ރިޔާސީ އިންތިހާބުގެ ދެ ވަނަ ބުރު ބޭއްވުން އުވާލަން ތާއިދު ނުކުރަން: މެންބަރު އައްބާސް
ރިޔާސީ އިންތިހާބުގެ ދެ ވަނަ ބުރެއް ނުބޭއްވުމާއި، ވޯޓުގެ 50 ޕަސެންޓު ނުލިބުނަސް އެންމެ ގިނަ ވޯޓު ލިބިއްޖެ ނަމަ ވެރިކަމަށް އާދެވޭނެ ގޮތަށް ހަމަޖައްސައިދިނުމަށް މަޖިލީހުގެ މެމްބަރުންގެ އަރިހުން ރައީސް ޑރ.މުހައްމަދު މުއިއްޒު އެދިވަޑައިގެންފައިވާ ކަމަށް ވަނީ އަޑު ފެތުރިފައެވެ
ވެލިދޫ ދާއިރާގެ މަޖިލިސް މެންބަރު މުހައްމަދު އައްބާސް
ރިޔާސީ އިންތިހާބުގެ ދެ ވަނަ ބުރު ބޭއްވުން އުވާލަން ތާއިދު ނުކުރައްވާ ކަމަށް އެމްޑީއޭއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.
މެމްބަރު އައްބާސް މިފަދައިން ވިދާޅުވެފައި ވަނީ "އެކްސް" ގައި ކުރެއްވި ޕޯސްޓެއްގައި އެވެ.
ރިޔާސީ އިންތިހާބުގެ ދެ ވަނަ ބުރެއް ނުބޭއްވުމާއި، ވޯޓުގެ 50 ޕަސެންޓު ނުލިބުނަސް އެންމެ ގިނަ ވޯޓު ލިބިއްޖެ ނަމަ ވެރިކަމަށް އާދެވޭނެ ގޮތަށް ހަމަޖައްސައިދިނުމަށް މަޖިލީހުގެ މެމްބަރުންގެ އަރިހުން ރައީސް ޑރ.މުހައްމަދު މުއިއްޒު އެދިވަޑައިގެންފައިވާ ކަމަށް ވަނީ އަޑު ފެތުރިފައެވެ. އަޑު ފެތުރިފައިވާ ގޮތުގައި މި ގޮތަށް ރައީސް އެދިވަޑައިގެންފައި ވަނީ މުލިއާގޭގައި މެމްބަރުންނާއި އެކު ބޭއްވި ބައްދަލުކުރެއްވުމެއްގަ އެވެ. އަދި މިއާއި އެކު އެމަނިކުފާނުގެ މި ވިސްނުންފުޅަށް ގިނަ ބައަކު އަންނަނީ ނުރުހުންވެ، ފާޑުކިޔުންތައް އަމާޒުކުރަމުންނެވެ.
އެގޮތުން އެމްޑީއޭއަށް ނިސްބަތްވާ ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު އައްބާސް އެކްސްގައި ކުރެއްވި ޕޯސްޓުގައި ވިދާޅުވީ ރިޔާސީ އިންތިހާބުގެ ދެވަނަ ބުރެއް ނުބާއްވާން ނިންމަވައިފިނަމަ އެކަމަށް ތާއީދު ނުކުރާނެ ކަމަށެވެ.
އަދި ލާމަރުކަޒީ ނިޒާމުގެ ސިފަތައް ގެއްލޭނެ ގޮތަށް އަތޮޅު ކައުންސިލްތައް އުވާލަން ވެސް ތާއީދު ނުކުރައްވާނެ ކަމަށް އައްބާސް ވިދާޅުވި އެވެ. އެހެން ނަމަވެސް އަބާދީގެ ނިސްބަތައް ބަލާ ރަށު ކައުންސިލަރުންގެ އަދަދު މަދުކުރުމަށް ތާއީދުކުރައްވާ ކަމަށް އައްބާސް ވިދާޅުވެފައި ވެއެވެ.
ރިޔާސީ އިންތިހާބުގެ ދެ ވަނަ ބުރެއް ބާއްވަން ނުޖެހޭ ގޮތަށް ހަދައި، ވޯޓުގެ 50 ޕަސެންޓު ނުލިބުނަސް އެންމެ ގިނަ ވޯޓު ލިބިގެން ވެރިކަމަށް އާދެވޭނެ ގޮތް ހަދަން މަސައްކަތް ކުރާ ނަމަ ރައީސް މުއިއްޒު އަޒުލް ކުރަންޖެހޭ ކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވަނީ ވިދާޅުވެފަ އެވެ.
އެކްސްގައި ހިއްސާކުރެއްވި މެސެޖެއްްގައި، ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވަނީ އެއީ ޤާނޫނުއަސާސީ އާއި ޚިލާފު މަސައްކަތެއް ކަމަށް ވިދާޅުވެފައެވެ. އާދައިގެ މެޖޯރިޓީ އަކުން ވެރިކަމަށް އާދެވޭނެ މަގު ފަހި ކުރުމަކީ ކަނޑައެޅިގެން ޤާނޫނުއަސާސީގައި އިސްތިގުރާރުވެފައިވާ އަސާސީ މަބްދައަކާއި ޚިލާފުވުން ކަމަށް އެ މަނިކުފާނު ވިދާޅުވި އެވެ.
މީގެ އިތުރުން އެއީ ޑިމޮކްރެޓިކް ނިޒާމާއި ވެސް ޚިލާފު ކަމެއް ކަމަށް އެ މަނިކުފާނު ވަނީ ވިދާޅުވެފައެވެ. ޑިމޮކްރެޓިކް ނިޒާމު ފުނޑާލަން މަސައްކަތް ކުރުމަކީ ރައީސުލްޖުމްހޫރިއްޔާގެ ހުވަޔާ ހިލާފުވާނެ ކަމެއް ކަމަށާއި އެއީ އަޒުލުކުރަން ޖެހޭ ވަރުގެ ކަމެއެއް ކަމަށް އެ މަނިކުފާނު ވަނީ ވިދާޅުވެފަ އެވެ.
ރައީސް ޑރ.މުހައްމަދު މުއިއްޒު ވަނީ ރިޔާސީ އިންތިހާބުގެ ދެވަނަ ބުރު އުވާލަން ހުށަހަޅުއްވާނެކަން އާއްމުކޮށް އިޢުލާންކުރައްވާފައެވެ. އެކަން އެ މަނިކުފާނު ހާމަކުރެއްވީ 2024 ވަނަ އަހަރުގެ ޖުމްހޫރީ ދުވަހުގެ ޖަލްސާގައި ވާހަކަ ދައްކަވަމުންނެވެ. ރައްޔިތުން އެގޮތަށް ދެކޭ ނަމަ އިންތިޚާބު ބާއްވާނީ އެއްބުރު އޮންނަ ގޮތަށް ކަމަށް ރައީސް ވަނީ އޭރު ވިދާޅުވެފަ އެވެ.
