ވިޔަފާރިވެރިޔާ ގާސިމް މާމިގިލީން ގިނަ އަދަދެއްގެ ރުށް ބޭރު ކުރާ މައްސަލާގައި މިނިސްޓަރު ތާރިގު ޖަވާބެއް ނުދެއްވި
އީޕީއޭއިން އެ މައްސަލަ ބެލުމަށްފަހު އަންގަންޖެހޭ އެއްޗެއް އަންގާނެ
މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ތާރިގު އިބްރާހީމް
ގަވާއިދާ ހިލާފަށް ވިލާ ފައުންޑޭޝަންގެ ޗެއަރމަން އަދި މާމިގިލި ދާއިރާގެ މެމްބަރު ގާސިމް އިބްރާހިމް ގިނަ އަދަދެއްގެ ރުށް އދ. މާމިގިލީން ބޭރު ކުރާ މައްސަލާގައި މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ތާރިގު އިބްރާހީމްގެ ބެއްލެވުމުގެ ދަށުން ހިންގަވާ އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)އިން މައުލޫމާތު ސާފުކުރުމަށް މިނިސްޓަރު ތާރިގު ވިދާޅުވެއްޖެއެވެ.
ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީގެ ނޫސްވެރިޔާ ކުރި ސުވާލަކަށް މިނިސްޓަރު ތާރިގު ވިދާޅުވީ އީޕީއޭއިން އެމައްސަލަ ބަލަމުންދާ ކަމަށް ނޫސްވެރިޔާ ވެސް ފާހަގަކޮށްފައިވާ ކަމަށާއި، އީޕީއޭއިން އެ މައްސަލަ ބެލުމަށްފަހު އަންގަންޖެހޭ އެއްޗެއް އަންގާނެ ކަމަށެވެ.
މިނިސްޓަރު ތާރިގު ވިދާޅުވީ މިފަދަ މައްސަލަތައް ބަލަމުންދަނީ އީޕީއޭއިން ކަމަށެވެ.
މިހާރު އީޕީއޭއިން ބަލަމުން ގެންދާ ވާހަކަ ތިޔަ ވިދާޅުވަނީ. އެހެންވީމަ އީޕީއޭއިން ބަލާނެ. އީޕީއޭއިން އެ ނިންމާ ނިންމުން އެއީ ކޮން ނިންމުމެއްތޯ ބަލާފައި އީޕީއޭއިން އެކަންތައްތައް ބަލާފައި މޮނީޓަރ ކުރާން އޮންނަ އިންސްޓިއުޝަންއަކީ އީޕިއޭ. އަޅުގަނޑަށް ހީވަނީ އެކަންތައް ބަލާފައި އޭގެ އައުޓްކަމް އަންގާނެ އިނގޭތޯ ހުރިހާ ބޭފުޅުންނަށް ވެސް.މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ތާރިގު އިބްރާހީމް
މާމިގިލީން ގިނަ އަދަދެއްގެ ރުށް ބޭރު ކުރާ މައްސަލާގަައި އެރަށުގެ ކައުންސިލުން ވަނީ ކަންބޮޑުވުންފާޅު ކޮށްފައެވެ.
ރާއްޖެއެމްވީއަށް މާމިގިލީ ކައުންސިލުން ބުނީ މެމްބަރު ގާސިމްގެ އެހީތެރިކަމާ އެކު ފުލުހުންގެ މަރުކަޒެއް ބިނާ ކުރުމަށް ބިމެއް ހަވާލުކޮށްފައިވާ ކަމަށާއި، އެސަރަހައްދުގައި ހުރި ގިނަ އަދަދެއްގެ ރުށްތައް ނަގައި ރަށުން ބޭރު ކުރަމުންދާ ކަމަށެވެ. އަދި ސީއެސްއާރްގެ ދަށުން މަސައްކަތް ކުރާ ބައެއް ބިންތަކުން ވެސް ރުށް ނަގަމުންދާ ކަމަށް ކައުންސިލުން ބުނެއެވެ.
ނަމަވެސް ރުށް އެހެން ބޭރު ނުކުރެވޭނެ ކަމަށާއި، އެ ބިމުގައި ހުރި ރުށްތައް ގެންދަން ޖެހޭނީ ރަށުގެ އެހެން ދިމާލަކަށް ކަމަށް ކައުންސިލުން ބުނެއެވެ. އަދި ގާނޫނުން ވެސް އެގޮތަށް އަމަލު ކުރުމަށް ޖާގަ ނުދޭނެ ކަމަށާއި، 10 ރުށަކަށް ވުރެ ގިނަ ރުށްތައް ގެންދާނަމަ، އީއައިއޭ ހަދަންޖެހޭއިރު، އެމަސައްކަތް ކޮށްފައިނުވާ ކަމަށެވެ. އަދި މި ކަމުގައި ކައުންސިލްއާ ވެސް އެއްވެސް މަޝްވަރާއެއް ކޮށްފައިނުވާ ކަމަށް ކައުންސިލުން ބުނެއެވެ.
މިމައްސަލައާ ގުޅިގެން އީޕީއޭގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވީ މާމިގިލީން ރުށް ގެންދާ މައްސަލަ ސަމާލު ކަމަށް އައިސްފައިވާ ކަމަށާއި، ބަލަންޖެހޭ ކަންކަން ބަލަމުންދާ ކަމަށެވެ.
