ޖަލަށް ފޯނާއި ޑްރަގް ވެއްދުން - އަހަރެއް ވާ އިރު ވެސް މުވައްޒަފުން ވަކިކުރުމާއި މެދު ގޮތެއް ނުނިމޭ!
ދިވެހި ފުލުހުންގެ ހިދުމަތާއި އެންޓި ކޮރަޕްޝަން ކޮމިޝަން ގުޅިގެން ތަހުގީގެއް ހިންގައި މައްސަލައިގައި 5 މީހެއްގެ މައްޗަށް ދަޢުވާކުރުމަށް 2024 އޮގަސްޓު 22 ދުވަހު ކްރިމިނަލް ކޯޓަށް ވަނީ ހުށަހަޅާފަ
ޖަލަށް ފޯނާއި ޑްރަގް ވެއްދުމުގައި ތުހުމަތުގައި ހައްޔަރުކުރި ބައެއް އޮފިސަރުން
ޖަލަށް ފޯނާއި ޑްރަގާއި އެހެނިގެން ސާމާނު ވެއްދުމުގެ ތުހުމަތުކުރާ 13 ކަރެކްޝަންސް މުވައްޒަފުންގެ މައްސަލަ ފެންމަތިވިތާ އަހަރެއް ވާ އިރު ވެސް މުވައްޒަފުން ވަކިކުރުމާއި މެދު ގޮތެއް ނުނިމޭކަން ހާމަވެއްޖެއެވެ.
މިކަން ހާމަވެފައި ވަނީ ކަރެކްޝަންސްގެ ފަރާތުން އަންގާރަ ދުވަހު މަޖިލީހުގެ ޕެޓިޝަން ކޮމިޓީގައި ހާމަ ކުރި މައުލޫމާތުތަކުންނެވެ.
ޖަލަށް ފޯނާއި ޑްރަގާއި އެހެނިގެން ސާމާނު ވެއްދުމުގެ މައްސަލަ އެއް ފެންމަތިވެ އެކަމާއި ގުޅޭ ބޮޑު ތަހުގީގެއް ކުރަމުންދާ ކަން ހޯމް މިނިސްޓަރ އަލީ އިހުސާން ހާމަކުރެއްވީ 2024 ވަނަ އަހަރުގެ ޖޫން މަހުގެ ތެރޭގައެވެ. އަދި އެ މައްސަލައިގެ ތުހުމަތުގައި ހައްޔަރުކޮށް 13 މީހަކު ހައްޔަރު ކުރިއެވެ.
މޯލްޑިވްސް ކަރެކްޝަނަލް ސަރވިސްގެ މުވައްޒަފުން އެ ސަރވިސްގެ ވަޒީފާގައި ތިބެ، ގާނޫނުގައިވާ ގޮތުގެމަތިން އަދާކުރަންޖެހޭ ވާޖިބުތަކާއި ހިލާފުވެ، އަދާކުރި ވަޒީފާގައި ހިންގާ ހުއްދަނޫން ކަންކަމުން މާލީ މަންފާ ހޯދައި، ވަޒީފާއާއި ނުބައްދަލު ފައިސާގެ މުއާމަލާތް ކޮށްފައިވާކަމަށް ތުހުމަތު ކުރެވިގެން ދިވެހި ފުލުހުންގެ ހިދުމަތާއި އެންޓި ކޮރަޕްޝަން ކޮމިޝަން ގުޅިގެން ތަހުގީގެއް ހިންގައި މައްސަލައިގައި 5 މީހެއްގެ މައްޗަށް ދަޢުވާކުރުމަށް 2024 އޮގަސްޓު 22 ދުވަހު ކްރިމިނަލް ކޯޓަށް ވަނީ ހުށަހަޅާފައެވެ. އަދި މައްސަލައިގައި ދައުވާ އުފުލާފައިވާ ކަރެކްޝަނަލް ސަރވިސްގެ މުވައްޒަފުން ޝަރުތުތަކާއެކު ދޫކޮށްލުމުގެ އިއުތިރާޒެއް ނެތްކަމަށް ދައުލަތުން ވަނީ މިދިޔަ އޮކްޓޯބަރ މަހު މި މައްސަލައިގައި ބުނެފައެވެ.
މި މައްސަލަ އަށް އިޝާރާތްކުރައްވާ ވާހަކަދައްކަވަމުން ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވަނީ އެ މައްސަލައިގެ ތަހުގީގު ގޮސްފައިވާ ހިސާބެއް ސާފުކުރުމަށް ސުވާލުކޮށްފައެވެ. އެގޮތުން ހައްޔަރު ކުރި ކަރެކްޝަންސްގެ 13 މުވައްޒަފުން އެ ޚަބަރުގެ ސަބަބުން ކަރެކްޝަަންސްގެ ހުރިހާ މުވައްޒަފުން ބަދުނާމުވާ ކަމަށް ޒިޔާދު ވިދާޅުވިއެވެ. ޒިޔާދު ވަނީ އެ ތަހުގީގު ލަސްވާތީ ކަރެޝަންސް އިން ކަންބޮޑު ނުވޭތޯ ސުވާލު އުފައްދާފައެވެ.
ޖަވާބުގައި ކަރެކްޝަންގެ ޑެޕިއުޓީ ކޮމިޝަނަރ އޮފް ޕްރިޒަންސް، އިބްރާހިމް މުހައްމަދު ދީދީ ވިދާޅުވީ އެ މައްސަލައިގައި ފުލުހުން ކުރަމުންދާ ތަހުގީގާއި މެދު އެއްޗެއް ބުނަން ނޭނގޭ ކަމަށެވެ. އެހެންނަމަވެސް ފުލުހުން އެ މައްސަލަ ތަހުގީގު ކުރިއަސް ކަރެކްޝަންސް އިން އެ މައްސަލަ ތަހުގީގު ކުރާނެ ކަމަށް އޭނާ ވަނީ ވިދާޅުވެފައެވެ.
"ޤާނޫނުގައި ބުނާ އިދާރީ ފިޔަވަޅު އަޅާނެ. ފުލުހުން މައްސަލަ ބެލިއަސް ޑިސިޕްލިން ބޯޑުން މައްސަލަ ބަލާނެ. ބަލަމުން ދަނީ. ބަލާފަ ގޮތެއް ނިންމާނެ." އޭނާ ވިދާޅުވިއެވެ.
މި މައްސަލައިގައި ދައުވާކުރުމަށް ފޮނުވާފައިވަނީ ރ. އުނގޫފާރު، އައިވަރީހައުސް، ޖިނާހު އަބްދުއްރަހީމް އާއި ކ. މާފުށި، ބީޗްހައުސް، އަލީ ހިޝާމް އާއި ހދ. ނޭކުރެންދޫ، ތަރާނާގެ، އަލީ ނާޒިމް އާއި ގއ. ވިލިނގިލި، ކުއްޅަވައްގެ، މުހައްމަދު ފަތޫހު ފަތުހުﷲގެ އިތުރުން ނ. ލަންދޫ، ކާމިނީގެ، އަލީ އަސްފާގުއެވެ.
ޕީޖީ އޮފީހުން ބުނީ، އޭގެ ތެރެއިން 3 މީހަކާއެކު އިއުތިރާފުގެ އެއްބަސްވުމެއް ހެދުމަށް ދައުލަތުން ނިންމާފައިވާ ކަމަށެވެ. އެއީ އަލީ ނާޒިމް، ތަރާނާގެ/ ހދ. ނޭކުރެންދޫ، މުހައްމަދު ފަތޫހު އަބްދުﷲ، ކުއްޅަވައްގެ /ގއ. ވިލިނގިލި، އަދި އަލީ އަޝްފާގު، ކާމިނީގެ/ނ. ލަންދޫއެވެ.
މީގެ ކުރިން ކްރިމިނަލް ކޯޓުގައި ބަންދު މުރާޖާކުރުމަށް ބޭއްވި އަޑުއެހުމުގައި ދިފާއުން ވަނީ މި މައްސަލައިގައި ހިމެނޭ ޒަޔާން ބަންދުކުރި ކުރުން އޭނާގެ ފަރާތުން ހައި ކޯޓުގައި އިސްތިއުނާފުކުރުމުން އޭނާ މިނިވަން ވެފައިވާ ކަމަށް ފާހަގަކޮށްފައެވެ. އަދި އޭނާ މިނިވަންވެފައިވަނީ މާފުށީ ކޯޓަށް ހާޒިރުނުކޮށް ކްރިމިނަލް ކޯޓަށް ގެނައުމުން ކަމަށް ދިފާއީ ވަކީލު ވަނީ ފާހަގަކޮށްފައެވެ. އެހެންކަމުން ޝަރީއަތް ނިމެންދެން އޭނާގެ މުވައްކިލުން ވެސް ބަންދުން ދޫކޮށްލުމަށް ވަނީ އެދިފައެވެ.
އެރު ބޭއްވި އަޑުއެހުމުގައި ދައުލަތުންވެސް ވަނީ ޝަރީއަތް ނިމެންދެން ބަންދުކޮށްފައި އޮތް އޮތުން ބަދަލުކޮށް އެމީހުން ދޫކޮށްލުމަށެވެ. ނަމަވެސް ދޫކޮށްލާނީ ޝަރުތުކުރުމަށްފަހުގައި ކަމަށް ދައުލަތުން ވަނީ އެދިފައެވެ. އަދި އެމީހުންގެ ޕާސްޕޯޓް ހިފެހެއްޓުމުގެ އަމުރަކަށްވެސް ދައުލަތުން ވަނީ އެދިފައެވެ. އެއީ ރާއްޖެ ދޫކޮށް ފިލައި ގޮސްދާނެކަމުގެ ބިރު އޮތުމުންނެވެ.
ދައުލަތުން ޝަތުރުކުރުމަށް އެދުނު ކަންކަމުގެ ތެރޭގައި އެ މީހުން ޝަރީއަތަށް ހާޒިރުވާނެ ކަން ޔަގީންކުުރުމަށާއި ޝަރީއަތަށް ހުރަސްއެޅޭ ފަދަ ކަމެއް ނުކުރުމަށެވެ.
