އަނަސްގެ މަރު: ދައުވާ ލިބޭ މީހުން ޝަރީއަތް ނިމެންދެން ބަންދުގައި ބަަހައްޓަން ނުޖެހޭ ކަމަށް އަނެއްކާ ނިންމައިފި
އެ މީހުން ކުށް ކުރިކަމަށް ތުހުމަތުކުރެވޭ މިންވަރަށް ހެކި ހުރިކަމަށް ބުރަވެވޭ ފަދަ ތަފްސީލެއް ދައުލަތުން ހުށަހަޅާފައިނުވޭ
އަނަސްގެ މަރުގެ މައްސަލައާ ގުޅިގެން ކުރިއަށް ގެންދިޔަ އަޑު އެހުމެއްގެ ތެރެއިން- ފައިލް ފޮޓޯ
ރ.މީދޫ ފެންފިޔާޒުގޭ މުހައްމަދު އަނަސް މަރުގެ މައްސަލައިގައި ދައުވާ ލިބޭ ހަތް މީހުން ޝަރީއަތް ނިމެންދެން ބަންދުގައި ބަަހައްޓަން ނުޖެހޭ ކަމަށް ހައިކޯޓުން އަނެއްކާ ވެސް ނިންމައިފިއެވެ.
އަނަސްގެ މަރުގެ މައްސަލައިގައި ދައުވާ ކޮށްފައިވަނީ، ދަފްތަރު ނަމްބަރު 1746 ސިމާހު މޫސާ، ސ. ފޭދޫ ވެސްޓަންވިލާ ހަސަން މަހްފޫޒް، ތ. ކިނބިދޫ ގުލްފާމުގޭ މުހައްމަދު ޝާޒް، ލ. ގަން ތުނޑީ، ނަންނާރިގެ ޖުނައިހު އަބްދުﷲ، މ. ދިމިޝްގު އުސްމާން ޝަރީފް، ޅ. ކުރެންދޫ އަސުރުމާގޭ އަހުމަދު ޒަޔާން އަދި މ. ލޮނުމިދިލިގޭ އަފްރާހު އަބްދުލް ރައްޒާގަށެވެ.
ނަމަވެސް މި ހަތް މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ވަނީ ނިންމާފައެވެ. އެއީ ދައުލަތުން ހުށަހެޅި ހެއްކާއި ގަރީނާއަށް ބަލާއިރު، އެ ކުށުގައި ބައިވެރިވިކަން އެކަށީގެންވާ ޝައްކެއްނެތް މިންވަރަށް ސާބިތުކުރެވިފައިނުވާތީއެވެ.
މި ނިންމުމާ ގުޅިގެން ދައުލަތުން މި މައްސަލަ ހައިކޯޓުގައި އިސްތިއުނާފު ކުރިއެވެ. އަދި 7 މީހުން ވެސް ޝަރީއަތް ނިމެންދެން ބަންދު ކުރުމަށް އެދުނެވެ. ނަމަވެސް 11 މާރިޗް 2025 ގައި ބޭއްވި އަޑު އެހުމުގައި ހައިކޯޓުން ނިންމާފައިވަނީ އެ މީހުން ބަންދު ކުރަންޖެހޭ ހާލަތެއް ނެތް ކަމަށެވެ.
ހައިކޯޓުގެ މި ނިންމުމާއި ގުޅިގެން ދައުލަތުން މައްސަލަ ސުޕްރީމް ކޯޓަށް ހުށަހެޅިއެވެ. އަދި ސުޕްރީމް ކޯޓުން މައްސަލަ ބެލުމަށްފަހު ނިންމީ ހައިކޯޓުން އަލުން ގޮތެއް ކަނޑައެޅުމަށެވެ. އެގޮތުން ބުދަ ދުވަހު ހައިކޯޓުގައި ކުރިއަށް ގެންދިޔަ އަޑު އެހުމުގައި ނިންމާފައިވަނީ އަނަސް މަރުގެ މައްސަލައިގައި ދައުވާ ލިބޭ ހަތް މީހުން ޝަރީއަތް ނިމެންދެން ބަންދުގައި ބަަހައްޓަން ނުޖެހޭ ކަމަށެވެ.
ހައިކޯޓުން ނިންމި ނިންމުމުގައި ބުނެފައިވަނީ ދައުވާލިބޭ މީހުން އެ ކުށް ކުރިކަމަށް ތުހުމަތުކުރެވޭ މިންވަރަށް ހެކި ހުރިކަމަށް ބުރަވެވޭ ފަދަ ތަފްސީލެއް ދައުލަތުން ހުށަހަޅާފައިނުވާ ކަމަށެވެ. އެހެންކަމުން އެ މީހުން ޝަރީއަތް ނިމެންދެން ބަންދުކުރަން އަމުރު ނުކުރެވޭނެ ކަމަށެވެ.
މި ނިންމުން ނިންމާފައިވަނީ މިމައްސަލަ ބެއްލެވި ތިން ފަނޑިޔާރުންގެ އިއްތިފާގުންނެވެ.
މި މައްސަލައިގައި ތޫނު އެއްޗެއް ބޭނުން ކޮށްގެން ގަސްތުގައި މީހަކު މެރުމުގައި ބައިވެރިވުމުގެ ދައުވާ އުފުލާފައިވާ 4 މީހުންނާއި، އަނަސްއަށް ހަމަލާ ދިނުމުގައި އަމަލީ ގޮތުން ބައިވެރިވި ކަމުގެ ދައުވާ ލިބޭ 3 މީހުންގެ މައްޗަށް ކުށް ސާބިތުނުވާކަމަށް ކްރިމިނަލް ކޯޓުން ހުކުމް ކޮށްފައިވަނީ 25 މެއި 2024 ވީ އާދިއްތަ ދުވަހުގެރޭގައެވެ.
މި މައްސަލަ ބެއްލެވި ގާޒީ ވިދާޅުވީ، އެމީހުން މިކަމުގައި ބައިވެރިވުމުގެ އަމަލު ސާބިތު ކޮށްދިނުމުގެ ސީދާ ހެއްކެއްގެ ގޮތުގައި ހުރީ ހަމައެކަނި ސީސީޓީވީ ފުޓޭޖް ކަމަށެވެ. އެ ފުޓޭޖުތަކަށް ބާރު ލިބިދޭ ހެކީގެ ނިސްބަތަށް ބަލާއިރު، އެމީހުން އެކަމުގައި ބައިވެރިވި ކަމާއި، ފުޓޭޖުތަކުން ފެންނަނީ އެމީހުންކަމަށް ނިންމަން ދަތިކަމަށް ގާޒީ ވިދާޅުވެފައިވެއެވެ.
އަނަސް މަރާލާފައިވަނީ، 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެރެއެވެ. އަނަސް މަރާލާފައިވަނީ އޭނާ ފަހާ ދުވަމުން ގޮސް، ލިޓަސް ސަރވިސް ސެންޓަރު ތެރެއަށް އޭނާ ވަނުމުން، ފަހަތުން ގޮސް ހަމަލާދީގެންނެވެ.
ތޫނު ހަތިޔާރު ބޭނުންކޮށްގެން އަނަސްގެ ހަށިގަނޑުގެ އެކި ތަންތަނަށް ހަމަލާދީފައިވާއިރު، ހޮސްޕިޓަލަށް ގެންދިޔައިރުވެސް އޭނާ އޮތީ މަރުވެފައެވެ.
