަރުގެ ފާފަތައް ފުއްސަވާދެއްވާނެ ކަމެއް ކަމަށް ޢިލްމުވެރިން ވިދާޅުވެއެވެ.
ހައްޖު މަސް މާދަމާ ފެށޭއިރު މި އަހަރުގެ ހައްޖުގެ އަޅުކަމަށް ދުނިޔޭގެ އެކި ކަންކޮޅުތަކުން މައްކާއަށް މުސްލިމުން ދަނީ ޖަމާވަމުންނެވެ. ރާއްޖޭގެ ދެ ގުރޫޕެއް މިހާރު ވަނީ ސައުދީއަށް ގޮސްފަ އެވެ.
މި އަހަރު ވެސް ހައްޖުގެ އަޅުކަމަށް ދެ މިލިއަނަށް ވުރެ ގިނަ މުސްލިމުން މާތްވެގެން މައްކާއަށް ޖަމާވާނެ އެވެ. ރާއްޖެއިން 1،000 މީހުން މިއަހަރު ހައްޖަށް ދާނެ އެވެ.
