ރަޝިޔާގެ ވިކްޓްރީ ޑޭގެ ޚާއްސަ ޕެރޭޑުގައި އިންޑިއާގެ ޑިފެންސް މިނިސްޓަރު ރަޖްނާތު ސިންގް ބައިވެރިވެ ވަޑައިގަންނަވާ ގޮތަށް ހަމަޖެހިއްޖެ އެވެ.

އިންޑިއާ ސަރުކާރުން ބުދަ ދުވަހު ހާމަކޮށްފައިވާ ގޮތުގައި އެ ޕެރޭޑުގައި ޑިފެންސް މިނިސްޓަރު ބައިވެރިވެ ވަޑައިގަންނަވާއިރު، ޕެރޭޑުގައި ބައިވެރިވެ ވަޑައިގަތުމުގެ ދައުވަތު ބޮޑު ވަޒީރު ނަރެންދްރަ މޯދީ އަށް ވެސް ވަނީ ލިބިވަޑައިގެންފަ އެވެ. 

އިންޑިއާގެ ފޮރިން މިނިސްޓްރީގެ ޑެޕިއުޓީ ތަރުޖަމާނު ރަންދީރު ޖައިޝްވާލް ވިދާޅުވީ، މެއި މަހުގެ ނުވަ ވަނަ ދުވަހު ބޭއްވުމަށް ހަމަޖެހިފައިވާ ޕެރޭޑުގައި ބައިވެރިވެ ވަޑައިގަތުމުގެ ދައުވަތު ބޮޑު ވަޒީރު މޯދީ އަށް ވެސް ފޮނުއްވާފައިވާ ކަމަށެވެ.

އެހެން ނަމަވެސް، އެ ޕެރޭޑުގައި އިންޑިއާ ސަރުކާރު ތަމްސީލު ކުރައްވާނީ ޑިފެންސް މިނިސްޓަރު ރަޖްނާތު ސިންގް ކަަމަށް ފޮރިން މިނިސްޓްރީ އިން ވަނީ އިއުލާން ކޮށްފަ އެވެ. 

އިންޑިއާގެ ބޮޑު ވަޒީރު މޯދީ މި ދަތުރުފުޅުގައި ބައިވެރިވެ ވަޑައިނުގަންނަވާ ސަބަބެއްގެ ގޮތުގައި މީޑިއާ ތަކުގައި ބުނެފައި ވަނީ، މިވަގުތު ޕާކިސްތާނުގައި ހިންގަމުން އަންނަ ކަންކަމާ ގުޅިގެންނެވެ. އިންޑިއާގެ ފަތުރުވެރިންތަކަކަށް އަމާޒުކޮށް ދިން ހަަމަލާގެ ޒިންމާ ޕާކިސްތާން އިން ނަގަން ޖެހޭނެ ކަމަށް އިންޑިއާ އިން ވަނީ ބުނެފަ އެވެ.

ބޮޑު ވަޒީރު މޯދީ ވަނީ މިދިޔަ އަހަރުގެ އޮކްޓޫބަރު މަހުގެ ތެރޭގައި ރަޝިޔާ އަށް ވަޑައިގެންފަ އެވެ. އެއީ އެ ޤައުމުގައި އޮތް ސަމިޓެއްގައި ބައިވެރިވެ ވަޑައިގަތުމަށެވެ. 

މީޑިއާ ތަކުގައި ރިޕޯޓު ކޮށްފައިވާ ގޮތުން، މިއަހަރުގެ ފަހު ކޮޅު، ރަޝިޔާގެ ރައީސް ވްލަޑިމިއާ ޕުޓިން އިންޑިއާ އަށް ރަސްމީ ދަތުރުފުޅެއް ކުރެއްވުމުގެ ފުރުސަތު ވަރަށް ބޮޑެވެ.