ރާއްޖޭގައި ގިނަ ރިސޯޓުތަކެއް ހިންގާ ސަންލޭންޑު ކުންފުނީގެ އެއް ހިއްސާދާރުކަމުގައިވާ މުހައްމަދު ނަޒީރު (ސަންލޭންޑު ނަޒީރު) އަވަހާރަވެއްޖެ އެވެ.

ނަޒީރު އަވަހާރަވެފައި ވަނީ ހޮނިހިރު ދުވަހުގެ ރޭގެ ވަގުތެއްގައެވެ.

ނަޒީރަކީ ޓޫރިޒަމް ދާއިރާގައި ދިގު މުއްދަތަކަށް ޚިދުމަތް ކުރައްވާފައިވާ ހީވާގި ޚިދުމަތްތެރިއެވެ. އަދި ނަޒީރު އަކީ އަލް މަރްޙޫމް ޑރ. އަބްދުލް ބާރީގެ ބޮޑުބޭބޭ ފުޅުވެސް މެއެވެ.

މައުލޫމާތު ލިބިފައިވާ ގޮތުގައި ނަޒީރު އަވަހާރަވީ، އާލަސްކަންފުޅަށް އިނގިރޭސިވިލާތުގައި ފަރުވާ ހޯއްދަވަމުން ގެންދަވާތާ ދުވަސްކޮޅެއް ފަހުންނެވެ.

ނަޒީރަކީ ވިޔަފާރީގެ ދާއިރާގެ އިތުރުން ސިޔާސީ ގޮތުން ވެސް ގިނަ އިސްލާހީ ހަރަކާތްތަކެއްގައި ވެސް މީގެ ކުރިން ބައިވެވަޑައިގެންފައިވާ ބޭފުޅެކެވެ. އަދި ކުރީގެ ރައީސް މުހައްމަދު ނަޝީދުގެ ވެރިކަމުގައި އިނގިރޭސިވިލާތަށް ކަނޑައަޅުއްވާފައި ހުންނެވި ޓްރޭޑް އެންވޯއިގެ މަގާމު ވެސް އަދާކުރެއްވި ބޭފުޅެކެވެ.