ސިޔާސީ މީހުންނަށް ކުރާ ޚަރަދު، ދައުލަތުގެ އެންމެ ބޮޑު ސިއްރަށް!
ސަރުކާރުގެ އެކި ފަންތީގެ މީހުންނަށް ތަކުރާުރކޮށް ސުވާލުކޮށްގެން ވެސް، ޖަވާބު ނުލިބުނު ސުވާލަކީ ސިޔާސީ މުވައްޒަފުންގެ އަދަދު ހާމަ ނުކުރަނީ ކީއްވެތޯ ކުރާ ސުވާލެވެ. އެ މީހުންގެ އަދަދާއި ޚަރަދުގެ ތަފްސީލް ދޭނެ މީހަކު ނެތެވެ. މިއީ ދައުލަތުގެ އެންމެ ބޮޑު ސިއްރޭ ހީވާ ކަހަލަ އެވެ.
ރައީސުލްޖުމްހޫރިއްޔާ ޑރ.މުަހައްމަދު މުއިއްޒު
ސިޔާސީ މުވައްޒަފުންގެ މައުލޫމާތު ނޫސްވެރިންނަށް ލިޔުމަކުން ދިނުމަށް ފިނޭންސް މިނިސްޓަރު މޫސާ ޒަމީރަށް އަންގަވާނެ ކަމަށް ރައީސް ވިދާޅުވިތާ އަދި މާ ގިނަ ދުވަހެއް ނުވެއެވެ. ހަމަގައިމު ވެސް އަދި ދިވެހިން ހަނދާން ނެތޭހާ ދުވަހެއް އެ ފަހުން ނުވެއެވެ.
އެމްޑީޕީގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކު އަހުމަދު އީސާ، ސިޔާސީ މީހުންގެ މުސާރަ އާއި އިނާޔަތުގެ ގޮތުގައި ހޭދަ ކުރާ މިންވަރު ހާމަކުރުމަށް އާރްޓީއައި ހުށަހެޅުމުން ފިނޭންސް މިނިސްޓްރީން އެ މައުލޫމާތު ދީފަ އެއް ނުވެއެވެ. ފިނޭންސް މިނިސްޓްރީން ބުނެފައި ވަނީ އެ މައުލޫމާތު ސީދާ ގޮތެއްގައި ބަލަހައްޓަމުން ނުދާ ކަމަށެވެ. އަޖައިބު ހައިރާނެއް ނުވާނެތޯއެވެ. މިއީ ފެނޭންސް މިނިސްޓަރ ނޫނީ ރައީސަކަށް ހުންނަވާ ބޭފުޅަކު ބޭނުންވީމަ ރައްކާކުރައްވާފަ ބޭނުންވީމަ ނުކޮށް ދޫކޮށްލުމުގެ އިޚުތިޔާރު އޮތް ކަމެއް ނޫނެވެ.
މިއީ މާލިއްޔަތު ޤާނޫނާއި އެއްގޮތަށް ކުރުން ލާޒިމުކަމެކެވެ. އެހެނަސް މިހާރު ސިޔާސީ މީހުންނަށް ކުރާ ޚަރަދު، ދައުލަތުގެ އެންމެ ބޮޑު ސިއްރަށް މި ވަނީ ވެފައެވެ. މި މައުލޫމާތު ނުދޭން ނިންމި ނިންމުން އެޕީލްކޮށްފައިވާ އިރު އެ މައުލޫމާތު ނުދޭ ނަމަ އެ ނިންމުން އައިކޮމްގައި އެ ޖަވާބު އެޕީލް ކުރާނެ ކަމަށް އައިކު ވަނީ ވިދާޅުވެފައެވެ. އަދި މި މައްސަލަ ކޯޓަށް ވެސް ވަނީ ހުށަހަޅާފައެވެ. އެކަމަކު އާދޭސްކޮށްގެން ވެސް މި ޚަރަދުގެ މައުލޫމާތު ނުލިބޭކަން މިއީ ފެންނަން އޮތް ހަގީގަތެވެ.
އަޑަށް ބާރުލައްވާފައި ސިޔާސީ މުވައްޒަފުންގެ މައުލޫމާތު ނޫސްވެރިންނަށް ލިޔުމަކުން ދިނުމަށް ފިނޭންސް މިނިސްޓަރު މޫސާ ޒަމީރަށް އަންގަވާނެ ކަމަށް ރައީސް މުހައްމަދު މުއިއްޒު ވިދާޅުވީ މިމަހުގެ ތިންވަނަ ދުވަހު ބޭއްވި ދިގު ރޫސްވެރިންގެ ބައްދަލުވުމުގައެވެ. އެކަމަކު އަމަލު މި ހިނގަނީ އެއާއި ދިމާ އިދިކޮޅަށެވެ.
ސަރުކާރުގެ އެކި ފަންތީގެ މީހުންނަށް ތަކުރާުރކޮށް ސުވާލުކޮށްގެން ވެސް، ޖަވާބު ނުލިބުނު ސުވާލަކީ ސިޔާސީ މުވައްޒަފުންގެ އަދަދު ހާމަ ނުކުރަނީ ކީއްވެތޯ ކުރާ ސުވާލެވެ. އެ މީހުންގެ އަދަދާއި ޚަރަދުގެ ތަފްސީލް ދޭނެ މީހަކު ނެތެވެ. އަދި އެ އަދަދު ހާމަކުރުމަށް ނޫސްވެރިން ކުރާ އާދޭހަށް ބީރު ކަންފަތެއް ދެނީ ކީއްވެތޯއެވެ. ފޮރުވާނެ ކަމެއް ނެތް ނަމަ، ރައީސް ވިދާޅުވާހެން އެހާ ހާމަކަން ބޮޑު ނަމަ މިފަދަ މައުލޫމާތެއް ނޭނގިގެން މިހާ ހާލުގައި އުޅޭކަށް ނުޖެހޭނެ ނޫންތޯއެވެ؟
