ވަކި ބައެއް ހިމާޔަތްކޮށް ޔުމްނު އެކަނި ކުށްވެރިވާގޮތަށް ފުލުހުން މައުލޫމާތު ހާމަކުރި މައްސަލައަކީ ޕްރޮފެޝަނަލްކޮށް ތަހުގީގުކުރާ މައްސަލައެއް ކަމަށް ހޯމްލޭންޑް އެންޑް ސެކިއުރިޓީ މިނިސްޓަރ އަލީ އިހުސާން ވިދާޅުވެއްޖެއެވެ.

ހޯމަ ދުވަހުގެ ރޭ ކުރިއަށް ގެންދިޔަ "އަހާ" ފޯރަމުގައި ޔުންމު ވެއްޓުނު ހާދިސާއާއި ގުޅިގެން ރައުދު ހައްޔަރުކުރުން ލަސްވީ ކީއްވެގެންތޯ ބައިވެރިޔަކު ކުރި ސުވާލަށް ޖަވާބު ދެއްވަމުން މިނިސްޓަރ އިހުސާން ވިދާޅުވީ ޔުންމު ވެއްޓުނު މައްސަލަ ބަލަމުން އަންނަ ކަމަށާއި، މި މައްސަލައިގައި އެންމެ ފުރަތަމަވެސް ރެސްޕޮންޑްކޮަށްފައިވަނީ ވެއްޓުނު އަންހެން ކުއްޖެއްގެ މައްސަލައިގައި ކަމަށެވެ. މިނިސްޓަރ އިހުސާން ވިދާޅުވީ މި މައްސަލައިގައި ސީސީޓީ ފުޓޭޖްއަށް ބެލި އިރު އެ ފުޓޭޖުން ދެން ފެނުނީ ރައުދު އަހުމަދު ޒިލާލު ކަމަށާއި، އެހެންކަމުން އޭނާ ގެނެސް މަސްތުވާތަކެއްޗަށް ވެސް ޓެސްޓް ކުރެވުނު ކަމަށެވެ. އަދި އެއިރު ތަހުގީގު ފެށީ މަސްތުވާތަކެތީގެ ތަހުގީގެއްގެ ގޮތުގައި ކަމަށާއި، ފަހުން ލިބުނު މައުލޫމާތާއެކު ހައްޔަރު ކުރަންޖެހުނު ހިސާބުން ހައްޔަރުވެސް ކުރި ކަމަށެވެ.

މިނިސްޓަރ ވިދާޅުވީ ފުލުހުންގެ ތަހުގީގަކީ ޕްރޮގްރެސިވްކޮށް ލިބެމުންއަންނަ ހެކިތަކަށް ބަލާފައި ކުރަމުން އަންނަ ތަހުގީގެއް ކަމަށާއި އެއީ ހިތުލަފަޔަށް ހީކުރާ ކަންކަމަށް ކުރާ ކަމެއް ނޫން ކަމަށެވެ. މިނިސްޓަރ ވިދާޅުވީ ޕްރޮފެޝަނަލް ތަހުގީގެއް ކުރަމުންދާއިރު، ހެއްކާއި ގަރީނާގެ ތެރެއިން އަޅަންޖެހޭ ފިޔަވަޅުތަކެއް އަޅާނެ ކަމަށެވެ.

ނަމަވެސް މި މައްސަލައިގައި ފުރަތަމަ ނޫސްވެރިންނަށް ފުލުހުން މައުލޫމާތު ދިން އިރު، ޔުންމު ވެއްޓުނުރޭ ހ. ފެންޓޮނޯއީ ގޭގައި ރައުދު މަސްތުގެ ހާލަތުގައި އުޅުނުކަން ފުލުހުންނަށް އޮތީ އެނގިފައެވެ. އަދި ޔުމްނު ވެއްޓުމުގައި އޭނަގެ ބައިވެރިވުން އޮތްކަމާއި، ޔުންމު ވެއްޓުމުން ވެސް ފުލުހުންނަށް މައުލޫމާތު ނުދީ އޭނާ ބާއްވާފައި ދިޔަކަން ވެސް ފުލުހުންނަށް އެނގެއެވެ. އަދި ފުރަތަމަ ޕްރެސްގައި ޔުމްނު އަމިއްލައަށް ފުއްމާލިކަމަށް ފުލުހުން ބުނެ ވަކި ބަޔަކު ދިފާއުކުރަން މަސައްކަތް ކޮށްފައިވެއެވެ.

އަދި މަސްތުވާތަކެތި ބޭނުންކުރިކަން އެނގޭ އިރުވެސް ފުލުހުން ރައުދު ހައްޔަރުނުކޮށް ދޫކޮށްލާފައި ހުރުމުން އާންމުންގެ ޕްރެޝަރާއެކު ފުލުހުންގެ ރާގާއި ވާހަކަ ބަދަލުވެ އޭނާ ހައްޔަރުކުރީ 4 ދުވަސް ފަހުންނެވެ. މީގެ އިތުރުން މަސްތުވާތަކެއްޗާއެކު ޕާޓީކުރިކަމަށް ތުހުމަތުކުރެވޭ 8 މީހެއްގެ ވަނަވަރު އާންމުކުރި އިރު، އެ ޕާޓީގައި ޓްރާންސްޕޯޓް މިނިސްޓަރުގެ ދެ ކޮށްކޮ ހިމެނޭތީ އެ މައްސަލައަށް މިނިސްޓަރު އަމީން އަންނަނީ ނުފޫޒުވެސް ފޯރުވަމުންނެވެ.