ގާނޫނުއަސާސީއާއި ހިލާފަށް ސުޕްރީމް ކޯޓުގެ ފަނޑިޔާރުން ވަކިކުރުމަކީ ރައީސް މުއިއްޒު ކުރައްވާނެ އެންމެބޮޑު ދުސްތޫރީ ކުށް - ސުއޫދު

ގާނޫނުއަސާސީއާއި ހިލާފަށް ސުޕްރީމް ކޯޓުގެ ފަނޑިޔާރުން ވަކިކުރެއްވުމަކީ ރައީސް ޑރ. މުހައްމަދު މުއިއްޒު ކުރައްވާނެ އެންމެބޮޑު ދުސްތޫރީ ކުށް ކަމަށް ސުޕްރީމް ކޯޓުގެ ކުރީގެ ފަނޑިޔާރު ހުސްނު ސުއޫދު ވިދާޅުވެއްޖެއެވެ.

ސުޕްރީމް ކޯޓުގެ ފަނޑިޔާރު އަޒްމިރަލްދާ ޒާހިރާއި މަހާޒު އަލީ ޒާހިރު ވަކިކުރަން ޖޭއެސްސީން ނިންމުމަކާއި ގުޅިގެން އެކްސްގައި ކުރެއްވި ޕޯސްޓެއްގައި ސުއޫދު ވިދާޅުވީ ގާނޫނޫ އަސާސީއާއި ހިލާފަށް ސުޕްރީމް ކޯޓުގެ ފަނޑިޔާރުން ވަކިކުރެއްވުމަކީ ގައުމުގެ ރައީސަކު ކުރައްވާނެ އެންމެ ބޮޑު ދުސްތޫރީ ކުށް ކަމަށެވެ.

ސުއޫދު ވިދާޅުވީ ދިވެހިރާއްޖޭގެ ޖުޑިޝަރީއަށް ދިން ހަމަލާގައި ބައިވެރިވި ބޭފުޅުން އަދާކުރެއްވި ދައުރު ދިވެހި ޖުޑިޝަރީގެ ތާރީހުން ފޮހިވިގެންނުދާނެއެވެ.

ސުޕްރީމް ކޯޓުގެ ފަނޑިޔާރުކަމުގެ މަގާމުން ސުއޫދު އިސްތިއުފާ ދެއްވީ މިދިޔަ މާޗް މަހުގެ 4 ވަނަ ދުވަހުއެވެ. ސުއޫދު އިސްތިއުފާ ދެއްވީ ދިވެހިރާއްޖޭގެ ގާނޫނު އަސާސީ އާ ޚިލާފަށް ދިވެހި ރާއްޖޭގެ އަދުލު އިންސާފުގެ ބާރަށް ރައީސް މުހައްމަދު މުއިއްޒު ނުފޫޒު ފޯރުވަމުން ގެންދަވާތީ އެކަމަށް އިހުތިޖާޖު ކުރެއްވުމުގެ ގޮތުންނެވެ.

ސުއޫދުގެ ސިޓީގައި ވިދާޅުވެފައިވަނީ ގާނޫނުއަސާސީ އާ ޚިލާފަށް މި މައްސަލަ އަށް ނުފޫޒު ފޯރުވުމަށް ރައީސް މުއިއްޒުގެ ސަރުކާރުން ވަނީ ކޯޓުގެ ހުރިހާ ފަނޑިޔާރުންނަށް ބިރުދައްކާފައެވެ. ސުއޫދު ވިދާޅުވީ މުއިއްޒު އެދިވަޑައިގަންނަވާ ގޮތައް ހުށަހެޅިފައިވާ މައްސަލަ ނިންމުމަށް މައްސަލަ އަށް ނުފޫޒު ފޯރުވަމުން ގެންދަވާތީ އެކަމާ އިހްތިޖާޖު ކުރުމުގެ ގޮތުން ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ކަމުން މިހިނދުން އިސްތިއުފާ ދެއްވީ ކަަމަށެވެ.

ސުއޫދުއާއެކު ސަސްޕެންޑްކުރި މަހާޒު އަދި އަޒްމިރަލްދާގެ މައްސަލަ ޖޭއެސްސީގެ ކުޑަކޮމިޓީން ބެލުމަށްފަހު ހުށަހެޅި ރިޕޯޓް ފާސްކޮށް ފަނޑިޔާރުކަމުން ވަކިކުރަން ޖޭއެސްސީ އިން އާދީއްތަ ދުވަހު ވަނީ ނިންމާފައެވެ. ޖޭއެސްސީން މިގޮތަށް ނިންމުމުން ދެން އެމައްސަލަ ރައްޔިތުންގެ މަޖިލީހަށް ފޮނުވުމަށްފަހު، ފަނޑިޔާރު ކަމުގެ މަޤާމުން ވަކި ވާނީ މަޖިލީހުން ފާސްކުރުންނެއެވެ.

ދެ ފަނޑިޔާރުން ވަކިކުރަން ޖޭއެސްސީއިން ފާސްކޮށްފައިވާ އިރު، ހޯމަ ދުވަހު އޮންނަ މަޖިލީހުގެ ޖަލްސާއަށް މި މައްސަލަ ވަނީ އެޖެންޑާކޮށްފައެވެ.

ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރާއި ހުސްނުއްސުއޫދާއި މަހާޒް އަލީ ޒާހިރު ސަސްޕެންޑު ކުރީ، މެންބަރުން ވަކިކުރެވޭ މައްސަލައިގައި ވަގުތީ އަމުރެއް ނެރެދިނުމަށް އެ ކޯޓަށް ހުށަހަޅައި މައްސަލައިގެ އަޑުއެހުމެއް ތާވަލުކޮށް ފަނޑިޔާރުން މާލަމުގައި ތިއްބަވަނިކޮށެވެ. ތިން ފަނޑިޔާރުން ސަސްޕެންޑް ކުރީ ޖޭއެސްސީން ކުއްލި ބައްދަލުވުމެއް ބާއްވާ 10 މިނެޓުގެ ތެރޭގައި ގޮތް ނިންމުމަށްފަހު 26 ފެބްރުއަރީ 2025 ގައެވެ.