ރައީސް ދަރިކަލުންނާއި ގުޅުވައި ދެއްކި ވާހަކައާއި ގުޅިގެން މަންދީ އަނެއްކާ ވެސް ފުލުހަށް ހާޒިރުކޮށްފި
19 އެޕްރީލު 2025 | ހޮނިހިރު 14:23މަރިޔަމް ޒުބައިރު (މަންދި) ފުލުހަށް ހާޒިރު ކުރީ ރައީސުގެ ދަރިކަލުންގެ ކަރާމާތަށް އުނިކަމެއް ލިބިދާނެ ގޮތަށް ވާހަކަ ދެއްކި ކަމުގެ ތުހުމަތުކުރެވޭ މައްސަލައަކާ ގުޅިގެން
އެމްޑީޕީ މުޒާހަރާތަކުގައި އިސްކޮށް އުޅުއްވާ މަރިޔަމް ޒުބައިރު(މަންދީ) ފުލުހަށް ހާޒިރުވުމަށް ފަހު ރާއްޖެ ޓީވީއަށް އިންޓަވިއު ދެއްވަނީ
ރައީސް ޑރ. މުޙައްމަދު މުއިއްޒުގެ ދަރިކަލުންނާއި ގުޅުވައި އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދި) ދެއްކެވި ވާހަކައާއި ގުޅިގެން އަނެއްކާ ވެސް އޭނާ ފުލުހަށް ހާޒިރުކޮށްފި އެވެ.
މަންދީ ފުލުހަށް ހާޒިރުވާން އަންގާފައިވަނީ ހޮނިހިރު ދުވަހުގެ މެންދުރު 1:00 އަށެވެ. ފުލުހުން ފޮނުވި ޗިޓުގައި ބުނެފައިވަނީ މަންދި ފުލުހަށް ހާޒިރުކުރަނީ ކުށެއްގެ ތުހުމަތުގައި ކަމަށެވެ. ހާޒިރުވާން އެންގީ ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގ އަށެވެ.
އެގޮތުން މަންދި ހާޒިރުކުރީ 2025 މާޗް 12 ވަނަ ދުވަހުގެ ރޭގެ ވަގުތެއްގައި، އެމްޑީޕީ އިން މާލޭގައި ކުރިއަށް ގެންދިޔަ، ލައިވްކޮށް ބްރޯޑްކާސްޓް ކުރަމުން ދިޔަ އެއްވުމެއްގައި ސާޖިދާގެ ދަރިފުޅު ވޭޕް ބޯން ފެއްޓީމައޭ ބުނެ ކުޑަކުއްޖެއްގެ ކަރާމާތަށް އުނިކަން އަންނަ ގޮތަށް މަންދި ވާހަކަ ދައްކާފައިވާ ކަމަށް ތުހުމަތުކުރެވޭ މައްސަލަ ކަމަށް ޗިޓްގައި ބުނެފައިވެ އެވެ.
އެހެން ނަމަވެސް މަންދީ ފުލުހަށް ހާޒިރު ކޮށްފައިވަނީ ރައީސްގެ ދަރިކަލުންގެ ކަރާމާތް ނަގާލިކަމަށް ބުނާ މަސައްލައާއި ގުޅިގެން ނަގާފައިވާ ބަޔާނަށް ބައެއް އިތުރުކޮށްލަން ކަމަށް، މަންދީގެ ވަކީލް މުހައްމަދު ނިޝާން އިބްރާހިމް ވަނީ ވިދާޅުވެފައެވެ.
ފުލުހަށް ހާޒިރު ވުމަށް ފަހު ރާއްޖެ ޓީވީއާއި ވާހަކަދައްކަވަމުން ޤާނޫނީ ވަކީލް ނިޝާން ވިދާޅުވީ އެމްޑީޕީން ކުރިއަށް ގެންދިއަ މުޒާހަރާތަކުގެ ތެރެއިން މުޒާހަރާއެއްގައި މަރިޔަމް ޒުބެއިރު (މަންދީ) ރައީސްގެ ދަރިކަލުންގެ ކަރާމާތަށް ހުތުރުވާ ގޮތަށް ބަސްތައް ރައްދުކޮށްފައިވާކަމަށް ބުނާ މައްސަލަ ޕްރޮސެކިއުޓަރ ޖެނެރަލް އާއި މަޝްވަރާކޮށްގެން ކުރިއަށް ގެންދާތީ އެ މައްސަލަ އާއި ގުޅިގެން ނަގާފައިވާ ބަޔާނަށް ބައެއް އިތުރުކޮށް ލުމަށް ކަމަށް ކަމަށެވެ.
ނިޝާން ވިދާޅުވީ މުޒާހަރާގެ ތެރެއިން މަންދީގެ ގަޔަށް ކަޅުތެޔޮ ޖެހި މައްސަލާގެ ތަހުގީގުގެ ތެރެއިން މިހާތަނަށް ލިބުނު މައުލޫމާތަށް ބަލާއިރު، ދެ މީހަކު ފުލުހުންގެ ބެލުމުގެ ދަށަށް ގެންދެވިފައިވާ ކަމުގެ މައުލޫމާތު ލިބުނު ކަމަށާއި އެ ދެމީހުންނަށް ވެސް މުއްދަތު ޖެހުމަށް ގެންދިއުމުން އެތަނުން އެކަކުގެ މުއްދަތު ޖަހައި އަނެކަކު ދޫކޮށްލާފައިވާ ކަމަށެވެ.
ރައީސުލްޖުމްހޫރިއްޔާގެ ފަރާތުން ސިވިލް ކޯޓުގަ އެބަ ކުރޭ ދައުވާއެއް. އެކަމާއި ގުޅުން ހުރި މައްސަލައިގެ ތުހުމަތާއި ގުޅިގެން ކަމަށް ގަބޫލު ކުރެވެނީ މާލޭ ތެރޭގައި ހިނގާދިއަ މުޒާހަރާގެ ތެރޭގައި މަންދީގެ އުޅުއްވާފައި ގެއަށް ވަޑައިގެންނެވި މަގުމަތީގައި މަންދީގެ ގަޔަށް އޮތީ ބަޔަކު ކަޅުތެޔޮ ޖަހާފަ. ދެން މީގެ ތުހުމަތުތައް އަޅުގަނޑުމެންގެ ތަހުގީގުތގެ ތެރެއިން މިހާތަނަށް ލިބުނު މައުލޫމާތުތައް އަދި މިހާތަނަ ސްކަންތައް ހިނގާފައި އޮތް ގޮތަށް ބަލާއިރު، ރައީސުލްޖުމްހޫރިއްޔާގެ އާއިލާއަށް ވެސް ތުހުމަތު ކުރަން.ވަކީލް މުހައްމަދު ނިޝާން އިބްރާހިމް
މީގެ ކުރިންވެސް މަންދި ފުލުހަށް ހާޒިރުކޮށް ބަޔާން ނަގާފައިވެއެވެ. ކުރިން އޭނާ ފުލުހަށް ހާޒިރުކުރީ މާލޭގައި އެމްޑީޕީ އިން ބޭއްވި މުޒާހަރާތަކާއި ރައީސް ދަރިކަލުންނާއި ގުޅުވައި ދެއްކި ވާހަކަތަކާއި ގުޅިގެންނެވެ.
