އޮކްޓޫބަރު 3 އަށް ތައްޔާރު ވުމުގެ ގޮތުން އެމްޑީޕީން ސައިކަލު ބުރެއް ބާއްވައިފި
އޮކްޓޫބަރު މަހުގެ ތިން ވަނަ ދުވަހު ލޫޓުވައިފި ލޫޓުވައިފި ބޮޑު ހަރަކާތެއް ބޭއްވުމަށް ތައްޔާރުވަމުންދޭ
އެމްޑީޕީން ބޭއްވި ސައިކަލު ބުރު
ލޫޓުވައިފި، ލޫޓުވައިފި" ބޮޑު އެއްވުމަށް ތައްޔާރުވުމުގެ ގޮތުން އެމްޑިޕީން މާލޭގައި ސައިކަލު ބުރެއް ބާއްވައިފި އެވެ.
ހޮނިހިރު ދުވަހު ހަވީރު މާލޭގައި ކުރިއަށް ގެންދިޔަ މި ހަރަކާތަކީ އަންނަ އޮކްޓޫބަރު މަހުގެ ތިން ވަނަ ދުވަހު އެ ޕާޓީން ބޭއްވުމަށް ތައްޔާރުވަމުން ދާ "ލޫޓުވައިފި ލޫޓުވައިފި" ބޮޑު ހަރަކާތަށް ތައްޔާރުވުމަށާއި އަދި އެހަރަކާތުގައި ވީހާވެސް ގިނަބަޔަކު ބައިވެރިކުރުމަށް ހިތް ވަރުދިނުމަށް ގޮވާލާ ހިންގި ހަރަކާތެއް ކަމަށް އެމްޑީޕީން ބުނެއެވެ.
އެމްޑީޕީގެ މި ހަރަކާތުގައި ވާހަކަދެއްކި މީހަކު ބުނީ، މި ހަރަކާތްތަކެއް ނުހުއްޓުވޭނެ ކަމަށާއި ރާއްޖޭގެ ހުރިހާ ޒުވާނުން ނިކުންނަން ޖެހޭ ކަމަށެވެ. އަދި މިއަދު ނުކުރި މަސައްކަތެއް މާދަމާ ނުކުރެވޭނެ ކަމަށާއި ޒުވާނުން ގާފިލް ކަންމަތީ ތިބެއްޖެ ނަމަ މިގައުމު އަތެއް ނުވާނެ ކަމަށް އޭނާ ބުންޏެވެ.
އަޅުގަނޑު ދަންނަވާނީ ނުހުއްޓުވޭނޭ، ލޫޓުވާފައޭ އޮތީ، ބުނާނެ ލިޔާނޭ ކިޔާނޭ ހޯދާނެ އެވާހަކަ ދައްކާނޭ. ކިތަންމެ ވަރަކަށް އުޅުނަސް ނިމޭނޭ ނިންމާނޭ. ރާއްޖޭގެ ޒުވާނުންނޭ މިއަދު ތިޔަ ކުދިން ނިކުންނާށޭ މިއަދު ނުކުރި މަސައްކަތެއް މާދަމައަކު ނުކުރެވޭނޭ. ޒުވާނުން ގާފިލް ކަންމަތީ ތިބެއްޖެ ކަމުގަ ވާނަމަ މިގައުމު އަތެއް ނުވާނެ.އެމްޑީޕީގެ ހަރަކާތުގައި ވާހަކަދެއްކި މީހެއް
އެމްޑީޕީގެ މި ހަރަކާތުގައި އެޕާޓީގެ އިސް ސަފުގައި ހަރަކާތްތެރިވާ ގިނަ އަދަދެއްގެ ބޭފުޅުން ވަނީ ބައިވެރިވެފަ އެވެ. އެގޮތުން މިވަގުތު ރައްޔިތުން މަޖިލީހުގައި ކުރީގެ މެމްބަރުންނާއި ލީޑަރޝިޕްގެ އިސް ސަފުގައި ހަރަކާތްތެރިވާ ބައެއް ފަރާތްތަކުން ވަނީ ބައިވެރިފައެވެ.
އެމްޑީޕީގެ ގިނަ ހަރަކާތްތެރިންނާއި ސަޕޯޓަރުން ބައިވެރިވި މި ހަރަކާތުގައި އަދުގެ ސަރުކާރުން ގާނޫނު އަސާސީ އަށާއި ގާނޫނުތަކަށް ބަދަލުތައް ގެނެސް ރައްޔިތުންގެ އެންމެ އަސާސީ ހައްގުތަކަށް އަރައިގަންނާތީ އެކަމާ ނުރުހުން ފާޅުކޮށްފައި ވެއެވެ.
މި ހަރަކާތުގެ ތެރޭން މާލޭގެ ބޮޑެތި މަގުތަކުގައި، އަންނަމަހު 3 ވަނަ ދުވަހު މާލޭގައި، 'ލޫޓުވައިފި، ލޫޓުވައިފި' ނަމުގައި ބޭއްވުމަށް ތައްޔާރުވަމުންދާ ބޮޑު އެއްވުމަށް ތައްޔާރު ކޮށްފައިވާ ޚާއްސަ ލަވަ ޖެހުމާއި އެކު އެ އެއްވުމުގައި ވީހާވެސް ގިނަ ބަޔަކު ބައިވެރިވުމަށް ދައުވަތު ދީފައިވެ އެވެ.
