ސްޕެނިޝް ލީގުގައި ސެލްޓަ ވީގޯއާ ދެކޮޅަށް ކުޅުނު މެޗުން ހޯދި މޮޅާ އެކު، ރެއާލް މެޑްރިޑުން ލީގު ތާވަލްގެ ދެ ވަނައިގައި ހިފަހައްޓައިފި އެވެ.

ރެއާލްގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގައި ރެއާލް އިންް ތިން ލަނޑު ޖަހައިގެން ލީޑު ހޯދާފައި ވަނިކޮށް، ސެލްޓަ އިން ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 33 ވަނަ މިނެޓުގައި ރެއާލަށް ލީޑު ނަގައިދިނީ އާޑާ ގުލާ އެވެ. އެއީ ލޫކަސް ވަޒްކުއޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ހަ މިނެޓު ފަހުން ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ފްރާންސްގެ ކީލިއަން އެމްބާޕޭ އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި އެމްބާޕޭ ވަނީ ރެއާލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އެއީ ގުލާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ 69 ވަނަ މިނެޓުގައި ސެލްޓަގެ ފުރަތަމަ ލަނޑު ޖެހީ ހަވީ ރޮޑްރިގޭޒް އެވެ. އޭގެ ފަހުން އެ ޓީމުގެ ދެ ވަނަ ލަނޑު، 76 ވަނަ މިނެޓުގައި ޖެހީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ވިލިއަޓް ސްވެޑްބާގް އެވެ.

މޮޅާއެކު ރެއާލުން ވަނީ އެއް ވަނައިގައި އޮތް ބާސެލޯނާއާ ދެމެދު އޮތް ފަރަގު ހަތަރު ޕޮއިންޓަށް ކުޑަ ކޮށްފަ އެވެ. ލީގުގައި މިހާތަނަށް ދެ ޓީމު ވެސް ކުޅެފައި ވަނީ 34 މެޗެވެ. އެއް ވަނައިގައި ބާސެލޯނާ އަށް 79 ޕޮއިންޓު ލިބޭއިރު، ދެ ވަަނައިގައި ރެއާލަށް ލިބެނީ 75 ޕޮއިންޓެވެ.

ލީގުގައި މި މަހުގެ 11 ވަނަ ދުވަހު ދެން އޮންނާނީ ބާސެލޯނާގެ އަމިއްލަ ދަނޑުގައި މި ދެ ޓީމު ބައްދަލު ކުރާ މެޗެވެ.