ފްރާންސްގެ ރައީސް އިމަނުއެލް މެކްރޮން އާއި އޭނާގެ އަނބިކަނބަލުން ބްރިޖިޓް މެކްރޮންއާ ދެމެދު ހިނގީ ސަމާސާއެއް ކަމަށް، މެކްރޮން ވިދާޅުވެއްޖެ އެވެ.

ދެކުނު އޭޝިއާ އަށް ކުރައްވާ ދަތުރުފުޅެއްގައި މެކްރޮން ވިއެޓްނާމަށް ވަޑައިގެންނެވި ދަތުރުގައި، ބޯޓުން ފޭބުމުގެ ކުރިން އޭނާގެ އަނބިކަނބަލުން މެކްރޮންގެ މޫނު މަތީގައި ޖަހާ މަންޒަރު ފެންނަ ވީޑިއޯ އެއް ވަނީ ސޯޝަލް މީޑިއާ ގައި ދައުރުވެފަ އެވެ. އަދި އެ ވީޑިއޯ އަށް ވަނީ ފްރާންސްގެ އަދި ބައިނަލްއަޤުވާމީ މީޑިއާ ތަކުގައި ޚާއްސަ ސަމާލުކަމެއް ލިބިފަ އެވެ. 

މެކްރޮން ބޯޓުން ފައިބައި ވަޑައިގެންނެވުމުގެ ކުރިން ބޯޓުގެ ދޮރު ހުޅުވާލި ވަގުތު، ބްރިޖިޓް މެކްރޮންގެ މޫނު މަތީގައި އަތުން ޖެއްސެވުމަށް ފަހު، ފަހަތަށް ޖެހޭ މަންޒަރު ފެނެ އެވެ. އަދި މެކްރޮން ވެސް އަތުން އިޝާރާތަކެއް ކުރައްވައި، ފަހަތަށް ޖެހި ވަޑައިގަންނަވާ މަންޒަރު ފެނެެ އެވެ. 

ފްރާންސްގެ މީޑިއާ ތަކުގައި އެކަމާ ގުޅިގެން ގިނަ ސުވާލުތަކެއް އުފައްދާފައިވާއިރު، "އެއީ ތަޅައިގަތުމެއް ތޯ ނުވަޔަ މަޖާ ކުރުމެއް ތޯ"، މި ސުރުހީގެ ދަށުން ވަނީ އެ ވާހަކަތައް ގެނެސްފަ އެވެ. 

އެކަމާ ގުޅިގެން މެކްރޮން ވިދާޅުވީ، އޭނާ އާއި އަނބިކަނބަލުންގެ ދެ މެދުގައި ހިނގީ މަޖާ ކުުރުމެއް ކަމަށާއި، މިހާރު އެކަން ދުނިޔޭގެ ސަމާލު ކަމަށް އައިސްފައިވާ ކަމަށެވެ. އަދި އެކަމަކީ މައްސަލައެއްގެ ގޮތުގައި ދައްކާފައިވާ ކަމަށް ވެސް މެކްރޮން ވިދާޅުވި އެވެ. 

އެކަމާ ގުޅިގެން ފްރާންސް ރައީސްގެ އޮފީހުން ވެސް ބުނެފައި ވަނީ އެއީ ދަތުރުން ފޭބުމުގެ ކުރިން މެކްރޮން އާއި އަނބިކަނބަލުންނާ ދެމެދު ހިނގި މަޖާ ކުރުމުގެ ކަމެއް ކަމަށެވެ. 

މެކްރޮން އާއި ބްރިޖިޓް ކައިވެނި ބައްލަވައިގެންފައި ވަނީ 2007 ވަނަ އަހަރު އެވެ. މެކްރޮން އާއި ބްރިޖިޓްގެ ލޯބީގެ ގުޅުން ފެށިފައި ވަނީ، ބްރިޖިޓް ސްކޫލެއްގައި ޓީޗަރެއްގެ ގޮތުގައި މަސައްކަތް ކުރެއްވި އެވެ. އޭރު މެކްރޮން ވަނީ ދަރިވަރެކެވެ. އޭރު ވެސް ބްރިޖިޓްގެ ތިން ކުދިން ތިބި ނަމަވެސް، ފަހުން ވަނީ އެ ކައިވެނި ރޫޅާލައްވައި، މެކްރޮންއާ ކައިވެނި ބައްލަވައިގެންފަ އެވެ. 

މެކްރޮން މިހެން ވިދާޅުވި ނަމަވެސް، ބޯޓުން ފައިބައި ވަޑައިގަންނަވަމުން، އަތުގައި ހިއްޕެވުމަށް މެކްރޮން ބްރިޖިޓް އަށް އަތް ދިއްކޮށްލި ނަމަވެސް، އެކަމާ ބްރިޖިޓް ދެކޮޅު ހައްދަވާކަން ވެސް ވީޑިއޯ އިން ފެނެ އެވެ. 

މެކްރޮން އާއި ބްރިޖިޓް އަކީ އުމުރު ވެސް ތަފާތު ދެމަފިރިންނެވެ. އަދި އުމުރުން މާ ދޮށީ ބޭކަނބަލާ މެކްރޮން ކައިވެނި ކުރެއްވުމުން އެކަމަށް ވެސް ގިނަ ބަޔަކު ވަނީ ފާޑު ކިޔައިފަ އެވެ. މެކްރޮން އަށް ވުރެ އޭނާގެ އަނބިކަނބަލުން ބްރިޖިޓް 25 އަހަރު ދޮއްޓެވެ.