ކޯޓުތައް ކޮންޓްރޯލް ކުރުމަށް ފުރަތަމަ ކުރި ކަމަކީ ރައްޔިތުންގެ މަޖިލިސް މެންބަރުންގެ އަނގައިގާ ތަޅުއަޅުވާ އެބޭފުޅުން ކިރިޔާވެސް ގަޔާނުވާ ކަމެއް ކުރެވިއްޖެއްޔާ ޕާޓީން ކަނޑާލާ ހިސާބުން މެންބަރުގެ ގޮނޑި ގެއްލޭނެ ގޮތަށް އެ ބާރުވެރިކަން ނެންގެވީ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ބިގޭ ވިދާޅުވީ މަޖިލިސްގެ ސުޕަ މެޖޯރިޓީ ސަރުކާރުގައި މިވަގު އޮތުމާއެކު ވެރިކަމުގެ ބާރާއި މަޖިލިސްގެ ބާރު އޮއްވާ ފެނިގެން ދިޔައީ މިނިވަންކޮށް އޮތް އަދުއިންސާފުގެ ބާރުގެތެރެއަށް އަތްބާނަން ފެއެއްޓެވިތަން ކަމަށެވެ.

އެގޮތުން ބިގޭ ފާހަގަކުރެއްވީ މަޖިލިސް މެންބަރުންގެ ގޮނޑިތަކާއި ގުޅޭ ގޮތުން އެޅުވި ތަޅު ނައްޓުވާލުމަށްޓަކައި އަމިއްލަ ފަރާތަކުން ހުށަހެޅި މައްސަލައެއް ސުޕްރީމްކޯޓުގައި ހިނގަމުން ދަނިކޮށް އެމައްސަލައިގެ ތެރެއަށް މުފޫޒު ފޯރުވިތަން ކަމަށެވެ.

މީގެ އިތުރުން ބިގޭ ވިދާޅުވީ، މިހާރު އޮތް ފިކުރުގެ ވެރިކަމުން ފެންނަނީ މިނިވަން މުވައްސަސާތަކުގެ ބާރު އަމިއްލަ މުށުތެތެރެއަށް ނެންގެވިތަން ކަމަށެވެ. އަދި އެ ބާރުތަށް ނެންގެވުމަށް ކަން ކުރެއްވީވެސް ވަރަށް ހުދުމުހުތާރު ހުތުރުކޮށް ކަމަށް ބިގޭ ފާހަގަކުރެއްވިއެވެ.

އިންތިހާބުތަކުގެ ވާހަކަ ދައްކާއިރު ފުރަތަމަ ކަމަކަށް އިލެކްޝާން ކޮމިޝަން މިނިވަން ކުރަންޖެހޭ ކަން ފާހަގަކުރަށްވާ ބިގޭ ވިދާޅުވީ އަދުލު އިންސާފުގެ ދާއިރާވެސް މިނިވަން ކުރަން ޖެހޭ ކަމަށެވެ. އަދި ފަސް އަހަރުގެ ކުރު މުއްދަތަކަށްޓާކައި މިރާއްޖެ ގެނބިގެން ދިޔަ ނުދެއްވަން އެ މުވައްސަސާތަކުގެ ވެރިންނަށް ބިގޭ ވަނީ ގޮވާލާފައެވެ.

ބިގޭ ވިދާޅުވީ އެންމެ ބޮޑު ފާރަވެރި އަދި ޖަވާބުދާރީ ކުރުވަން އޮންނަ ޕާޓީގެ ހައިސިއްޔަތުން ކަން އިންސާފުގެ މަގުން ގެންދިއުމަށްޓަކައި ކުރަންޖެހުނު ކޮންމެ ކަމެއް ކުރާނަން ކަމަށެވެ. އަދި އިންތިހާބުތަށް ކަށަވަރު ކުރެވިގެން ނޫނީ ރައްޔިތުންގެ ހައްގުތައް ކަށަވަރުވާނެ އްވެސް ގޮތެއް ނޯންނާނެ ކަމަށާއި މިމަހަށް އެކަނި ބެލިޔަސް އެއްހާހަށްވުރު ގިނަ ވަޒީފާ އިއުލާން ކޮށްފައިވާކަމަށް ބިގޭ ވިދާޅުވިއެވެ. އޭގެ އިތުރުން ސިޔާސީ މުވައްޒަފުންގެ އަދަދު ނޭންގޭ ކަމަށާއި ޖަވާބުދާރީ ކުރުވޭނެ ގޮތެއްވެސް އަދި ނެތްކަން ބިގޭ ފާހަގަކުރެއްވިއެވެ.

މުވައްޒަފުންގެ އަނގަ ބަނދެ އަޅުވެތިކޮށްފައި ބައިތިއްބައިގެން އެބޭފުޅުންނަށްވެސް މަޖުބޫރުކޮށްގެން ވޯޓު ލުމުގެ ވިސްނުން އެބަގެންގުޅުއްވާކަމަށާއި އެކަންކަންވެސް "މައިތިރި" ކުރަންޖެހޭ ކަމަށް ބިގޭ ވިދާޅުވިއެވެ.