އެމްއޯސީގެ ރައީސް ކަމަށް ކުރިމަތިލެއްވީ ސައްތާރު

މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ ރައީސް ކަމުގެ މަޤާމަށް، މިހާރު ވެސް އެ މަޤާމުގައި ހުންނެވި މުޙައްމަދު ޢަބްދުއް ސައްތާރު (ޗަމްޕީ) ކުރިމަތި ލައްވައިފި އެވެ.

އެމްއޯސީ އިން ވަނީ ވަނީ އައު ދައުރުގެ ހިންގާ ކޮމެޓީ ހޮވުމަށް ބާއްވާ އިންތިޚާބުގައި ކުރިމަތިލާފައިވާ ކެންޑިޑޭޓުންގެ ނަންތައް އިއުލާން ކޮށްފަ އެވެ.

އެ އިއުލާންގެ މުއްދަތު ހަމަވެފައިވާއިރު، 2025 ވަނަ އަހަރުން، 2029 ވަނަ އަހަރަށް އިންތިޚާބު ކުރާ ހިންގާ ކޮމެޓީގެ ރައީސް ކަމުގެ މަޤާމަށް ކުރިމަތިލެއްވީ ސައްތާރު އެކަންޏެވެ. އެހެންވެ، ސައްތާރަށް ރައީސް ކަމުގެ އިތުރު ދައުރެއް ކަށަވަރުވާނެ އެވެ.

ސައްތާރަކީ ސްވިމިން އެސޯސިއޭޝަން އޮފް މޯލްޑިވްސްގެ ރައީސް އެވެ. މިވަގުތު ސައްތާރު އަންނަނީ ސްވިމިން އެސޯސިއޭޝަންގެ ރައީސް ކަމުގެ ހަތަރު ވަނަ ދައުރު ފުރިހަމަ ކުރަމުންނެވެ. އެންމެ ފަހުން އޮތް އިންތިޚާބުގައި ރައީސް ކަމަށް ކުރިމަތިލެއްވީ ވެސް ސައްތާރު އެކަންޏެވެ.

މީގެ އިތުރުން އެމްއޯސީގެ ނައިބު ރައީސް ކަމުގެ މަޤާމަށް ވަނީ ތިން ފަރާތަކުން ކުރިމަތި ލައްވައިފަ އެވެ. އެގޮތުން ދެ ނައިބު ރައީސުން ހޮވާއިރު، އެ މަޤާމަށް ކުރިމަތިލައްވާފައި ވަނީ މިހާރު ވެސް އެމްއޯސީގެ ނައިބު ރައީސް ކަމުގައި ހުންނެވި އަޙުމަދު އިސްމާއީލްގެ އިތުރުން، އެތުލެޓިކްސް އެސޯސިއޭޝަން އޮފް މޯލްޑިވްސްގެ ފަރާތުން މުސްތަފާ މުޙައްމަދު އަދި ޗެސް އެސޯސިއޭޝަން އޮފް މޯލްޑިވްސްގެ ފަރާތުން އަޙުމަދު މުންތަޤިމް އެވެ. މުންތަޤިމް އަކީ މިވަގުތު ވެސް އެމްއޯސީގެ ނައިބު ރައީސް އެކެވެ،

މީގެ އިތުރުން ދެން އެމްއޯސީގެ ހިންގާ ކޮމެޓީ އަށް އިންތިޚާބު ކުރާނީ އޮލިމްޕިކް ސްޕޯޓްސް އިން ހަ މެމްބަރުން، ނޮން އޮލިމްޕިކް ސްޕޯޓްސް އިން ދެ މެމްބަރުން، އަންހެން ދެ މެމްބަރުން އަދި އެތުލީޓްސް ކޮމިޝަން ތަމްސީލު ކުރުމަށް މެމްބަރެކެވެ.

އެންމެ ފަހުން އެމްއޯސީގެ ހިންގާ ކޮމެޓީގެ އިންތިޚާބު ބާއްވާފައި ވަނީ 2021 ވަނަ އަހަރު އެވެ. އެ ފަހަރު އިންތިޚާބު ކުރި ހިންގާ ކޮމެޓީގެ ދައުރު މި އަހަރު ހަމަވާނެ އެވެ.

އައު ދައުރަށް ހިންގާ ކޮމެޓީ އިންތިޚާބު ކުރުމަށް ބާއްވާ އިންތިޚާބު އޮންނާނީ، ޖޫން މަހުގެ ދެ ވަނަ ދުވަހު އެވެ. އެމްއޯސީ އިން ހާމަކޮށްފައިވާ ގޮތުގައި އިންތިޚާބުގައި ވާދަކުރުމަށް 10 ފަރާތަކުން ވަނީ ހުށަހަޅައިފަ އެވެ. އޭގެ ތެރެއިން އެއް ފަރާތުން ވަނީ ހުށަހެޅުން އަނބުރާ ގެެންގޮސްފަ އެވެ.