ހައްވާ ޔުމްނު ރަޝީދަށް އިންސާފު ހޯދައިދިނުމަށް ގޮވާލާ ޒުވާނުން ކުރިއަށް ގެންދިޔަ މުޒާހަރާގައި އިސްކޮށް ހަރަކާތެރިވި ދެ ޒުވާނުން ވަގުތުން ވަގުތަށް މިނިވަން ކުރުމަށް މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އިން ގޮވާލައިފިއެވެ.

ބުރާސްފަތި ދުވަހުގެ ރޭ ޒުވާނުން ކުރިއަށް ގެންދިޔަ ''ދުލެއް ނުކުރާނަން'' މުޒާހަރާގައި ފުލުހުން މުޒާހަރާގެ ބައިވެރިންގެ ތެރެއަށް ކުއްލިއަކަށް ވަދެގަނެ، ބާރުގެ ބޭނުންކޮށް، ހައްޔަރުކޮށްފައިވަނީ ބަގީޗާގެ / ނ.ކުޑަފަރި، ޢަބްދުﷲ މަހްޒޫމް މާޖިދު (28އ) އާއި މ. ހަސްތީ / މާލެ، ޢާއިޝަތު ޝިމަން އަޙްމަދު (19އ) އެވެ.

މި ދެ ޒުވާނުން ހައްޔަރު ކުރުމާއި ގުޅިގެން ހުކުރު ދުވަހު އެމްޑީއޭއިން ނެރުނު ނޫސްބަޔާނުގައި ބުނީ ޔުމްނަށް އިންސާފު ހޯދައިދިނުމަށް ގޮވާލާ ޒުވާނުން ކުރަމުންދާ މުޒާހަރާތަކާ ދެކޮޅަށް ދިވެހި ފުލުހުންގެ ޚިދުމަތުން ބާރު ބޭނުންކޮށް، މުޒާހަރާގެ އިސްކޮށް އުޅުނު ދެ ޒުވާނުން ހައްޔަރު ކުރުން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ. އަދި އެއްވެސް ޝަރުތަކާ ނުލައި، އެ ދެ ޒުވާނުން ވަގުތުން ވަގުތަށް މިނިވަން ކުރުމަށް އެޕާޓީން ވަނީ ގޮވާލާފައެވެ.

މީގެ އިތުރުން އެމްޑީއޭއިން ބުނީ، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 32 ވަނަ މާއްދާގައި ވަރަށް ސާފުކޮށް ބަޔާންކޮށްފައިވާ ގޮތުން ދައުލަތުގެ ހުއްދައެއް ކުރިން ހޯދުމަކާ ނުލައި، ސުލްހަވެރިކަމާއެކު އެއްވެއުޅުމުގެ މިނިވަންކަން ކޮންމެ ރައްޔިތަކަށް ލިބޭ ކަމަށެވެ. ނަމަވެސް ސުލްހަވެރިކަމާއެކު އެއްވެ އެމީހުންގެ ޝުއޫރުތައް ފާޅުކުރަމުންދިޔަ ޒުވާނުންނާ ދެކޮޅަށް އެކަށީގެންނުވާ މިންވަރަށް ބާރުގެ ބޭނުންކޮށް، އެ އެއްވުން ރޫޅާލާފައިވަނީ ގާނޫނު އަސާސީން ލިބިދީފައިވާ އަސާސީ ހައްގެއް ހަނިކުރުމުގެ މަގުސަދުގައި ކަމަށް އެޕާޓީން ބުނެއެވެ.

އެމްޑީއޭއިން ބުނީ މިފަދަ އަމަލުތައް ތަކުރާރު ނުކުރުމަށް ދިވެހި ފުލުހުންނަށް އަދި ދައުލަތުގެ އެންމެހައި އިދާރާތަކަށް އިލްތިމާސް ކުރާ ކަމަށެވެ. ހަމައެހެންމެ އެއްވެސް ތަފާތުކުރުމެއް ނެތި ހުރިހާ ފަރާތްތަކަށް ވެސް ވިހާވެސް ފުޅާ ދާއިރާއެއްގައި ސުލްހަވެރިކަމާއެކު އެއްވެ އުޅުމާއި، ހިޔާލުފާޅު ކުރުމުގެ ފުރުސަތު ދިނުމަށް އެމްޑީއޭއިން ވަނީ ގޮވާލާފައެވެ.

''ދުލެއް ނުކުރާނަން'' މުޒާހަރާގައި ހައްޔަރުކުރި ދެ ޒުވާނުން ވަގުތުން މިނިވަން ކުރުމަށް ގިނަ އަދަދެއްގެ އާއްމު ރައްޔިތުން ވެސް ދަނީ ގޮވާލަމުންނެވެ. އަދި މި ދެ ޒުވާނުން ހައްޔަރުކޮށްފައިވަނީ ފުލުހުންގެ ވާޖިބު އަދާކުރުމަށް ހުރަސްއަޅައި އަމުރަށް ނުކިޔަމަންތެރިވުމުން ކަމަށް ފުލުހުން ބުނި ނަމަވެސް މުޒާހަރާ ލައިވް ކުރިއިރު، އެމަންޒަރު އާއްމުންނަށް ފެނިފައިނުވާ ކަމަށާއި، ފުލުހުން މިކަމުގައި ދޮގުހަދައި އޮޅުވާލުމަށް މަސައްކަތް ކުރާ ކަމަށް ގިނަ ބަޔަކު ދަނީ ބުނަމުންނެވެ. އެއްވެސް އިންޒާރަކާ ނުލައި، މުޒަހަރާގެ ބައިވެރިންގެ ތެރެއަށް ފުލުހުންގެ ވަދެގަނެ، ޕެޕަރ ސްޕްރޭ ޖަހާފައިވާ ކަަމަށް މުޒާހަރާގެ ބައިވެރިން ބުނެފައިވެއެވެ.