އެންމެ ނުބައި މީހަކީ އެ މީހެއްގެ ގައުމު ޚަރާބުކޮށް، އަމިއްލަ މީހުންނާ ދެކޮޅަށް ހަނގުރާމަކުރާ މީހާ: ޚުތުބާ
އަނިޔާވެރިކަމާއި ފާޖިރުމަކުން ސިފަލިބިގެންވާ ބަޔަކަށް ވެސް ގައުމު އެއްގަލަކަށް ނޭރުވޭނެ
ހުކުރު ޚުތުބާ އަޑުއަހަނީ
އެންމެ ނުބައި މީހަކީ އެ މީހެއްގެ ގައުމު ޚަރާބުކޮށް، އަމިއްލަ މީހުންނާ ދެކޮޅަށް ހަނގުރާމަކުރާ މީހާ ކަމަށް މަސްޖިދުއްނަބަވީގެ އިމާމު ޚަތީބު ފަޟީލަތުއްޝައިޚު ޞަލާހު އަލްބުދައިރު ދެއްވި ހުކުރު ޚުތުބާގައި ވިދާޅުވެއްޖެއެވެ.
''ތިޔަބައިމީހުންނީ ލޯބިވާ އަޚުންތަކެއްކަމުގައިވާށެވެ'' މިމައުޟޫއަށް މަސްޖިދުއްނަބަވީގެ އިމާމު ޚަތީބު ފަޟީލަތުއްޝައިޚު ޞަލާހު އަލްބުދައިރު މަސްޖިދުއްސުލްތާނު މުހައްމަދު ތަކުރުފާނުލް އައުޒަމުގައި ދެއްވި ޚުތުބާގައި ވިދާޅުވީ އެންމެ ނުބައި މީހަކީ، އެ މީހެއްގެ ގައުމު ޚަރާބުކޮށް، އަމާންކަމާއި ސަލާމަތްކަން ނަގައިލައި، އަމިއްލަ މީހުންނާ ދެކޮޅަށް ހަނގުރާމަކުރާ މީހާ ކަމަށާއި، ދެބަސްވުމާއި ދެކޮޅުވެރިކަމުގެ އަލިފާން ރޯކުރާ ޖާހިލަކަށް، ގައުމެއްގެ ރައްޔިތުން އެއްގަލަކަށް ނޭރުވޭނެ ކަމަށެވެ. އަދި ހަރުކަށިކަމާއި ނަފުރަތުން މީސްތަކުން ދީނާ ދުރުކުރާ މީހުންނާއި، މީސްތަކުންނާ ހުތުބަހުން މުޚާތަބުކޮށް އަނިޔާވެރިވާ މީހުންނާއި، މީސްތަކުންގެ ހިތްތަކުގައި ނަފުރަތުގެ އޮށްތައް އިންދައި، އެބައިމީހުންގެ ބަދަހި ސަފުތައް ވިސްސިވިހާލި ކޮށްލާ މީހުންނާއި، ތަންދޮރު ނުދަނެ ތިބެ ފަތުވާދީއުޅޭ މީހުންނާއި، އަނިޔާވެރިކަމާއި ފާޖިރުމަކުން ސިފަލިބިގެންވާ ބަޔަކަށް ވެސް ގައުމު އެއްގަލަކަށް ނޭރުވޭނެ ކަމަށް ޚުތުބާގައި ވިދާޅުވެފައިވެއެވެ.
ފުރެދުމާއި، ފަސާދައާއި، އިލްޙާދަށް ގޮވައިލައި، މުސްލިމުން ބައިބައިކޮށް ދެކޮޅުވެރިކަން އުފައްދާ މީހުންނާމެދު ތިޔަބައިމީހުން ބިރުވެތިވުމަށާއި، ހިކުމަތްތެރިކަމާއި މެދުމިނުގައި ހިފަހައްޓުމަށް ޝައިޚު ޞަލާހު އަލްބުދައިރު ދެއްވި ޚުތުބާގައި ގޮވާލާފައިވެއެވެ.
ޚުތުބާގައި ވިދާޅުވީ މުސްލިމުންނަށް އުނދަގޫކޮށް، އެ މީހުންގެ މައްޗަށް ބާޠިލު ތުހުމަތުތައް ކޮށް ހަދައިގެން ނުވާނެ ކަމަށާއި، ދޮގު ބުހުތާން ވާހަކަތައް ފެތުރުމުގައި ބިރުވެތިވާންޖެހޭ ކަމަށެވެ.
އެކަކު އަނެކަކަށް ރަޙުމުކޮށް އޯގާވެރިވެ އުޅުމަކީ މަތިވެރި ކަމެކެވެ. މާތް ﷲ ވަޙީކުރައްވައިފައި ވެއެވެ. މާނައީ: "ދެން އީމާންވެ، އަދި ކެތްތެރިވުމަށް އެކަކު އަނެކަކަށް ވަޞިއްޔަތް ކޮށް، އަދި މީސްތަކުންނަށް ރަޙުމު ބެހެއްޓުމަށް އެކަކު އަނެކަކަށް ވަޞިއްޔަތް ކޮށް އުޅުނުމީހުންގެ ތެރެއިން އޭނާ ވާނެތެވެ. ކަނާތްފަރާތުގެ މީހުންނީ، އެއުރެންނެވެ." އެހެންވީމައި ތިބާއީ އަމިއްލަ ނަފުސަށާއި، އެހެން މީހުންގެ މައްޗަށް އޯގާވެރި އަޅަކަށް ވާށެވެ! ތިބާގެ ޢިލްމުން ނުދަންނަ މީހުންނަށް އުގަންނައިދީ، އެ މީހުންގެ މައްޗަށް އޯގާވެރިވާށެވެ! ތިބާގެ މުދަލުން ފަގީރުންނަށް ހޭދަކުރާށެވެ! ބޮޑެތިމީހުންނަށް އިޙްތިރާމުކުރާށެވެ! ކުޑަކުދީންނަށް އޯގާވެރިވާށެވެ! ކުށުގެ ވެށީގައި އުޅޭ މީހުންނަށް މަގުދައްކާށެވެ! ޖަނަވާރުންނަށް ދާންދެން ތިބާ އޯގާވެރިވާށެވެ! ﷲގެ ރަހްމަތާ ކުއްތަންވެގެންވާ މީހުންނީ، އެ ކަލާނގެ ޚަލްޤުތަކުގެ މައްޗަށް އޯގާވެރިވާ މީހުންކަން ދަންނާށެވެ! އެފަދަ މީހުންނަށް މާތް ﷲ ރަހްމަތް ލައްވައި، އެ ކަލާނގެ ދީލަތިވަންތަކަމުގެ ގޮވައްޗަށް ވައްދަވާނެތެވެ. ކަށްވަޅުގެ ޢަޛާބާއި ނަރަކައިގެ ގިނި ހޫނުން މިންޖުކުރައްވާނެތެވެ. ޤިޔާމަތްދުވަހުގެ ބިރުވެރިކަމުން އަމާންކަން ދެއްވައި، އެ ކަލާނގެ ހިޔާވަހިކަން ދެއްވާނެތެވެ.މަސްޖިދުއްނަބަވީގެ އިމާމު ޚަތީބު ފަޟީލަތުއްޝައިޚު ޞަލާހު އަލްބުދައިރު
ޝައިޚު ޞަލާހު އަލްބުދައިރު ދެއްވި ޚުތުބާގައި ވަނީ މާތްﷲއީ އަޅުތަކުންގެ ސިއްރުތައް ވަންހަނާކޮށްދޭ މީހުންގެ ސިއްރުތައް ވަންހަނާކޮށްދެއްވާ ރަސްކަލާނގެ ކަމަށާއި، އެ ކަލާނގެއީ މީސްތަކުންނަށް މައާފުކުރާ މީހުންނަށް ގިނަގިނައިން އަފޫކުރައްވާ، އެ މީހުންގެ ފާފަ ފުއްސަވާ ރަސްކަލާނގެ ކަމަށެވެ. އެއީ އެ ކަލާނގެ އަޅުތަކުން ކުރެ ރަހުމުހުރި އޯގާވެރީންގެ މައްޗަށް ނުހަނު އޯގާވެރި ރަސްކަލާނގެ ކަމަށާއި، ހިތް ހަރު، ހަރުކަށި މީހުން ދެކެ ކޯފާވެވޮޑިގެންވާ ރަސްކަލާނގެކަން ފާހަގަކުރައްވާފައެވެ.
މީހަކު އެހެން މީހުންގެ އަބުރަށް އަރައިގަނެ ފަޟީހަތްކުރުމާއިގެން ތެދުވެއްޖެނަމަ މާތް ﷲ އެމީހަކު ފަޟީހަތްކުރައްވާކަން ފާހަގަކުރައްވައި ޚުތުބާގައި ވިދާޅުވީ އެހެން މީހަކަށް ހެޔޮކަމެއް ލިބޭން ނޭދޭ މީހާ ހެޔޮކަމުން މަހްރޫމުކުރައްވާ ކަމަށާއި، މީހަކަށް ދަތިކޮށްފި މީހާއަށް ދަތިކުރައްވާ ކަމަށެވެ. އެހެން މީހަކަށް މަކަރު ހަދައި ކެހިދީފި މީހަކަށް އެކަމާ އެއްފަދަ ސަޒާ ދެއްވާ ކަމަށާއި، އަޅާ މީހަކާ މުއާމަލާކުރާ ގޮތަކަށް، ދުނިޔެއާއި އާޚިރަތުގައި ވެސް މާތް ﷲ އޭނާއާ މުއާމަލާ ކުރައްވާކަން ހަނދުމަކޮށްދެއްވިއެވެ.
ﷲގެ އަޅުތަކުންނަށް ފައިދާއެއް ކޮށްދިނުމަކީ އެންމެ މަތިވެރި ޚުލްޤެވެ. މީސްތަކުންނަށް ހެޔޮކޮށް ކަންތައްކުރާ މީހުން ދިރިއުޅޭނީ ޢިއްޒަތާއި ޝަރަފާއި ޤަދަރުވެރިކަމުގައެވެ. ފަހެ ތިބާއީ މީސްތަކުންނަށް ފައިދާހުރި، ހެޔޮފޯރުވައި އުޅޭ މީހަކަށް ވާށެވެ! ކީރިތި ރަސޫލާ ޙަދީޘްކުރެއްވި ބަސްފުޅެއްގެ މާނައިގައި ވެއެވެ. "މީސްތަކުން ކުރެ ﷲ ތަޢާލާގެ ޙަޟްރަތުގައި ލޮބުވެތިކަން އެންމެ ބޮޑު މީހަކީ، މީސްތަކުންނަށް އެންމެ ފައިދާހުރި މީހާއެވެ. އަދި ﷲ ތަޢާލާ އެންމެ ރުހިވޮޑިގެންވާ ޢަމަލަކީ މުސްލިމެއްގެ ހިތަށް އުފާވެރިކަމެއް ގެނެސްދިނުމެވެ. ނުވަތަ އޭނާއަށް ޖެހިފައިވާ ބޮޑުކަމެއް ލުއިކޮށްދިނުމެވެ. ނުވަތަ އޭނާގެ ދަރަންޏެއް އަދާކޮށްދިނުމެވެ. ނުވަތަ އޭނާގެ ބަނޑުހައިހޫނުކަން ފިލުވައިދިނުމެވެ. އަހަރެންގެ އަޚާއަށް ޖެހިފައިވާ ކަމެއް ކޮށްދޭން މަސައްކަތްކުރުން މަސްޖިދުއްނަބަވީގައި އިޢުތިކާފަށް އިނުމަށް ވުރެ މާހެޔޮކަން ބޮޑެވެ.މަސްޖިދުއްނަބަވީގެ އިމާމު ޚަތީބު ފަޟީލަތުއްޝައިޚު ޞަލާހު އަލްބުދައިރު
ތިބާގެ އެހީތެރިކަމާއި، ދީލަތިކަމާއި، ހޭދަކުރުން ދޫކޮށްނުލުމަށާއި، ތިބާ މުށްބާރުނުކުރުމަށް ޝައިޚު ޞަލާހު އަލްބުދައިރު ދެއްވި ޚުތުބާގައި ގޮވާލައްވާފައިވެއެވެ. އަދި ބޭނުމެއް ޖެހިގެން އަތްދިއްކޮށްލާ މީހާއަށް ކުޑަނަމަވެސް ހެޔޮކަމުގެ އަތެއް ދިއްކޮށްލުމަށް ނަސޭހަތްތެރިވެވަޑައިގެންނެވިއެވެ.
މީގެ އިތުރުން ދުނިޔެއަކީ ދެމިހުރުން ހުރިތަނެއް ނޫން ކަމަށާއި، ކޮންމެ މީހަކީ މި ދުނިޔެ ދޫކޮށް ދާނޭ މީހެއް ކަމަށެވެ. އަދި ގޮސްނިމިފައިވާ މީހެއްގެ ދަރިއެކެވެ. ޒަމާނަކީ ހޭދަވާ ރޭދުވާފަދަ ވަގުތުކޮޅެކެވެ.
މަރު އޮތީ ދާދި ގާތުގައިކަން ފާހަގަކުރައްވައި، ޝައިޚު ޞަލާހު އަލްބުދައިރު ދެއްވި ޚުތުބާގައި ވިދާޅުވީ ދިރިހުރި އިންސާނާ ލާ ކޮންމެ ނޭވާއަކީ، އޭނާގެ ނަފުސު މަރާ ގާތްކޮށް، ދުނިޔެއަށް އަލްވަދާޢުކިޔާ ނޭވާއެއް ކަމަށެވެ. އަދި އިންސާނާ ނޭވާހޮޅިއަށް އެޅިއްޖައުމަށް ދާނދެން ތައުބާގެ ދޮރުކޮޅު ހުޅުވިފައިވާ ކަމަށާއި، ތައުބާވުން ގިނަ ކުރުމަށް ނަސޭހަތްތެރިވެވަޑައިގެންނެވިއެވެ.
