މިއަދަކީ ބިރުވެރި ދުވަހެއް، ނާއިންސާފު ލިބޭތަން ބަލަން ދިވެހިންނެއް ނުތިބޭނެ - އާޒިމް
މި ދެ ފަނޑިޔާރުން ވަކިކުރަން މަޖިލީހުގެ ތަޅުމުގައި ނެގި ވޯޓުގައި އަޒްމިރަލްދާ އާއި މަހާޒު ވަކިކުރަން ފެންނަ ކަމަށް 68 މެންބަރަކު ވަނީ ވޯޓު ދީފަ
ފަލަސުރުހީ ޕްރޮގްރާމްގައި މާލެސިޓީގެ މޭޔަރު އާދަމް އާޒިމް ވާހަކަދައްކަވަނީ
މިއަދަކީ ބިރުވެރި ދުވަހެއް ކަމަށާއި ނާއިންސާފު ލިބޭތަން ބަލަން ދިވެހިންނެއް ނުތިބޭނެ ކަމަށް މާލޭ ސިޓީގެ މޭޔަރ އާދަމް އާޒިމް ވިދާޅުވެއްޖެ އެވެ.
އާޒިމް މިހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި، ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު މަހާޒް އަލީ ޒާހިރު ރާއްޖޭގެ ގާނޫނުތަކާއި ހިލާފަށް ފަނޑިޔާރު ކަމުން ވަކިކުރުމާއި ގުޅޭގޮތުން ވާހަކަދައްކަވަމުންނެވެ.
އާޒިމް ވިދާޅުވީ އަދުލު އިންސާފުގެ ހައްގަކީ ދިވެހިން ވަރަށް އުނދަނގުލުން ހޯދި ހައްގެއް ކަމަށެވެ. އަދި ކުރީގެ ރައީސް އިބްރާޙިމް މުހައްމަދު ޞާލިހުގެ ސަރުކާރުގައި ޝަރުޢީ ދާއިރާ އަށް އިތުބާރު ހޯދާދެވުނު ކަމަށް ސިފަކުރައްވާ އާޒިމް ވަނީ އެ ހައްގުތައް ލިބުނު ދުވަސް މިހާރު މާޒީ ވެފައިވާ ކަމަށް ވިދާޅުވެފަ އެވެ. އަދި މިއަދު އާއްމުން އިންސާފު ހޯދަން ދާނެ ތަނެއް ނެތް ކަމަށް ވެސް އާޒިމް ވަނީ ވިދާޅުވެފަ އެވެ.
ކުރިން ދަށު ކޯޓުތަކުން އިންސާފު ނުލިބުމުން ސުޕްރީމް ކޯޓުން އިންސާފު ލިބޭނެ ކަމަށް އުންމީދު ކުރި ނަމަވެސް އެ ކަން ދެން ނުވާނެ ކަމަށް އާޒިމް ވަނީ ފާހަގަކުރައްވާފަ އެވެ. ދެން އަނެއްހާވެސް އިންސާފު ހޯދަން ނިކުންނަން ޖެހޭނީ މަގުމައްޗަށް ކަމަށް އާޒިމް ވަނީ ވިދާޅުވެފަ އެވެ. އާޒިމް ވަނީ ދިރި ހުރިހާ ދުވަހަކު އަނިޔާވެރިކަމާއި ދެކޮޅަށް ނުކުންނަ ފުރަތަމަ މީހަކަށް ވާނެ ކަމަށް ވެސް ވިދާޅުވެފަ އެވެ. އިންސާފު ނުލިބޭނެކަން ޔަޤީންވުމަކީ ވަރަށް ހިތްދަތިވާކަމެއް ކަމަށް އާޒިމް ވިދާޅުވި އެވެ. އަބަދުވެސް އިންސާފު ލިބޭނެކަން ދިވެހިންނަށް އިހުސާސްވާން ޖެހޭ ކަމަށާއި އެކަން އެގޮތަށް ވަމުން ނުދާ ކަމަށް އާޒިމް ވިދާޅުވި އެވެ.
ރައްޔިތުން ނުތިބޭނެ މިހެން ނާއިންސާފު ލިބޭ އިރު ބަލަހައްޓައިގެން. އަޅުގަނޑު މިއަދުވެސް ބުނަން ބޭނުންވޭ ޔުމްނުގެ ހާދިސާގަ ވެސް ފުލުހުން އޮޅުވާލި ކަމަށް ހުރިހާ ރައްޔިތުން ޤަބޫލުކުރޭ. އިންސާފު ހޯދަން ހުންނަ ތަންތަނުން ސަރުކާރާ ނުފޫޒު ގަދަ މީހުންގެ ހިމާޔަތުގައި މަސައްކަތް ކުރުމަކީ ވަރަށް ދެރަ ކަމެއް. އަޅުގަނޑަކީ އެއްބަނޑު އެއް ބަފާ ބޭބެ ޖަލަށް ލައިގެން މިނިވަން ކުރަން އެތައް ދުވަހަކު މަަސައްކަތް ކުރި މީހެއް. އެކަން ކުރީ ހަމައެކަނި ބޭބެ މިނިވަން ކުރާކަށް ނޫން. އެ ހައްގު ހޯދަން.މާލޭ ސިޓީގެ މޭޔަރ އާދަމް އާޒިމް
ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު މަހާޒް އަލީ ޒާހިރު ރާއްޖޭގެ ގާނޫނުތަކާއި ހިލާފަށް ފަނޑިޔާރު ކަމުން ވަކިކުރުން އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ވެސް ވަނީ ކުށްވެރިކޮށްފަ އެވެ.
މި ދެ ފަނޑިޔާރުން ވަކިކުރަން މަޖިލީހުގެ ތަޅުމުގައި ނެގި ވޯޓުގައި އަޒްމިރަލްދާ އާއި މަހާޒު ވަކިކުރަން ފެންނަ ކަމަށް 68 މެންބަރަކު ވަނީ ވޯޓު ދީފައެވެ. އަދި ނުފެންނަ ކަމަށް ވޯޓު ދީފައިވަނީ އެންމެ 11 މެންބަރުންނެވެ. އެއާއެކު އެ ދެ ބޭފުޅުން ވެސް ވަނީ ފަނޑިޔާރު ކަމުން ވަކިވެފަ އެވެ.
